منتدي مدينه شندي
الف مرحب بك في منتديات مدينة شندي,الرجاء تسجيل الدخول ان كنت عضوا,أو يمكنك الذهاب لرابط التسجيل لكي نتشرف بك عضوا بيننا...
بحـث
 
 

نتائج البحث
 


Rechercher بحث متقدم

المواضيع الأخيرة
» تأكل
الجمعة 8 يونيو 2018 - 5:23 من طرف الحسين محمد

» نميري وقصص منسوجة
الخميس 7 يونيو 2018 - 12:38 من طرف الحسين محمد

» رحل كمال عليه الرحمة
الثلاثاء 5 يونيو 2018 - 7:00 من طرف الحسين محمد

» انا لله وانا إليه راجعون
الجمعة 25 مايو 2018 - 18:01 من طرف الحسين محمد

» رمضان مبارك
الخميس 24 مايو 2018 - 8:00 من طرف الحسين محمد

» إنا لله وإنا إليه راجعون
الأربعاء 28 مارس 2018 - 8:40 من طرف الحسين محمد

» تقبل الله منكم وعيد مبارك
السبت 24 يونيو 2017 - 9:43 من طرف الحسين محمد

» اللهم اغفر لهم جميعًا
الأحد 18 يونيو 2017 - 6:18 من طرف الحسين محمد

» رمضان مبارك
السبت 27 مايو 2017 - 14:20 من طرف الحسين محمد

» إنا لله وإنا إليه راجعون
السبت 27 مايو 2017 - 14:16 من طرف الحسين محمد

» مع النبيين والصديقين
الثلاثاء 4 أبريل 2017 - 11:13 من طرف الحسين محمد

» دعوة للتوثيق
الأحد 19 فبراير 2017 - 23:05 من طرف الحسين محمد

» إلى رحمة الله
الأربعاء 8 فبراير 2017 - 11:38 من طرف الحسين محمد

» نعوه أخًا
الأحد 29 يناير 2017 - 11:47 من طرف الحسين محمد

» رحم الله سيد
الثلاثاء 17 يناير 2017 - 10:44 من طرف الحسين محمد

» عائشة أبو السعود في رحمة الله
الأحد 8 يناير 2017 - 10:59 من طرف الحسين محمد

» مجازر نميري في الشجرة (1)
الأحد 8 يناير 2017 - 4:08 من طرف الحسين محمد

» حكمة اليوم
الإثنين 2 يناير 2017 - 5:25 من طرف الحسين محمد

» حكمة اليوم
الأحد 25 ديسمبر 2016 - 2:06 من طرف الحسين محمد

» ازيكم يا غالين
السبت 17 ديسمبر 2016 - 12:40 من طرف نزار الجمري

التبادل الاعلاني
احداث منتدى مجاني

المتواجدون الآن ؟
ككل هناك 2 عُضو متصل حالياً :: 0 عضو مُسجل, 0 عُضو مُختفي و 2 زائر :: 1 روبوت الفهرسة في محركات البحث

لا أحد

أكبر عدد للأعضاء المتواجدين في هذا المنتدى في نفس الوقت كان 34 بتاريخ الثلاثاء 7 يوليو 2015 - 13:13

البصيرة ام حمد

اذهب الى الأسفل

البصيرة ام حمد

مُساهمة من طرف نصرالدين حسون طة في الإثنين 12 أبريل 2010 - 20:25

المكان : غرفة قسم الحوادث بأحدى المستشفيات (الحكومية) بجمهورية )الأمازون) وتحديدا فى العاصمة )أمازونيا)
الزمان : الساعة 12 منتصف ليل الخميس ) أى خميس
الكادر 4 أطباء حديثى التخرج يعملون فى (نبطشية) الليل ( هيثم ، تامر ، رندا ، هاله(
على الرغم من أن (الدنيا آخر ليل) إلا أن المستشفى وخاصة قسم (الحوادث) يعج بالمرضى والمرافقين والذين إصيبو فى حوادث مختلفة ، يدخل مجموعة من (الناس) يبدو أنهم من عائلة واحدة وهم يضعون شاباً على (نقاله) قالت إحدى السيدات وهى تمسح الدمع من عينها تخاطب (دكتور هيثم(

