شندي ماضي تليد وفجر جديد

بسم الله الرحمن الرحيم

حياتنا دروب طويلة وأيامنا مشاوير قصيرة وبين طول الدرب وقصر المشوار تمحو الرياح ما تشاء من اثار أقدامنا وتبقي على ما تشاء..

مدينة شندي تلك المدينة الهادئة التى تنام على ضفاف نهر النيل متزينة بأجمل الثياب وتكسوها الخضرة والجمال من كل جانب ومتعطرة بروائح أشجار المانجو والنخيل والبرتقال والجوافة والقريب فروت وعطر أشجار الليمون ممزوجة بعبق الماضي والحاضر وطيبة وكبرياء وشموخ وعزة أهلها

المشهد الأول ..

وأنا فى مدخل المدينة بعد أن ابعدتنا الغربة عن محبوبتنا ترهف مشاعري فى هذه اللحظات احس اننى أمام لوحة موحية تندي خيالي وتهرب بي الى عوالم بعيدة بعيدة جدا عن الواقع الذي اعيشه أنها تذكرني الصفاء الروحى الذي يهدهد مشاعر الفنان حين يتسلل فى تيه الحروف باحثا عن الجمال والرؤي والحنان حينئذ يسيل أحساس ممسوق على هامة وجدانى شعور عميق دافئ كاحلام الطفولة المصلوبة على مشارق الحرمان..أراها وتراني تعجبنى جدا أحسها تحرك حنايا روحي تزلزل كيانى حين المحها فى عيني احادثها الصدق مصحوبا بالحنان والحب والأشواق حينئذ تبدأ عبر العيون كلمات لم تنطقها لكن عيناها تتكلمان تصدحان تحكيان تبوحان أحاديث حلوة حادة حارقة تاتينى تخترقني تستقر داخلي كيف لماذا لاأدري ؟؟وتنظر الي نظرة عتاب لماذا الهجر ياحبي؟؟ وأنا لسانى حالي فى هذه اللحظات مع رائعة أحمد رامي وصوت أم كلثوم ليلى يطول وفكري فى هواك مشغول أقول امتى انا وانتى ح نتقابل مع الأيام نتعانق ويطول العناق اجد قلبا يرق الي يغطينى من البرد وزمهرير الضياع أتوسد حضنها الدافئ الكبير الذى يسع كل من سكن هذه المدينة الطيبة بكل حنان وأريحية كحضن أمه نتبادل الحديث والهمسات عن ماضيها ومستقبلها عن أفكارها ورؤها المستقبلية تستقبلني أستقبال الابطال أدخل اليها يسبقنى شوقي ولهفتى وحنينى أجد على يساري مقابرها تلك الارض الطاهرة التى ينام عليها غريري العين باذن الله اهل هذه المدينة الطيبة الذين وأفاهم أجلهم يجول فى خاطري كل الذين سبقونا من اخواننا واعزاءنا وأحبابنا فتدعو لهم بالمغفرة والرحمة وربنا يبدلهم دار خير من ديارهم وأهل خير من اهلهم ويدخلهم جنات عرضها السموات والأرض فى هذه اللحظات وأنت داخل البص وعيونك مع شباك البص تسترجع شريط الذكريات وكل من فقدته وفي هذه اللحظات ياتيك صوت امراءة كبيرة فى السن السلام عليكم ياناس القبور انتو السابقين ونحن اللاحقين ربنا يرحمكم ويوسع منازلكم ويكرمكم كرم من عنده ياعزيز يا جبار تبكي عندما تسمع كلمات هذه المراءة تبكي وانت نظرك وخيالك مع كل من فقدتهم وتعتصر دموعك وتخنقك العبرة فى حلقك تدعو لهم فى سرك بالرحمة والمغفرة..
نبدا الدخول الى محبوبتنا الغالية فى الدعاء لمن سبقونا

فى دواخل كل منا كمية من الذكريات والشجن لهذه المحبوبة الغالية فتعالو جميعا نتذكر حياتنا هنا ..

يتبع

شندي ماضي تليد وفجر جديد Images-cd831e289c

تسلم اخ نزار علي هذه المشاعر والكلمات الجميلة ل محبوبتنا شندي

ومنتظرين مشهد تاني باسلوب رائع زي اللي فات

لك التحيه أخى نزار يابخت شندى بحبك الدفاق ويابختنا جميعا بهذه المدينه التى نتشرف بحبنا لها ولأهلها ولكل زكرى عشناها يوماً بها
فلك الشكر على هذا الاسلوب الراقى فى نثر حبات الحروف على هذه الصفحه صدقنى انا اغمضت عيونى ورأيت كل صور الزكريات تمر ببطء ولكن لها دوى مثل ذلك القطار الذى كان يقطع علينا الطريق ونحن طالعين من مدرسة معهد التربيه راجعن بعد يوم دراسى جميل الى حينا ومرتع صبانا (قريش) .
أدعوك أخى نزار لمواصلة هذا التدفق من الحنين فنحن نحب شندى ونحب من يحبها

والله اخونا الجمري كلامك هيج الاشواق والشجن ومرت الزكريات بتأنى تتأرجح في مخيلتى كعاشق ولهان.. ولما اكون مسافرة شندى من العاصمة _ ما بنوم طول الليل وبفكر __ افكر في شندى واهلها والطيبة _ وقبل دا كلو افكر في حنيتها وشوقها لينا ومهما نبعد منها تلقانا بالترحاب والمودة (هي فعلا امنا الرؤم) ولما اركب البص ويتحرك بنا من بحرى يااااالها من احاسيس ومشاعر .. يسير البص ببطء في شوارع بحرى اما انا فاطير باقصي سرعة لمحبوبتي.. فاغمض عيني واجتر الزكريات ,, شوارع شندى ,, نيل شندى,, مدارس شندى ومواقف المواصلات واحياء شندى ,, قري شندى وضواحيها ((مويييس)) ودي خلوها يوم تاني)) وعندما يصل البص الكدرو احس وكانه قطع هذه المسافة في سنة واقول في نفسي ( البص دا مااااالو ماشي بالراحة كدا . ولنا عودة.

تسلمي بت نمر على المرور ونكون سويا محظوظين بحب هذه المدينة العملاقة الشامخة..

دمتي كل الود

ادينا من ذكرياتك ..

يسعد مساءك بكل الخير عبدالله حسن بشير ..

