حسن محمد النور (أبقرين)

هذا بوست جميل وفعلا حايدينا راحتنا نوثق لشخصيات كتيرة في شندي وياريت لو الأعضاء يركزو علي الناس البسطاء الذين نالوا شهرة في شندي او لعبوا أدوار خالدة ..

وأنا حا أفرع هذا البوست بشخصية :

أبقرين
واسمه الحقيقي حسن محمد النور من أهالي منطفة الشقالوة
هذا الرجل نال شهرة واسعة ليس في شندي أو نهر النيل فقط ولكن يكاد يكون في كل السودان ،لكن طبعا جايز يكون في ناس كتار في المنتدى ماسمعوا بيهو ودا فايدة هذا البوست لما كل عضو يلقي الضوء علي الشخصيات المعلومة لديه .
أبقرين دا يكاد يكون أعظم غطاس هاوي في السودان ،وكم ساعد في أخراج عربات صغيرة وكبيرة ،أخطات طريقها من بنطون شندي الى أعماق النيل ،بمهارة فائقة وبعد يفشل ناس محترفين ومجهزين بكل المعينات .وقد منحه الله مقدرة غير عادية في البقاء تحت الماء ،وقد ذكر لي انه يستطيع ان يغطس تحت الماء لاكتر من 40 دقيقة ،وطبعا لو سمع به العم جينيس كان دخلو في موسوعته ..
له قصص عديده لا تحصى ولا تعد في شندي وخارجها ومرات تحكى عنه قصص كانها أساطير ..
سالتو في يوم من الايام كيف الغطاسين يجيبوهم من الخرطوم لي لوري غطس في مشرع شندي مايلقوهو وتنجح في العملية انت؟
قال لي حتة المشرع دي تحت فيها متاهات كتيرة في شكل بيوت من الحجارة وجماعتك ديل بخافوا يروح منهم الدرب تحت ويغرقوا ،لكن انا حافظا كلها ومابخاف منها .
وله قصة طريفة مع المرحوم عوض النور في المشرع ،كالعادة تم الاستعانة بابقرين بعد فشل ناس الخرطوم في استخراج احد اللواري ،وكان عمنا عوض النور له معرفة بصاحب اللوري وقاعد مجاملو ،وعمنا عوض لما شاف ابقرين نص ساعة مامرق قال للجماعة انا من الاول ماقت ليكم العربي ده بغرق ،لكن بعد شوية أبقرين مرق بردان وقال للجماعة ادوني سجارة ،شرب سجارتو وقال لهم لوريكم لقيتو ،سيد اللوري ماصدق وقال ليهو وصفو ،قام وصف الحاجات الفيهو ،سيد اللوري اقتنع وقال ليهو خلاص انزل اربط فيهو الحبل وورينا داير كم ؟أبقرين قال ليهو داير 5 مليون وكان في ذلك الزمن مبلغ كبير يعادل نص قيمة اللوري ،عوض النور قال ليهو ياعربي شوف ،والله مو ان لقيت اللوري ،كان شربت البحر دا كلو هسه الزول دا ماعندو ليك مبلغ ذي دا ،خمسمائة جنيه بس .وطبعا ابقرين في الاخر قبل ونزل ربط الحبل ..
قال لي ان أشهر عملياته حارج شندي كان استخراج احد بنطونات رفاعة بعد غرقه .
مازال عمنا ابقرين حيا يرزق وقد تم تجنيده قبل عدة سنوات ضمن شرطة الدفاع المدني بولاية نهر النيل ..

شكراً جزيلاً كبسور على الأستجابة للكتابة والتوثيق لشخصيات من شندى ..

والتحية والتقدير لعمنا أبقرين متّعه الله بالصحة والعافية .

سرد رائع لعمنا ابقرين

مشكور اخي الفاضل كبسور

تقبل تحياتي

شكراً كثيراً أخونا كبسور والقصص دي سمعت بيها في شندي واكدها كثيراً من الناس ربنا يديك العافيه ويدي عمنا ابقرين الصحه والقوه والعافيه لما فيه خير المنطقه
وتقبل تحياتي ومروري

حسن محمد النور (أبقرين)

حسن محمد النور (أبقرين)

رد: حسن محمد النور (أبقرين)

رد: حسن محمد النور (أبقرين)

رد: حسن محمد النور (أبقرين)