- والله (عماد) أخوى ده عندو (نفسيات) ليهو مده عشان إتخرج ليهو (عشرة سنين) وما لاقى ليهو شغل .. والليلة دخلنا أوضتو لقيناهو حاول ينتحر !!
- حاول ينتحر بى شنو؟
- والله ما عارفنو بس لقيناهو كاضم جنس (الكضمة) دى !!
- طيب بس لو سمحتو تطلعوهو معانا فى (الكنبة) بتاعت الكشف دى عشان نكشف عليهو ؟
- (بعد أن تم وضع المريض) : خلاص بالله لوسمحتو بس زحوا لينا شويه من هنا
ثم بعد أن زح أهل المريض وقفت (مجموعة الأطباء) حوله :
- هسع (الشاب) ده نفوقو كيف؟ مفروض نعمل ليهو طبعا أول حاجه resuscitation يعنى إعادتو لوضعو الطبيعى
- يعنى كيف نرشو بى موية بارده ولا نشممو بصلة؟
- دقيقة النتذكر .. فى حاجه كده بسووها فى الحالات دى أدونا ليها فى سميستر 8 … و
- أنا ذاتى كنت متذكراها والله !!
- أنا بفتكر إنو نكسب الزمن ونتصل بى دكتور (كمال) الإستشارى
يمسك (هيثم) بالموبايل ويتصل :
- آلو دكتور كمال … إن شاء الله كويس يا دكتور
- الحمد لله ..(منزعجاً) معاى منو؟ فى شنو؟
- لا مافى حاجه يا دكتور .. معاك دكتور هيثم (الطبيب المناوب) فى قسم الحوادث
- إن شاء خير فى شنو عندكم؟
- والله يا دكتور عندنا حاله كده ما قدرنا نتعامل معاها
- حالت شنو يعنى؟
- والله يا دكتور عندنا مريض جابوهو لينا (كاضم) .. قالو كان عاوز ينتحر !!
- عاوز ينتحر بى شنو؟ صبغة؟ حبوب؟ شنو؟
- والله أهلو قالو بس كان عندو (نفسيات(
- ما طبعا عاوز ينتحر أكيد عندو )مشاكل ونفسيات) أنا بسأل عن طريقه محاولت الإنتحار كانت شنو؟
- والله يا دكتور مافى زول عارف!
- طيب ما تعملو ليهو (ريسسيتإيشن(resuscitation
- يا دكتور نحنا (الريسسيتإيشن) ده عارفنو لاكين بسووهو كيف؟
- معقولة إنتو ما عارفين تعملو للمريض (resuscitation) ؟ إنتو درستو فى الكلية شنو؟
- لكن يا دكتورالكلام ده درسناهو قبل 4 سنين عاوزنا نتذكرو هسع ؟
- طيب خلاص اعملو ليهو CPR ولا كمان ما عارفنها برضو؟
- هو أنخنا عرفنا ديك يا دكتور عشان نعرف دى ؟ كدى دقيقه يا دكتور
يلتفت إلى (هاله) هامسا :
- إنتى يا دكتورة (هالة) بتعرفى تعملى CPR
- دى مش بتاعت الزول (يضغطو) ليهو (صدرو) ويعملو ليهو (تنفس) ديك !!؟
- هو يعنى أنا عارف ؟؟ كدى نسأل ونتأكد من دكتور (كمال(
يمسك بالموبايل مجددا :
- يا دكتور والله ذى الإتذكرتها ، الـ CPR دى مش بتاعت الزول (يضغطو) ليهو ) صدرو) ويعملو ليهو (تنفس) ديك !!؟
- أيوااا عليك نور
- طيب يا دكتور خلاص شكرن ليك كتير !!
- (هيثم يلتفت نحو البقية) :- يلا خلاص نعمل للشاب ده الـ CPR القالا دكتور (كمال) دى !!
- إنتى يا دكتورة (رندا) أمسكى (الضغط) وإنتى يا دكتورة (هاله) أضغطى على (الصدر) وإنت يا دكتور (تامر) دخل ليهو الأنبوبة
- وإنت سعادتك ح تقعد متفرج مش كده ؟
- لا أنا ح أمشى أجيب ليا ليهو مهدئ !!
(تامر) يحاول إدخال الانبوب فى فم المريض وينفخ وفى كل مرة يكتشف أنه ينفخ فى المعده وليس (القصبة الهوائية) فيخاطب (رندا(:

- كدى بالله أمسكى ليا حنك الزول ده كلما أمسكو (يتزلق) منى – ثم فى ضجر- هو بالله ما لقى يحاول ينتحر إلا فى (نبطشيتنا) دى !!
- أها كده يا (رندا) الأنبوبة دخلت .. كدى يا (هاله) أمسكى ليهو (النبض) شوفيهو ح يطلع كم؟
- لكن يا (تامر) أنا ما بتذكر الطريقه البيقيسو بيها (النبض) .. غايتو بتذكر إنو فى طريقه كده الزول بيعرف بيها إنو (الدقيقه) أنتهت .. حاجه كده ذى.. ون.. تو .. ون .. تو .. ون .. تو
- (فى تبرم) : إنتى قايله نفسك فى إختبار ما تعملى أى حاجه وتخلصينا !!
- عليكى الله يا (رندا( بتتذكرى زمان قالو لينا لمن نجى ناخد (النبض) بنقول شنو؟
- أفتكر إنو مفروض (تدقى) التربيزه كده (وهى تشرح لها عملياً) : .. ون ..طق .. إتنين … طق … تلاته .. طق لحدتما تحصلى (60 طق) تكون الدقيقه كملت !!
-(فى تبرم شديد) : طق .. بق … بس خلصونا !!! – ثم فى زهج- هو بالله الزول ده ما لقى يحاول ينتحر إلا فى (نبطشيتنا) دى !!
فى هذه الأثناء يدخل (هيثم) يحمل فى يده (حقنه) :

- زحو زحو يا شباب .. أنا حاصحيهو ليكم أنا جبت ليهو حقنت (بيثيديين pethedine- (الممرضه تلحق به قائلة : لا.. لا .. يا دكتور
- مالك فى شنو؟
-( البيثيديين) ده يا دكتور (مسكن للألم( وهو يا دكتور ما عندو ألم هو عندو (كوما) دلوقتى
- يعنى شنو؟
- يعنى الزول ده كده ما محتاج هسع لى (البيثيديين) ده وإحتمال يعمل ليهو (مضاعفات) عشان هو فاقد الوعى !
- والله الممرضه دى شكلها كده فاهمة ِأكتر مننا حقو نخلى ليها الكيس case ده يا (هيثم) ونخارج روحنا من الموضوع
- على كيفكم خلوهو ليها
-( يلتفت للممرضه) : خلاص أنا ما ح أديهو حقنت (البيثيديين) إنتى شوفى تديهو شنو؟
- خلاص يا دكتور أكتب ليهو أدميشن (تنويم) عشان نوديهو نرقدو فى العنبر بعدين
(فى هذه الأثناء يدخل شرطى وهو يمسك فى يده ببعض الأوراق( :

- الزول العاوز ينتحر ده جاكم هنا !!
- يجينا كيف يعنى وهو كان عاوز ينتحر؟
- لا أنا بقصد جابوهو ليكم هنا
- أيوه
- طيب ليه ما حولتوهو لينا عشان نعمل ليهو أورنيك 8
- نحول ليهو شنو ؟ هو كاضم وفى غيبوبة !!
- خلاص لمن يصحى نحنا عاوزنو عشان نفتح ليهو )بلاغ إنتحار) !

الساعه الواحدة والنصف :

يدخل شاب فى العشرين من العمر وهو يتكئ على رفيقه وما أن يصل إلى حيث يجلس دكتور (هيثم) حتى يبادره :