معهد التربية هو تراثنا ومرتع صبانا يتكون من ثلاثة انهر جماع وعباسي وتجاني كانو أهل جماع أكثر شغبا وأهل عباسي اكثر نظاما وترتيبا وكان نهر تجاني هادئا عندما تراه تحس أن المكان خاوي ولا احد فيه عرفنا الفلاحة المدرسية فى معهد التربية عرفنا الترتيب والنظام في طابور الصباح والطابور العام عرفنا حصة المعاينة ولاول مرة فى التدريس نري معلما يعلمك وخلفه موجه يوجهه ويصحح اخطاءه وجدنا الكنز جنب دكان احمد الباز ربنا يرحمه ويحسن اليه ودكان الجعلي نجرى فى فسحة الفطور كاننا لما ناكل من قبل على السلطة البيضاء لصاحبتها حاجة كريمة فهى سلطة طعمها الى الحين يجرى فى ذوقنا وألسنتنا وكانت من اجمل الحصص فى المعهد حصة المشتل ذلك البستان الذي يتكون من كل خيرات ما انبتت الارض

للناس عيدين عيد فطر وأضحي ونحن فى مدينة شندي العريقة كنا محظوظين كانت لنا ثلاثة أعياد لايقل أحساسه فى الفرح والسرور عند كل أهل المدينة كالفرح بالفطر والأضحي انه عيد معهد التربية شندي نبدا فى حفظ الاناشيد والرياضة ياسلام كانت أيام جميلة الولد يحمل عصاه والبنت تحمل طوق ونرقص سويا ونغنى جيتونا جيتونا شرفتونا ديارنا ياها دياركم عمارنا ياهو عماركم اهلا حبابكم عشرة فرسان بلدنا حبابكم عرفنا ثقافات اهل السودان جميعا من معهد التربية شندى عرفنا المحس والسكوت عرفنا أهل كردفان ودارفور عرفنا ثقافة اهالي حلفا عرفنا ثقافة اهل الجنوب والشرق من خلال المسرحيات والرقصات التى كانت توديها هذه المجموعات عرفنا رياضات مختلفة كجر الحبل وسباق التتابع غير الأنشطة المختلفة ككرة قدم وطائرة وسلة كان معهد التربية شعلة من النشاط وكانت حركة اقتصادية فى سوق شندي عندما ياتي الكومر ويقف امام احد المحلات فى السوق تري صاحب المحل يبتسم حتى تظهر سنه الاخيره كانو يغذون بشدة محلات الباسطة والحليب يوم الخميس كانو منظمين فى اللبس بسيطين التعامل طيبين المعشر خلقو علاقات طيبة مع أهل المدينة عرفنا السودان الموحد من خلال معهد التربية شندي ..

ياسلااااااااام عليك يا عبدالله حسن بشير ذكرتنا ايام جميلة ايام المعهد وأكيد جواك بتكون فى مئات الذكريات من المعهد يلا سويا نتذكر ذكريات أهم صرح فى مدينتنا
دمت بالف خير وكل التحايا لكل أهلنا فى قريش ..

أم تسابيح دمتي بكل الود ..

الناس رقود والجو هادئ وجميل وأنت فى اخر نومه أول ما تفتح عيونك تسمع صوت الاذان الله أكبر الله أكبر وأمك تربت على كتفك ياود قوم خلاص قوم البس مواعيد البص خلاص نحن حاجزين بالبراق والبراق ده بقوم بدري ما بنتظر من بحري يلا قوم اتسوك وغير هدومك دى.. والواحد فينا بى نعسته ياخ انتو غير البراق ده مالقيتو كان تحجزو فى العربي بقوم متاخر شوية وحجز البراق فى تلك الايام كان أسهل تحجز طيارة على اى خطوط زحمة وصفوف خاصة أيام الأعياد تقوم وتلبس وكلك لهفة وشوق للقاء المحبوبة والأهل والحنان نصل الجيلي ونتزود منها بالجوافة والسندوتشات تحس ان البص لايمشي من شدة الشوق واللهفة ومحطات كتيرة يقف عندها البص ..وتلوح المحبوبة فى الأفق وتنسيك التعب والم البص وسوء الطريق..
تخريمة..

مرة يا ام تسابيح عندنا قريبتنا اتوفت ربنا يرحما ويغفر اليها اها جينا شايلين الجنازة بى نيسان والواطة اتاخرت بعد الساعة 12 باليل والبص يمشي ويستريح والحريم فى البص مع الدقداق وتعب البص كلهن ضربن النومة وبقن يشخرن مشن فى سابع نومة عمتى قاعدة جنبى تنوم وتشخر وتصحي اها فتحت عيونا فى فترة كده قالت لي وصلنا وين قلت ليها نحن قدام معهد التربية اها عمتى دى طلقت ليك حسها وبقت تكورك الليلة وووووووووب يا حليلك ياحبيبة قساي قلت ليها من قبيل ما بتشخري قالت لي وقت وصلنا المعهد معناها وصلنا أهلنا ههههههههههههههه

يذهب بنا البص فنصل لفة مربع 17 الدسمة حاليا على اليمين ومربع 18 وقريش وحي البيان على اليسار أري فى هذه الاحياء حنان الأمومة ورافة الأبوة وبراءة الأطفال اراها فى كل شئ حولي أشاركها همومي واحزاني سعادتي وفرحى عرفت مع هذه المدينة كلمة الحب تلك الكلمة الصغيرة التى ما أسهل مايقولها الناس للناس وماأسرع ماينخدع فيها الناس قالوها أغلب الأمر كل الذين اشتركو فى تكوين هذه البشرية قالوها بطرق شتى وأساليب مختلفة فأنا لا شان لى بهولاء جميعا كلمتى التى قلتها لها فهي جديدة عندى كقطرة من ماء المطر تكونت ونزلت ثم لم تتكرر أحتفظت بها عمري كله لأقولها لها في لحظة احتياج لها ولا أظن أن كلمتى هذه لها شبيه فى مستقبلها الطويل الطويل الذي سيمتد وستظل تردد مع اولئك الذين رضي عنهم ربهم على ضفاف الكوثر فوق رحاب الخمر والعسل على السندس الأستبرق ربنا يجعلنا منهم عرفت معها أن الحب ليس له حدود ليس له مكان يتقابل فيه العشاق فهو ياتينا من حيث لاندري ولايكون فى حسباننا فجاءة وبلا مقدمات تعلو نبضان القلب وتخفق كانها تعزف على اخر المقطع تجد نفسك تحب وتشتاق تشدو باعذب الكلمات ياحليل ربوع شندي بلد الجمال عندي ثم تعرج الى يلا شندي نزور الحبايب أسافر معها بخيالي أحملها روحي بين يديها وفي بحور عينيها وعلى نيلها أتوة من مرفئ لي مرفئ أجد نفسي احبها اكتر وهي تستعمل الكريمات ومساحيق التجميل فى تغيير ملامحها حتى تجد الجيل القادم يحبها كم احببناها من قبل وتواكب عصر التطور فى تغيير ملامحها من معهد التربية شندي الى جامعة شندي ومن المديرية الشمالية مجلس محلي شندي الي ولاية نهر النيل محافظة شندي ومن سينما شندي العريقة التى كان دور كبير فى الثقافة الي أرض فضاء خاوية ومن مدرسة شندي الأهلية المتوسطة الى مدرسة عبدالله ابن عباس ومن مدرسة الاميرية المتوسطة الي مدرسة كامل ابراهيم النموذجية ومن زنك الحريم حيث الويكة والودك الكركار والشطة الحمراء الى دكاكين المجلس تواكب العصر حتى تقف شامخة كما عهدناها..