- لو سمحت يا دكتور أنا عندى جرح فى رجلى وجيت أمبارح هنا لقيت الدكتور الكان (مناوب) أمبارح وقام طهر لي الجرح وأدانى حقنة ولف ليا الجرح بى قطن وشاش وقال ليا تعال لينا بكرة عشان نغير ليك ونديك حقنة تانى ؟
- طيب أنادخلني شنو؟ انا قلت ليك تعال يعني
- لا ما هو أصلو الـ
- عارف عارف عاوز تقول ليا الدكتور الأمبارح وشنو وشنو مش كده ؟ بس أنا بفتكر بدل التلتلة دى والتعب ده كان تمشى أى مستوصف من المستوصفات الكتيرة المالية الدنيا دى يغيرو ليك ويدوك الحقنه !!
- لا أنا جيت هنا عشان عندكم قسم للسكرى!!
- والسكرى دخلو شنو؟
- ما لأنو أنا عندى سكرى !!
-(هيثم) ينادى البقية .. يقفون حوله فى شكل دائرة يتهامسون ثم يتجه هيثم للشاب مرة أخرى :
- كدى ورينا الجرح ده (يفك الشاب الأربضة والشاش ويريه الجرح(
- عندك (سكرى) ومجروح قدر ده ؟ ما بالغت عاد لكن؟
- هسع يعنى نعمل ليك شنو؟
- حقو نتصل فى دكتور (كمال) الإستشارى
- ح يكون نائم يا (هيثم) ح تزعجو ساكت !!
- طيب نسوى شنو؟ ما لازم نتصرف ؟
- قول ليهو تعال لينا باكر !!
-(يلتفت إلى المريض آخذاً بنصيحة رندا) : لو ممكن بس تجينا بكرة ؟
- أجيكم بكرة دى شنو أنا عاوز (أفصل بنطلون)؟ ما تغيرو ليا وتدونى (الحقنة) هسع وتخلونى أمشى
- لكن ..
- لكن شنو هى عمليت (قلب مفتوح) ما نضافة وحقنة !
- طيب بس ممكن دقيقه ؟ - ثم يلتفت نحو البقية - :
- شوفو يا شباب أنا أول مره أشوف ليا مريض سكرى عندو جرح وما إتعاملت مع case ذى ده قبل كده و
- والله أنا ذاتى !! لكن بفتكر مفروض نعمل ليهو CPR
- أنا بفتكر قبلما نعمل ليهو CPR حقو نتصل بى دكتور (كمال) الأستشارى
-(يمسك بالموبايل ويتصل):
- معاك دكتور هيثم يا دكتور
- أهلا
- والله يادكتور اولا اسفين على الازعاج
- لا مافى ازعاج دى الساعة لسه (بدرى) بعد (نص الليل)!
- يادكتور والله الحقيقة جانا مريض بيقول انجرح امبارح وجا هنا وعملو ليهو نضافة وأدوهو حقنه مع ملاحظة إنو عندو سكرى !
- وإنتو عملتو ليهو شنو؟
- والله يا دكتور لسه ما عملنا ليهو حاجه لكن قلنا نشوف رائك عشان عاوزين نعمل ليهو CPR ؟؟
- (يهتاج) : معقوله بس ؟؟ الراجل جاييكم بى كرعينو لحدت عندكم تعملو ليهو CPR ؟؟
- يعنى ما نعملا ؟
- أكيد !!
- هيثم يضع الموبايل فى جيبه ويخاطب تامر:
- هسع يا (تمورى) –إسم الدلع- نعمل للزول ده شنو؟
-(تامر يلتفت للمريض( : إنت يا أبو الشباب امس كنت واعى) لمن جيت للحوادث هنا؟
- أيوه (واعى) يعنى جيت (سكران) ؟
- لا ما اقصد كده؟ يعني شفتهم وسمعتهم وهم بيعالجو فيك ؟؟
- أيوه طبعاً
- حلو .. حلو جداً
-( إستغراب): هو شنو الحلو؟
- حلو لأنو أكيد تكون سمعت الدكتور قال ليك عندك شنو؟
- كيف يعنى ؟
- لا.. لا خلاص إتذكرت (مخاطباً هيثم( إنت يا (هيثومى) شنو إسم المرض البجى مع الجروح لمن تكون (وسخانه) وما نضيفة وكده ؟ - مواصلا- تتذكر أدانا ليهو (بروفيسور سعيد) فى سميستر 6 !!
- أيوه بتذكر إسمو إسمو … أيواا لقيتو !! إسمو (الكزاز)!!
- نو .. نو.. نو.. أنا عاوزو (إن إنجلش) – يعنى بالإنجليزى- !!
- دقيقه إتذكرو ليك … حاجه كده ذى (تايتانيك) !! أيواا إفتكر حاجه كده آخراها (أوس) أتيااتيتوس تيانييييكوس … تيتانيسيس … أيواا … عرفتو … إسمو (تيتانوس)
- طيب بتتذكر علاجو شنو ؟
- شنو البعرفنى؟؟ يعنى عاوزنى أعلرف إسمو وكمان أعرف ليك علاجو ؟
- أكيد غايتو يكون مضاد حيوى .. بس ما متأكد
- أها يعنى هسع نعمل شنو؟
-(هيثم وهويلتفت للمريض) :
- شوف يا أبو الشباب إنت امس شفتهم وهم بيدو فيك الحقنه … صاح؟؟
- صاح
- جميل .. طيب تعال معايا (ياخذه لدولاب الادويه) : مابتتذكر أدوك ياتو نوع من الحقن دى؟؟ كدى حاول تتذكر على مهلك نحنا ما ورانا حاجه
- (فى زهج) : لكن انا الوراى حاجه .. هو ده طب ولا (شختك بختك) .. خلونا بالله دكاترة آخر زمن .. مع السلامه !!

الساعه 2 وربع :

الممرضة تجرى داخلة يا دكتور حصل دكتورة (منال) بتاعت (النساء والولاده) على التلفون .. يذهب (هيثم) ليكلمها على (التلفون الثابت) ثم يعود بعد دقائق :
- يا شباب دكتورة (منال) بتقول عندها حاله مريضة انخفض ضغطها الى 50/120 وعاوزة واحد مننا يمشى ليها فى العنبر الراقده فيهو عشان يكشف عليها لأنها هى مشت البيت الليلة بدرى عشان عندها ظرف – متسائلاً - أها منو اليمشى يشوف المريضة دى؟
-(كلهم بصوت واحد) : أمشى إنت!!
- أنا شنو ؟ والله أنا ما بكره ألا قسم (الجاينا) – يعنى النساء والولاده- !! – مواصلا- أمشى إنت يا (تامر !(
- والله أنا (الجاينا) دى نجحت فيها يا الله يا الله !! بعد ما روحى طلعت !! شوفو ليكم زول تانى !! -مواصلاً – أنا بفتكر طالما القصة قصة (جاينا ونسوان) وكده حقو تمشى ليها (هاله أو رندا)!
- انا امشى وكمان عند (دكتورة منال) ؟؟ إنتو ناسين إنها سقطتنى تلاته مرات فى إمتحان (الجاينا) والله أنا (مكجناها) ولا بمش لا حاجه !! شوفو (رندا !(
- والله يا جماعة أنا ما ناقشة أى حاجه فى (الجاينا) لو بس كنت أعرف أى حاجه ما بتفرق معاى كان مشيت ليكم عادى كده والله!!
- شوفو يا جماعة (دكتورة منال) عاوزة زول يساعدا … صاح؟)

-(الجميع) : صاح
- والزول المفروض يساعدا مفروض يكون أكتر زول فاهم فينا …صاح؟
-(الجميع) : صاح
- خلاص أنا بفتكر نرسل ليها عشة الممرضه
- (كلهم بصوت واحد) : عشة الممرضة ؟؟؟؟؟؟؟!

الساعه 3 صباحاً :

يدخل إلى غرفة الحوادث أشخاص يحملون شخص يسيل الدم من رأسه بغزارة وهو يتأوه بصوت عال يبدو أنه مصاب فى حادث ، تشير إليهم (الممرضة) ليضعونه على (كنبة) الكشف ، ينظر (هيثم) للبقية كيما ينهضوا لمباشرة الحاله :
- يلا يا جماعة نشوف الزول ده الحاصل ليهو شنو باين عليهو (حالتو صعبة) !! – مواصلاً - لازم نسوي لينا خطة عمل نوزع فيهاالادوار علشان ننقذو باسرع مايمكن ….
- خلاص انا مهمتي اسجل البيانات بتاعتو وانتو عليكم الباقى
- لا بالله يا شيخ … شلت أسهل حاجه !!
- خلاص واحد يسجل البيانات وواحد يعمل ليهو CPRوواحد يوصل ليهو IV line) درب تغذية) وواحد يجهز ليهوالادويه وواحد يسوي ليهو فحص سريري!
- خلاص بس أنا بعمل ليهو الفحص السريرى !!
- لا .. (أنا ورندا) النعمل ليهو (الفحص السريرى)
- شوفو يا شباب وكت كلنا عاوزين (الفحص السريرى) ده أيه رايكم نعملا بالقرعة ؟ - يبدأ بتقطيع الورقه التى فى يده إلى قطهع صغيرة يكتب عليها ثم يرمى بها على الطاوله ثم يأخذ كل فرد ورقه