يتبع

اول محطة لدخول المدينة بالنسبة لي هي ود بانقا وما اجملها تلك الوجوه المليئة براءة وهي تمعن النظر في ركاب البص وهم يحملون علي اكتافهم التسالي والفول والترمس والبيض والبسكويت المحشي ,, وبعد الاستراحة القليلة يتحرك البص قاصدا ربوع شندى يتهادي وسط الرمال الذهبية ,, وكل من في البص قد بدأ يجهز نفسه للقاء محبوبته ,, شندى,, تشحننا بالحنين دون ان نحس او نشعر ,, تملأنا ودا وحبا لا نحمله في الوجود لغيرها ,, وفي الافق تلوح قبة الشيخ الحفيان وتسمع صوت ينادي ( يالحفيان ويا الخليفة عتمان تلحقنا وتنجدنا ) وصوت الاطفال يسألون (وصلنا ولا لسة؟؟؟ وبنصل شندى متين؟؟) ودا اكيد حال كل واحد في البص ,,, ووصل البص لفة مربع 17 (الدسمة) في مواجهة معهد التربية ذلك الصرح الذى يقف شامخا كاكبر صرح تعليمى بمدينة شندى .. ويدخل البص المدينة وتشاهد علي يمينك المدارس الثانوية للبنين والبنات والورش وبعد شوية ميدان المولد واستاد شندى وعلي يسارك بيوت المعهد والتنمية ويصل البص الي محطته الاخيرة بجوار محطة البنزين وبداية سوق شندى

تحية للأخ نزار الجمرى ولقلمه الرشيق وهو يعبر بسلاسه عن حبه لشندى .. كلنا مفتون بها وإن عجزنا عن التعبير عن عشقنا لها ...
ولى عودة لهذا البوست الرائع ان شاء الله.

ام تسابيح كتب:اول محطة لدخول المدينة بالنسبة لي هي ود بانقا وما اجملها تلك الوجوه المليئة براءة وهي تمعن النظر في ركاب البص وهم يحملون علي اكتافهم التسالي والفول والترمس والبيض والبسكويت المحشي ,, وبعد الاستراحة القليلة يتحرك البص قاصدا ربوع شندى يتهادي وسط الرمال الذهبية ,, وكل من في البص قد بدأ يجهز نفسه للقاء محبوبته ,, شندى,, تشحننا بالحنين دون ان نحس او نشعر ,, تملأنا ودا وحبا لا نحمله في الوجود لغيرها ,, وفي الافق تلوح قبة الشيخ الحفيان وتسمع صوت ينادي ( يالحفيان ويا الخليفة عتمان تلحقنا وتنجدنا ) وصوت الاطفال يسألون (وصلنا ولا لسة؟؟؟ وبنصل شندى متين؟؟) ودا اكيد حال كل واحد في البص ,,, ووصل البص لفة مربع 17 (الدسمة) في مواجهة معهد التربية ذلك الصرح الذى يقف شامخا كاكبر صرح تعليمى بمدينة شندى .. ويدخل البص المدينة وتشاهد علي يمينك المدارس الثانوية للبنين والبنات والورش وبعد شوية ميدان المولد واستاد شندى وعلي يسارك بيوت المعهد والتنمية ويصل البص الي محطته الاخيرة بجوار محطة البنزين وبداية سوق شندى

أم تسابيح دمتى بكل الود ..
فعلا محطة ود بانقا هي بداية الدخول الى ديار المحبوبة والوقوف على اطلالها عيون كل من في البص الى اريل الارسال شوفتو الاريل الهنااااااااك داك دي محطة ود بانقا يظهر لك الاريل فى شكل رهاب ثم يبدو يوضح أكثر وأكثر كلما أقترب البص حتي تبين ملامحة فى هذه اللحظات تبسم كل من في البص وحس انه يقترب رويدا رويدا من ديار المحبوبة وسادت الطمانينة كل من في البص بانهم اوشكو على الوصول..
لكن يا أم تسابيح اريل محطة ودبانقا ده عذبنا عذاب ياحليييييييل زمن المسلسل الساعة تمنية ( Cool

والأسرة كلها مجتمعة فى المسلسل وعايشة مع القصة بكل الاحاسيس والمشاعر فجاءة ينقطع الارسال ثم تبدا الشائعات انقطاع البث ده طول شكله من ارسال محطة بانقا لا الشخوت الفي التلفزيون دي شكلها من ارسال امدرمان انقطاع امدرمان برجع سريع الزمن أتاخر ده شكله ارسال محطة ودبانقا واذا تاخر اكتر من ثلاثة ساعات الناس اتيقنت وعرفت انه ده ارسال محطة بانقا وختت فى البال انه يومين تلاتة ما ح يرجع ..

خلاوي الشيخ الحفيان انشئت من قبل الشيخ العارف بالله على الحفيان طيب الله ثراه وجعل الجنة مثواه فى عام 1910م بقرية الكرماب غرب شندي وبالقرب من المتمة وكان أول شيخ لهذه الخلاوي هو الخليفة ابنه الصديق على الحفيان الذي حفظ القران بخلاوي الشيخ حامد أبوعصاة سيف فى المكنية وفي عام 1917م حضر الشيخ على الحفيان الي هذا الموقع الذي نمر من خلاله موقع المسيد الحالي كما نشاهده جميعا وقبة الشيخ على الحفيان التى تقف شامخة كشموخ أهلها ..

شندي ماضي تليد وفجر جديد 032710030315to873bz8g7up05lj

شندي ماضي تليد وفجر جديد 032710030315to873bz8g7up05lj

مسجد الحفيان

أم تسابيح ربنا يديك العافية ويخليك لينا وتتحفينا بالمميز كما عرفناك..

أم احمد كتب:تحية للأخ نزار الجمرى ولقلمه الرشيق وهو يعبر بسلاسه عن حبه لشندى .. كلنا مفتون بها وإن عجزنا عن التعبير عن عشقنا لها ...
ولى عودة لهذا البوست الرائع ان شاء الله.

أم احمد يسعد مساءك بكل السعادة ..
التحية ليك على هذه الكمات الطيبة وكلنا عشقنا واحد وهمنا واحد وهدفنا واحد حتي نربط اجيالنا ببعضها البعض ونتكلم عن ماضي معشوقتنا وحاضرها لكي نجد من على البعد لذة القرب منها .. منتظر عودتك وذكرياتك مع هذه المدينة الفاضلة ..

دمتى بكل الود ..