-( رنده وهى تنطط) : وووى …ووووى أنا ال ح أعمل الفحص السريرى ثم تتجه نحو المريض الذى يئن بصوت عال
-(الممرضة):المريض ده لازم تدوهو (محلول) حالا لأنو نزف دم كتير
- محلول شنو ؟ محلول الجفاف ؟
- والله ما عارف ؟ حقو نتصل على دكتور( كمال ) نسألو !!
- يا جماعه دكتور (كمال) ده ما جنناهو جن حقو نشوف لينا دكتور تانى نتصل عليهو؟
- هو مش رئيس الوحده بتاعتنا ؟ خلاص يستحملنا !! وبعدين هو زول كويس وما بزعل مننا
- خلاص كان كده إتصل أسألو
-(هيثم يمسك بالموبايل ثم بعد عدة دقائق يرد) :
- عندكم شنو كمان تانى ؟ كرهتونا الطب ذاتو!!
- معليش يا دكتور
- معليش شنو؟ أنا هسع ما ذى الشغال سادى خدمه معاكم !!
- معليش .. يا دكتور بس آخر مرة !!
- طيب فى شنو؟
- والله يا دكتور (كمال) جابو لينا مريض عامل ليهو حادث حركة ومدشدش كلو ونازف دم كتير .. عملنا ليهو اللازم لكن بس ما عارفين نديهو ياتو محلول؟
- كمية الدم النزفها قدر شنو؟ ليتر ولا ليترين ولا كم يعنى؟
- بتبالغ يا دكتور لكن يعنى ؟؟ نعرفو كيف بس ؟ - بعد تفكير- قول كده 4 لترات !!
- إنتو يا إبنى إتخرجتو كيف؟ كان نزف 4 لترات كان مات زماان !!
- والله يا دكتور لى هسع بيكون فات الأربعه لتر
- ليه ؟ ما وقفتو ليهو النزيف؟
-(وهو يبتعد عن صراخ النساء الذين يبكون على المريض الذى أخرج الروح)

- لا ما قلنا قبلما نتصرف برانا أول حاجه نسألك يا دكتورنديهو ياتو محلول ؟ .

الساعه 4 وربع صباحا :

يدخل رجل يحمل بين يديه طفل صغير يمدده على التربيزة التى يجلس عليها (الدكاترة) :
- لا بأس عليه يا حاج عندو شنو؟ مالو؟
- كان نائم قام وقع من (العنقريب)
- (رندا وهى تلتفت نحو هاله) : (العنجريب) ده مش الحاجه البتشبه السرير دى ؟
- أيوه بس ما عندو راسين بالجنبات
- (هيثم يرفع الطفل ويلاحظ أن أحدى رجليه بها إنثناء) : طيب يا شباب لما نشتبه إنو فى زول رجلو مكسورة شنو الخطوات البنعملا ؟
- والله غايتو بتذكر إنو أول حاجه لازم نعمل ليهو صورة بالاشعه
- أها وبعدين؟
- نقوم نديهو مسكن للألم
- وبعدين؟
- نشوف تاريخو المرضى يعنى الـ History بتاعو
-(هيثم وهو يخاطب والد الطفل) طيب على كده خلاص يا حاج شيل الورقه دى وأمشى أعمل لينا صورة بالأشعه لى كراع الود ده !!
-(يخرج والد الطفل لعمل الأشعه بينما يخاطب هيثم البقية) : كدى قبل الراجل ده ما يجيب أشعت ولدو منو البعرف يعمل (جبيره) فيكم ؟
- والله النصيحة أنا قبل كده ما عملتها والكسور دى فى الرياضيات ما بدورا ولا بحبها !!
- والله أنا لمن الدكتور شرحا لينا أنا كنت (داكه) المحاضرة العملى ديك لأنى كنت فى (عرس) ناس )نانسى) صاحبتى
- وإنت يا (تامر) ما بتعرف تعملا ؟
- والله أنا الجبس ده ما بدورو لأنو بيعمل ليا حساسية فى الجيوب الأنفية وغير كده أنا ذاتى ما بعرف أعمل )الجزيرة) ولا الإسمها شنو دى !!
- طيب هسع وكت نحنا كلنا ما عارفين نعمل شنو؟ الراجل ده هسع بجينا !!
- دى عاوزة ليها نعمل شنو؟ ما تتصل بى دكتور (كمال) هو فى غيرو ؟
- (هيثم يمسك بالموبايل ويتصل) : معليش يا دكتور والله بس آخر مرة
-(فى تبرم وزهج) : يا إبنى إنتو طلعتو (عين أهلى) معقول بس كده ؟؟
- معليش يا دكتور والله ما عندنا غيرك !!
- أها مالكم ؟
- والله يا دكتور عندنا طفل شاكين إنو كراعو فيها كسر وحولناهو الأشعة عشان يعملو ليهو صورة وقلنا قبل أهلو ما يجيبو النتيجه نتصل بيك عشان نعرف كان طلع كسر نعمل ليهو (الجبيرة) بتاعت الجبس كيف؟ وبعدين نحنا ذاتو ما عارفين نعملا ليهو immediately ولا نصبر شويه؟
- إنت يا إبنى منو القال ليك أنا دكتور (عظام)؟ إنت ما عارف إنى (باطنية)؟ إتصل فى دكتور )عبود) بتاع العظام الله لا عظم أجرك !! الواحد ما قادر يرتاح معاكم !!