زكرياتي في شندي هي كل حياتي صدقوني كل حياتي تعني كلمة رائعة هي شندي
اول هواء تنفسته عند ميلادي هو شندي اول اناس رايتهم شندي اول ماتذوقت هو من شندي بصراحة شندي حياتي بداية حياتي ومنتهاها وبقدر عجزي عن وصف شندي بالنسبة لي وقيمتها الرائعة في قلبي بقدر حبي وفخري بها

لن اقول لي زكريات فيها بل كل زكرياتي اذكر الايام التي تعرفت عليها ايام صغري واستكشافي لها اذكر بوضوح ايام روضة ماما ليلي بمربع سبعة

والنشيد الرائع الذي تعلمتة

قومي ياطويرة
شدي لي كفتيرة
كفتيرة تكون مزبوطة
بالنعناع مخلوطة حبوبتك ام قدوم
الساكنة في الخرطوم
ودة حقيقة نشيد قديم جدا بس عندي الاحلي كان

ولا

بطة يبطة شيلي الشنطة يااااااااااااااااه
حقا هي ايام رائعة جدا جدااااااااااااااااااا تعرفت فيها علي محبوبتي بل موطني الجميل اذكر ايام معرفت دكان ود العطا ودة مشهور جدا لغاية الان... اثناء مروري للروضة وحينها لم يكن هنالك ترحيل زي احتياجات الزمن دة وتعرفت علي تعاون القرداب والفرن وحاجات كتيرة كنت قد عرفتها اثناء نشاتي وشكلت معاني شندي الجميلة بوضوح في داخلي

ولاانسي صديقات طفولتي واصدقاءها في الروضة ديل لايقدروا بثمن لانهم من شندي كما اذكر ايام الخلوة كل يوم العصر بمشي مع جدو لمسجد الفكي يوسف لتلقي القران الكريم( لا انسي منارة شندي التعليمية ) معهد التربية وكان حينها بندرس اولاد وبنات وحينها كان لسة فصول عباس وجماع قاعدة بس انتهت بكام سنة بعد التحاقي بالمدرسة ولازالت شندي تكبر في قلبي مع مرور السنوات وحبها لن ينتهي لانها

حياتي

بت نمر دمتى بالف خير ..

نهديك رائعة الزين محمد الزين شندي فوق مربع سبعة (ترعة فرانكة )

ياعيني تعاينن جننتنو قلبي
يا دنيا شيلتينا
وياغربا هنتينا
وإشتهينا ستينا
ستمائة ستينا
يالله ودينا
للمتمة غرب شندي

حبيبة عليك دينك
وحق والدينك
أتوصي بي زينك
أنا هايم مخبي

يا الماشي الإجازا
أرجوك تغشى الحجازا
ودي الديمة حجازا
ياقلبي تجازا
سهران وقلا نومي

دكان ود العطا من أقدم الدكاكين فى شندي وكما يحلو لزبائنه بتسميته (أبوالرخا ) يابت نمر ابوالرخا ده أحسن وأحد فى الدنيا بعمل فتة فول ودكان التعاون من أوائل الجعيات التعاونية في شندي وكان يسمى جمعية أبناء القرداب التعاونية والفرن الالي كانو تلاته افران الية فى شندي فرن مصطفي محمد مصطفي وفرن القرداب وفرن سوق الشجرة وكانت قبله للمستهلكين من كل الجهات الى حدود عطبرة والدامر ..
اجمل ايام العمر هي فترة الروضة والاناشيد الجميلة التى ظللنا نتذكرها حتى الان لما كنت صغير بلعب بالتراب ماما لبستنى الجزمة والشراب مشيت للافندى ادانى كراس حساب تانى نشيد لى قطة صغيرة سميتها سميرة تنام فى الليل معي وتلعب باصابعي ونشيد روضاتي ياروضاتي أشيل فطورى واجرى اجريبو تحت الكبرى كانت معلمتنا فى الروضة ست حياة ربنا يمتعا بالصحة والعافية ..
تسلمي بت نمر وربنا يخليك

شندي ماضي تليد وفجر جديد 032710150356t4p9iigyx5yoxsfl3

يعطيك الف عافية اخي نزار

وبجد انا كنت ناسية نشيد روضاتي يا روضاتي .................... وماما حياة

ودي كانت صورة لمسجد الفكي يوسف بالحجازة قبل ما يتم اعادة تاهيله

بلادي امان بلادي حنان وناسا حُنان

يكفكفوا دمعة المفجوع

يحبوا الدار

يموتو عشان حقوق الجار

يخوضو النار عشان فد دمعة

كيف الحال لو شافوها سايلة دموع

أجمل أيام شندي يوم التاسوعة ..

تغزل معظم شعراءنا فى الليل وصمت الليل وسكون الليل والليل سكونه جميل والليل نسيمه عليل وتانى شاعر قال الليل الليل ما بنومو لاني حارس نجومه وتانى قال لما الليل لبس اجمل فى وشاح فى اللحظة ديك أشتقت ليك وأحتجت ليك نحن اشتقنا لليلة التى تسبق عيد الأضحي والفطر أشتقنا لى كلمة انت ياود ح تضرب البوهية دى متين كل شوية دقيقة دقيقة اشتقنا لى كلمة امشو جيبو الخروف من زريبة محمد أحمد عندو خرفان سمحات وترباية زريبتو وصوت الخروف وهو رافض الذهاب معاك وهو اكثر حنينا لى مكان نشاته وحبه والمكان الذى ترعرع فيه أشتقنا لى مشية السوق وانت ناقصك مركوب جديد وطاقية تحدرا فى نص راسك أشتقنا لى محارسة الترزى حتى الانتهاء من الجلابية وكلمة الجلابية انتهت باقى العمود بس لف ليك ساعة وتعال بتلقاها جاهزة اشتقنا لى مقابلة الاصحاب والاحباب الجاى من البندر والجاى من الصعيد الفرقتن الدنيا وظروف العمل وهم لايفوتون مثل هذه اللحظات للقاء مع الاهل والعيد بجوار الأسرة الممتدة وتلقى الناس يسلمون على بعض فى توادد وتراحم وحب غير مصطنع ويسالون عن اخبار بعض بى لهفة وشوق يدخلون فى احضان بعض بى لهفة وحميمية.. اشتقنا لى شيل صواني الخبيز وريحة الخبيز الفايحة من الفرن اشتقنا لى كلمة عليك الله خلينى أدخل الصواني دى قبلك لانو عندى شغل كتير لو ما مستعجل اشتقنا لى ركيب الستائر وغسيل أبواب الشارع اشتقنا وانت ماشى فى الشارع يجيك صوت عليكم الله ياوليداتي تعالو شيلو معانا الدولاب ده عشان ننظم الغرفة اشتقنا اول ما تصحى الصباح تصحى بصوت الله أكبر الله أكبر لا اله الا الله الله أكبر ولله الحمد أول ما تصحي تلقى أبوك قدامك ويقول ليك كل سنة وانت طيب ياولدى عافي منك ورضيان عليك وربنا يمتعك بالصحة والعافية وحافظ على صلواتك وما تمد يدك على حق زول ويجيك صوت امك كل سنة وانت طيب وعافية منك عفوا لايتسد ولا يترد وربنا يغطيك ويحميك ويحفظك من كل مافيه شر لك والسنة الجاية يارب اكون فرحانة بيك مجرتق بالعديل والزين وباقى الكلام لاتسمعه انما تحسه نابع من قلبها ودموع عينيها وهى تقش دموعا بى طرف توبا ويجيك صوت اخوانك كل سنة وانت طيب والقابلة الجاية فى بيت حلالك تلبس أجمل انواع الجلاليب ومتعطر باجمل انواع العطور تطلع الشارع تحس فرحة العيد فى عيون الاطفال وهم فى كامل هيبتهم ورونقهم وجمالهم , تلقى جيرانك ماشين المسجد وتتبادلون التبريكات بالعيد وربنا يعيده علينا بالخير والبركات أشتقنا لى صوت الفكي الأمين ربنا يرحمه ويدخله فسيح جناته مع الصديقين والشهداء وهو يحث المصلين على التكاتف والتوادد والتراحم وصلة الرحم ويمسح دموع الغلابة والمحتاجين
ويبشرهم ان نبينا محمدا صلي الله عليه وسلم قد ضحى عن كل من هو محتاج ولا يملك ثمن الأضحية اشتقنا لى منظر الناس وهم يصطفون ويتبادلون التهاني بالعيد وكل مجموعة مشت مع بعض تعيد على الأهل والأصحاب والاحباب اشتقنا لى كلمة لازم أول حاجة نغشي ناس ابراهيم نعيد عليهم وده اول عيد يمر عليهم بعد فقدو ابوهم نخفف عنهم ونواسيهم فى مصيبتهم ..
اشتقنا لى شيالات الخبيز والحلاوة وكل اسرة تبدع فى هذا الجانب وتحضر اجمل الاشياء أشتقنا لى كلمة عليك الله كان ماشلت تانى عليك الله لو ما شلت من الناعم ده ظريف والله اجى يابنات أمي فى زمتك هسى الشلتها دى بتسوى ليك شنو الرسول فيك كان ما شلت اشتقنا وين ما تحصل الفطور جاهز تقعد تاكل بى نفس فاتحة وطيب خاطر أشتقنا لى كلمة عليك الله لو ماقعدت فطرت معانا عارفكم ضابحين فى البيت لكن حرم والله فطورنا مرق وجاهز هسى برصو فى حرم ما بتطلعو أشتقنا لى ريحة الصاج وريحة البن لما يفوح فى القلاية..

مرة فى عيد فطر والترزى زحمة وديت جلابيتى لى ود العماوى من أحسن الترزية فى شندى اها ود العماوي مع اللخمة عمل لى في الجلابية رقبة فوق ورقبة تحت لما جيتو اعتذر لى اعتذار شديد قال لى كان معاي صاحبي قبيل هنا وكلمتو بالجلابية والغلطة الغلطتها قال لى صاحبي قال أصلو الولد العملت ليه الجلابية ده ود كوشتينة Laughing

فى دواخل كل منا كمية من الذكريات والشجن لهذه المحبوبة الغالية فتعالو جميعا نتذكر حياتنا هنا ..

تسلم يا نزار00هيَجت فينا مشاعر وذكريات لا تُعد ولا تُنسى00
حنتذكر معاك بس خلينا نتنسم عبرك نسايم شندي الحلوات00ولينا رجعه بي ذكرياتنا00
أتحفنا أكثر وأكثر
وحلوه حكاية الجلابيه وود الكوتشينه شندي ماضي تليد وفجر جديد Icon_lol

شندى ياكل المحاور والدوائر .....ياحكايات الصبا...
آآآآآه حينما يعاودنا التزكار..وحين تطل رؤاك الحلوة عبر السنين..تتحكرين فى سويداء الفؤاد شريان يهب الحياة..
انتى امنا الحنون التى اشبعتنا حنانا ودفء وجعلتنا نتميز عن كل الخلق بترابط واخوه واصبحنا من نسيج متباين ونادر الوجود..

بتجينى ذى خاطرة غنا ... ودخلة سحابة على مهل
لى زول وحيد تم السنة ... عز الهجير حاريك ضل
عاشق عيونك وساكنا ... ومتنسم الزمن المحل
حد ماسافر فى مداين وارتحل...
عاشقك هنا ... وكاتبك هنا ...
وشايلك جواهو محل ...محل..

التحية لك اخى نزار وانت تحمل شندى زاد الغربة المريرة وتتحفنا بروائع الزكريات التى اثارت الحنين لشندى..
وباذن الله لنا عودة ...

زيزو بزيارتك بيتنا نور كله زينة جاتنا بسمة فايحة نسمة من نسمات مدينتنا الحبيبة التى لها في قلوبنا ذكريات حب عميقة فيجيش شوقنا لها فى كل الاوقات ويتعالي همسها نابضا بالأمل زاخرا بالحنين مع وعد منها بالقاء ونتلاقي لانعرف مدي ويتجاوز الحب الصدي لقاء تنسينا حلاوته مرارة ذلك الماضي المحزن الوبيل ..منتظر ذكرياتك..

يازيزو انتى عارفة الجلابية دى لغاية هسي محتفظ بيها يمكن تنفعنا بعدين لما تعملى الفرقة ونمشي نغني بيها فى دار فلاح Smile

طبعا الترزى ما عرف يتصرف كيف قال لى خلاص نرقعا ليك من تحت بى اى قماش أبيض قريب للون ده قدر ما فتش مالقي قماش ذى قماشي فى النهاية اتوكل ورقعا لى بى قماش أبيض وأنا يوم العيد كله ماسك جلابيتى من تحت وشايلة ذى ود الطهور عشان الرقعة ما تظهر Smile

سلاااا لكى كل الود ..
والله اسمك ده بذكرني زمان ونحن قاعدين قدام التلفزيون الساعة 7و45 منتظرين مسلسل الساعة تمنية دعاية سلاااا ياسلااا حلاوة حلاوة جوة الخرطوم برة السودان فى مدنى وكوستى وبورسودان جرب وشوف لف العالم زيها ابدا ما ح تشوف انتاج مامون اكيد مضمون لاشرقية ولا غربية حلاوة بلدى مية المية Smile

وسلااا منتدي شندي مية المية

شندي نهواها ونتنفسها ونستنشق عبير انفاسها فى كل الظروف هي ملاذنا فى الغربة وشوقنا نشتاق لها وهي معنا فى كل اللحظات نجدها باسمة يانعة مخضرة شامخة تنظر الينا وتبتسم لنا ولسان حالها يقول أرجع تعال عود لي ..ومنتظر رجوعك يا سلااا وتتحفينا بى ذكرياتك ولو اى واحد من المنتدي كتب لينا عن منطقته او الحي الهو عايش فيه ح نكون غطينا شندي كلها واتعرفنا على ملامحها وجزء نجهله منها ..

دمتى بكل الود..

عمتى قاعدة جنبى تنوم وتشخر وتصحي اها فتحت عيونا فى فترة كده قالت لي وصلنا وين قلت ليها نحن قدام معهد التربية اها عمتى دى طلقت ليك حسها وبقت تكورك الليلة وووووووووب يا حليلك ياحبيبة قساي قلت ليها من قبيل ما بتشخري قالت لي وقت وصلنا المعهد معناها وصلنا أهلنا ههههههههههههههه

دي اكيد شمامة ههههه ^^^^^

الماسي كتب:عمتى قاعدة جنبى تنوم وتشخر وتصحي اها فتحت عيونا فى فترة كده قالت لي وصلنا وين قلت ليها نحن قدام معهد التربية اها عمتى دى طلقت ليك حسها وبقت تكورك الليلة وووووووووب يا حليلك ياحبيبة قساي قلت ليها من قبيل ما بتشخري قالت لي وقت وصلنا المعهد معناها وصلنا أهلنا ههههههههههههههه

دي اكيد شمامة ههههه ^^^^^

ههههههههههههههههه الماسي والله قطعت مصارينى بالضحك انت منو ياشقي الحال Smile

والله كلامك ياأخ نزار جميل .
وانا داير اكتب عن زكرياتي في شندي الثانوية .
وهي طبعا مدرسة عريقة وكان ليها في يوم من الايام شنة ورنة اكتر من هسه.وكانت ضمن افضل 10 مدارس في السودان طوال فترة السبعينات والثمانينات من القرن الماضي وكان معظم الطلاب الممتحنين بدخلو الجامعات .وكتير ماكان اول الشهادة السودانية من مدرسة شندي ،لكن اشهرهم على الاطلاق كان هو الشهيد د.عوض عمر السماني من اهلنا ناس المسيكتاب .دا كان اكتر طالب عبقري في تاريخ مدرسة شندي ،بل يجوز علي نطاق السودان ،لانه عمل ارقام قياسية ليس من السهولة تكرارها ،فلم يحدث ان جلس لامتحان وجاء الثاني طوال حياته ،فكان اول الشهادة الاولية ،والمتوسطة ثم الثانوية على كل السودان.
وفي جامعة الخرطوم اول دفعته حتي التخرج ،ثم الاول في زمالة الجراحة وكان ظاهرة فريدة له الرحمة.

نحن جينا لمدرسة شندي ايام انتفاضة ابريل ،وكان للمدرسة انضباط شديد ،في الحضور والحصص والداخليات والمذاكرة وفي كل شئ.
كانت تضم نخبة من المعلمين ليس من السهولة ان تجتمع في زمان ومكان واحد،فعلى سبيل المثال في شعبة اللغة العربية مجموعة من الاساتذة علي راسهم استاذ الكتيابي(وماادراك مالكتيابي ؟)يدخل حصة البلاغة اوالمعلقة ولايحتاج الطالب الي مذاكرة الموضوع مرة اخرى ويحرص الطلاب من كل مدارس شندي لحضور محاضراته .ومعه من الاساتذة عبدالرحمن محمد خير(قوار) ومحمود عبدالرحمن.
شعبة التربية الاسلامية فيها أ.صغيرون ومولانا عبدالرحيم كان يدرس مادة التجويد ،والمرحوم الحاج عوض السيد،والرياضيات أ.عباس جتا ،وعوض الجيد وعوض ضحية وغيرهم.
الجغرافيا أ.محمد الحسن العبيد وحسين جغرافيا
اللغة الانجليزية فيها عبدالله المساعد والجمري ومستر جون وغيرهم.ويدرس مادة التاريخ كمبلاوي ،وشعبة العلوم كان فيها الاساتذة محمد العاقب ،امام الدين ،فائز المصري ،جيب الله ،احمد الفكي ،والفنون أ.عثمان فنون ..

كان ذلك عصر ذهبي والزمان غير هذا الزمان ،والطلاب مختارون من كل المدارس المتوسطة شرق وغرب النيل والنتيجة كانت ان دخل كل الفصل العلمي والادبي الجامعات الا من ابا .

فهل ياربي تعود مثل تلك الايام ام هي مستحيلة ؟

عندما اشتاق لشندى اجد الملاذ فى هذا البوست الرائع روعتك يانزار
كلمات تدخل جووه العصب وتستكين...
بدون مجاملة من اروع البوستات
تسلم على كل حرف سطرته وعلى اسلوبك الانيق فى تصوير زكريات يحملها اى فرد تربى فى حضن امنا الحنون شندى.

تخرييييييمة
الاخت ام احمد اتمنى ان نرى هذا البوست مثبت فى المنتدى العام حتى لايضنينا البحث عنه..

وشندى لما الشوق ينادى بتبقى يما وتبقى يابا

اتفقك معك اختى سلا فى ان هذا البوست من اجمل ما كتب فى المنتدى..ولعلك الآن تتفقين معى فيما قلته لك من قبل بأن نزار لو اراد ان يكتب بمزاج فلن يجاريه اى كاتب آخر..هذا البوست تحفة حقيقية واضم صوتى لك يا سلا بضرورة تثبيت هذا البوست لان الكثيرين لم يمروا عليه من قبل وانا منهم..وشكرا لكل الرائعين بالمنتدى...

كنت متأكدة ياحوذى ان كل الاعضاء الجدد مااطلعو عليهو فحبيت احييهو وانفض عنو الغبار ..
ونزار كاتب متميز ..نتمنى ان نرى الجديد والمزيد.

بصراحه بدت اقرأ في البوست دا وماقدرت اكمله لانو اثار فيني شوق لاينتهي وذكريات جميله وايام خالده
وحزن كبير على حالنا في الغربه
أخوي نزار خلينا مخدرين مابنقدر نستحمل

حبيبنا الغالي كبسوووور يسعد صباحك بكل الخير ..
كبسور والله بجد اسف اسف اسف انا طولت ما دخلت البوست
ده لانو كان أختفي خالص من البوابة وبارك الله فى أختنا الغالية
سلااااااااا في إحياء البوست ونفض الغبار وإستمتع معاك
بذكريات المدرسة العريقة الشامخة المتواجدة في أذهان كل من تخرج منها مدرسة شندي الثانوية وسيرة أحد طلابها النابغة الشهيد د/ عوض
عمر السماني لم نزامله ولكن صورته كانت دائما معنا وهي تزين مكتب مدير مدرسة شندي الأهلية المتوسطة وسيرته ونجاحه وإفتخار المدرسة به وكان مصدر فخر كل المدارس التي درس فيها ربنا يتقبل الشهيد قبولا حسنا ويدخله فسيح جناته مع الصديقين والشهداء ..

sala35 كتب:عندما اشتاق لشندى اجد الملاذ فى هذا البوست الرائع روعتك يانزار
كلمات تدخل جووه العصب وتستكين...
بدون مجاملة من اروع البوستات
تسلم على كل حرف سطرته وعلى اسلوبك الانيق فى تصوير زكريات يحملها اى فرد تربى فى حضن امنا الحنون شندى.

تخرييييييمة
الاخت ام احمد اتمنى ان نرى هذا البوست مثبت فى المنتدى العام حتى لايضنينا البحث عنه..

وشندى لما الشوق ينادى بتبقى يما وتبقى يابا

صديقتنا العزيزة سلااااااااا
شندي مدينة ضمتنا بكل حنان في حضنها الواسع
الذي ضم كل من سكن فيها باريحية وحب ولهفة ودفء
وأرضعتنا من ثديها الطيبة والحنان والجود والكرم
نشتاق لها في كل الأوقات وتشتاق لنا نجدها دائما
مبتسمة لنا ونبتسم معها نسرح معها بخيالنا ونتذكر
معها كل المناطق فيها كل الأركان وكل الأحياء
وكل الذكريات الجميلة التي اتحفتنا بها..
تسلمي ياسلاااااااا علي أحياء البوست ونفض الغبار
وأنا إن شاء الله سأواصل فى هذا البوست حتي نجد
مدينتا معنا فى كل الأوقات نشتاق لها ونجدها أمامنا
مخضرة زاهية شامخة عالية خفاقة فى سماء مدن بلادي ..

huthy2000 كتب:
اتفقك معك اختى سلا فى ان هذا البوست من اجمل ما كتب فى المنتدى..ولعلك الآن تتفقين معى فيما قلته لك من قبل بأن نزار لو اراد ان يكتب بمزاج فلن يجاريه اى كاتب آخر..هذا البوست تحفة حقيقية واضم صوتى لك يا سلا بضرورة تثبيت هذا البوست لان الكثيرين لم يمروا عليه من قبل وانا منهم..وشكرا لكل الرائعين بالمنتدى...

تسلم حبيبنا الدكتور علي الكلام الرائع
النابع من موطن الروعة ومصدر الإبداع
أنت من كانت أضافتك حقيقية للمنتدي
أنت من تنقلنا بين كلماتك الجميلة وعرفنا
ضهب الحلل ومشاهدك الرائعة التي تتحفنا بها
نحسها تمشي وتتحرك بينا نتخيلها معك بكل
أحساسينا يادكتور..
ربنا يوفقك محل ما تقبل وذى ما قلت ح تغيب عن المنتدي
لظروف ونتمنى بعادك ما يطوووول لانو ح يكون مكانك شاغر ياحبيبنا
نتمناك معنا دائما ..

عبدالعزيز محمد الحسن كتب:بصراحه بدت اقرأ في البوست دا وماقدرت اكمله لانو اثار فيني شوق لاينتهي وذكريات جميله وايام خالده
وحزن كبير على حالنا في الغربه
أخوي نزار خلينا مخدرين مابنقدر نستحمل

حبيبنا أبوفادي يسعد أيامك بكل السعادة ..
الشوووووق والشجن لايفارقنا نتمني من الله
إنو يرد غربتنا ويرجعنا لى أهلنا سالمين
ونعيش باقي أيامنا علي ضفاف شندي
ومع جناين شندي وفي قهاوي شندي
وفي سوق شندي اميييييين يارب ..

تخريمة ..
أم فادي طولت مننا بلغا سلامنا وقول ليها غيابك
طال إن شاء الله المانع خير ونتمناك طوالي معنا..

شكراً اخوي نزار على السؤال وإن شاء الله رسالتك حتوصل ونتمنى زيارتك لينا قريب

فعلا هذا احد البوستات المميزة التي نشم فيها ريحة جروف شندي ،ونفس شندي المحطة وتطوف بك من البعد في رحلة عبر الزمن على قهاويها ومدارسها وسوقها ،وكانك دخلت الاستاد وسمعت قفشات ابوالسعود وعرضة بلة ومكاواة الناس لملين وكاننا شاهدنا اسامة عجيب يرقص منتشي والاهلي عاصر النيل ،كل ذلك لان شندي مدينة لها طابع خاص لاتشعر به الا اذا كنت تتنفس هوائها وتشرب من مائها ،وطبعاً من شرب مائها مهما طال به السفر فهو حتماً عائد اليها .
واتمنى من اشراف المنتدى اختيار البوستات التي تحمل خصوصية لشندي وتثبيتها على واجهة المنتدى فهذه هي التي تميز منتدانا وماعداها من الوان المثاقفة يشابه غيرنا من المنتديات .
وشكرا لك الاخ نزار وذي ماقال حذيفة انت فعلاً سخيت للكتابة في هذا البوست ..

قهوة هبار ..

مكان جميل فى ركن من أركان سوق شندي مطلة على الطريق إلي نيل شندي ومشرع البنطون يحدها من الجهة اليسري مغلق عمنا الفاتح
أبوجوخ ومن الجهة اليسري دكان المرحوم إبراهيم صفايح صاحب أجمل وأنظف سيارة بيضاء ماركة الكرونا في مدينة شندي ربنا يرحمه ويدخله فسيح جناته مع الصديقين وأمامها كشك الدرديري للباسطة صاحب أشهر محل حلويات في مدينتنا الحبيبة وبالأخص حلاوة المولد وحصان وعروسة المولد..
تتكون القهوة من دكان 4 متر في 4 متر تزين جيدها صالة كبيرة واسعة تضم كل روادها بكل حنان وكل ثقافة وأدب في شكل L وكراسي خضراء اللون رمز للأزدهار وخضرة مدينتنا الحبيبة منسوجة بحبال مصنوعة من أشجار مدينتنا الشامخة وكنبة طويلة داخل القهوة خضراء اللون ولكنها كانت أفتح لونا من كنب المدارس..
رواد القهوة كانو من مثقفي المدينة الشعراء والأدباء وكانت ملتقي للفنانيين وكانت مكان حجز الفنان والإتفاق معه على الحفلة وكل التفاصيل المرتبطة بالحفلات وكانت بمثابة ميلاد الأغاني الجديدة وملتقي
للشعر والشعراء ..
صاحب القهوة عمنا حسن هبار ولكن من يعمل بها ويضم الناس فيها الحبيب عبده هبار صاحب الإبتسامة الجميلة التي لاتفارقه في كل الأوقات يساعده فى توزيع الشاي والقهوة شقيقه نقي الدواخل الشريف ويحكي لنا عبده إن هذه القهوة كانت قديما كالمحكمة تحل فيها كل المشاكل التي تعترض سبيل سعادة أهل شندي البسطاء كانو يجلسون فيها وينسون مشاكلهم تحت ظلالها يحتسون الشاي والقهوة وتحل المشاكل ويرجعون يبتسمون فرحون بما الت اليهم مشاكلهم بالحلول التي يتمنوها ..
كانت ملتقي لكل أبناء شندي الغائبين منها في موسم الأعياد يتقابلون
ويسالون عن بعضهم البعض يجلسون ويتذكرون الماضي ويحنون إلي جلسات السمر والإنس والثقافة والأدب وكانت محل إنطلاقة طلاب الجامعات للكورسات الصيفية وهم يمنون نفسهم بخدمة مدينتهم الحبيبة عليهم ولو بشئ بسيط ..
ولاتخلو القهوة من ظرفاء المدينة والقفشات والمواقف المضحكة التي تمر عليهم ومن الظرفاء ملين الذي يمر من أمام القهوة وتجد كل من في القهوة ينادون عليه ويسالونه عن حال فريقه وهو كان اكثر الناس حبا وولها لفريق النسر شندي لايرضي كلمة حتي لو يدخل نفسه فى شجار وعراك في سبيل معشوقه فريق النسر شندي صاحب الجولات فى المديرية الشمالية سابقا الي حدود دنقلا وصاحب الهتاف الذي يدوي في أذني حتي اليوم وهم يحملون كاس المديرية الشمالية
من فريق الدامر وهم يتجولون فى سوق شندي في مسيرة فرحة هادرة
(دامر دامر دمرناها شندي عزيزة ومثلناها ) تنزل دموعك في هذه الحظات فرحة بالإنتصار فرحة بعزة شندي وأهل شندي ومكانه شندي السامية فى كل مدن بلادي ..
قهوة هبار كانت تحوى كل ألوان الطيف السياسي فى مدينتنا الحبيبة كانت ملتقي للتشاور والتحاور كانت الإنطلاقة الحقيقية لكل الفعاليات السياسية والإجتماعية ربنا يمتع حبيبنا عبده هبار بالصحة والعافية التي
نتمناها له أطراف الليل واناء الليل من صميم فؤادي ..

تسلم حبيبنا أبوفادي وإن شاء الله ح امر عليك
فى اليومين الجاية حتي نرتب سويا الإحتفال
بالمنتدي ..

الله يخليك حبيبنا كبسور وأنت تتحفنا بمشاهد
من إستاد شندي والتنافس الشريف بين فرق المدينة
الغالية علينا جميعا ولايفارق خيالي مشهد أبوسوط
مشجع فريق ساردية وحاله الفرح التي يكون فيها
عندما تفوز ساردية وهو ينطط فرحا ويرقص منتشيا
بين كل مدرجات الإستاد ..
شكرا ليك حبيبنا كبسور وأنت تزين المنتدي بالمميز والمفيد
النابع من زول مبدع حد الدهشة ..

شندي الأهلية المتوسطة ..

تتكون مدرسة شندي الأهلية المتوسطة من أربعة أنهر المتنبي البحتري راشد والمعري الذي تحول في يوم من الأيام باسم نهر الشهيد عمر والشهيد عمر هو الطالب الشهيد / عمر حسب الرسول الذي كان يدرس في نهر معري وكان قدره الموت وهو يدافع عن حقوق المواطنيين فى فترة الأحزاب وغلاء المعيشة فى ذلك الوقت حتي وصل رطل السكر ثلاثة جنيهات حتي صار هتاف كل الطلاب وكل المواطنيين في وجه الشرطة التي تدافع عن النظام (يابوليس ماهيتك كم ورطل السكر بقي بي كم )والبوليس غير مبالي حوجة المواطن في ذلك الوقت حيث وصل الناس مرحلة شرب الشاي بالتمر والكرملة (تسحن حلاوة الكرملة سحنا دقيقا ثم تسكب على كفتيرة الشاي فياتي الشاي لاطعم له ولا رائحة) والالم والعذاب الذي يعيشة المواطن في صف العيش وانعدام الكبريت فزاد الالم زاد الشقاء وعندما ياتي مغترب من الخارج كانت هديته قيمة جدا ينظر لها كل الناس بكل الفخر والفرح هديتة كبريتة تتكون من 45 عود ثقاب في حساب 45 ولعة للبوتجاز يا هدية راقية جدا وهي زناد يتراقص معه من يهدي اليه طربا وفرحا حتي الثمالة ووصلنا مرحلة لكل بيت عدد إتنين علبة سجائر ماركة البرنجي في دكان التموين وعدد 7 خبزات من الفرن ..
فلم يرتضي الشهيد عمر لنفسه هذه الأشياء فقدم نفسه شهيدا للوطن مدافعا عن المواطنيين حالما بحياة كريمة عزيزة يعيشها كل من أحبهم من بعده فسال دمه علي قميصه يحمله أصحابه الطلاب علي أكتفاهم حتي فاضت روحه الي المولي عز وجل وصارت هذه الحادثة وصمة عار في تاريخ شرطة مدينة شندي وكان هذه اليوم أكثر ليالي شندي حزنا والما وشقاء وبعد كم يوم من هذه الحادثة تحول نهر المعري إلي نهر الشهيد / عمر حسب الرسول ربنا يرحمه ويدخله فسيح جناته مع الصديقين والشهداء ..
كانت حكم المدرسة حكم فيدرالي كل والي مسؤل عن نهره ويجتمع الولاة في مكتب مدير المدرسة بجانبه مكتب السيد الوكيل كان كل شئ منظم في المدرسة من طابور الصباح وفسحة الفطور التي كانت فترة أشد الما لمن يسكن بعيدا من المدرسة وكان إجباري أن لا يفارق المدرسة فى فسحة الفطور ويتناول الفطور داخل المدرسة الطلاب الذين يسكنون بالقرب من المدرسة كان لهم كرت يجب أن تبرزه أمام صول المدرسة وهو يقيف أمام الباب ممسكا بجزء من الباب بيده اليسري وسوط في يده اليمني ..
داخل المدرسة تحس أن الناس رقود وينعمون بنوم وثبات عميق لاحس ولا حركة كان طابور الصباح مميزا بالجمعية الأدبية وصوت الأستاذ/ النجاشي حسب الجابو ربنا يمتعه بالصحة والعافية والجمعية الأدبية كانت كل يوم على فصل من الفصول علما ان النهر الواحد يتكون من ثلاثة فصول ..
وفسحة الفطور كانت للنشاط الرياضي تجد من يلعب كرة السلة ومنهم من يلعب كرة الطائرة..
عندما ياتي الطالب الي المدرسة يكون في أشد الشوق لمادة اللغة الإنجليزية التي يدرسها لأول مرة في حياته وكان أسلوب أستاذنا ربنا يمتعه بالعافية عادل النقي مميز جدا وهي يمسك بيده الباب (زس از دور ) ويمسك الشباك (زس از وندو ) ثم يتحرك الركب الي خارج الفصل وهو يقيف فى حديقة المدرسة (زس از قاردن ) (زس از تري ) يرفع قلمة (زيس از بين ) ثم يرفع قلم الرصاص (زس أز بينسل ) هوووي ماتقولو ما كتبتها بالانجليزى مالك أنا طلعت من الإنجليزى بي وندو ودور وأى لوف يو واى ميس يو أونلي Smile

نواصل مع مدرستنا يا مدرسين يا معلمينا يامعلمين متشكرين ومقدرين
جرس الصباح لمن ضرب شايلين كتبنا والقلم نقول سلامنا للعلم على الفصول حالا ندور متشكرين ومقدرين ..
نعود ..

ياسلام عليك يانزار وفعلا المدرسة الاهلية لها تاريخ عريق وتستحق هذا التوثيق وياريت لو تعمل عنها حلقة تانية .
وجزاك الله خير لذكر فضل المعلمين وطبعا انا بعرف اكتر استاذ النجاشي ربنا يطراهو بالخير وفضله علينا كبير ، وطبعا اول يوم اتعين فيهو استاذ كانت بدايته في مدرسة الشقالوة المتوسطة قبل ثلاثين عام ومازلت اذكر اول حصة درسنا ليها في سنة اولى ،وهو لم يكن مجهولا لدينا في ذلك الوقت فقد كان لاعب كرة قدم مشهور ومدافعا صلبا في نادي النيل يخشاه المهاجمين في دوري شندي في ذلك العهد الذهبي في بداية الثمانينيات .وهو استاذ متميز في الفصل وأخ وصديق للطالب في المدرسة وخارجها وهو رجل وفي يحافظ على معرفته بطلابه ولاينساهم مهما طال الزمن ،ومازال عندما اقابله في شندي يحرص على السلام ومعرفة الاخبار وكلنا نحمد له ذلك وهو نموذج للاستاذ المثالي .ومتشكرين ومقدرين لكل اساتذتنا ولك اخي نزار .

شندي ماضي تليد وفجر جديد

شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد

رد: شندي ماضي تليد وفجر جديد