الساعة 5 صباحا :

تدخل إلى غرفة الحوادث إمرأة تحمل في يديها طفلة لا تتجاوز التسعة أعوام يبدو عليها علامات الأعياء .
- والله يا دكتور البت ما خلتنا ننوم من (الحمى) .. جسمها ده ذى (الصاج)

- طيب يا حاجه هسع نكشف عليها ونوريك الحاصل
يضعها الجميع على (طاولة الكشف) .. قام (هيثم) بقياس (الحرارة) طلب منها (تامر) أن تفتح (فمها) .. قامت (رندا) بالكشف على بطنها وصدرها بالسماعة .. قامت (هالة) بقياس (النبض) .. ثم بدأوا يتحدثون تارة بالعربية وأخرى بالإنجليزيه وهم يشخصون الحالة ثم يتفقون على نتيجه يبلغها لها دكتور (هيثم(

- والله يا حاجه بتك دى (اللوز( بتاعتا (ملتهبه) ولازم نشيلا ليها
- لكن يا أولادى (اللوز) دى ما شيلناها ليها زمان .. نشيلا ليها تااااانى

كسرة :
حكايت (اللوز) دى حقيقية

نصرالدين حسون طة
شنداوي مشارك
شنداوي مشارك

ذكر عدد المساهمات : 15
تاريخ التسجيل : 09/04/2010
العمر : 57
الموقع : الولايات المتحدة- ولاية Minnesota

الرجوع الى أعلى الصفحة اذهب الى الأسفل

رد: البصيرة ام حمد

مُساهمة من طرف أم احمد في الثلاثاء 13 أبريل 2010 - 5:56

شكراً نصر الدين حسونة .. المقال للكاتب الفاتح يوسف جبرا .

تذكير: نرجو من الأعضاء الإنتباه لذكر أسم الكاتب أو الموقع الذى تم منه النقل حفظاً للحق الأدبى.
avatar
أم احمد
مشرف عام المنتديات المتخصصة
مشرف عام المنتديات المتخصصة

انثى عدد المساهمات : 1311
تاريخ التسجيل : 08/08/2009
الموقع : السعوديه - جيزان

الرجوع الى أعلى الصفحة اذهب الى الأسفل

رد: البصيرة ام حمد

مُساهمة من طرف زيزو في الثلاثاء 13 أبريل 2010 - 10:49

التحيه لك نصرالدين00والتحيه الخاصه للكاتب الساخر والمبدع00الفاتح يوسف جبرا00

الكلام القالو ده كله صاح00ولو إنو فيه مبالغات شويه نظام سخريه وكده00
لكن دي حاجه شفتها بي عيني وعشتها00وأحكي ليكم موقف حصل معاي شخصياً00وفي مستشفى الحوادث نفسه00
كنا في إجازه (بالعاصمه المثلثه ) السنه الماضيه00ونسبه لتغيير الجو 00أُصيبت بنتي الصغرى ذات السنتين بحمى شديده لم تفلح معها خافضات الحراره المعتاده00فذهبنا بها لأقرب مستشفى لنا وكان ( مستشفى إبن خلدون ) قلنا يسعفوها لينا سريع00المهم لقينا في الطوارئ طبيب لا يصلح أن يُطلق عليه أو أن يعطى شرف هذه المهنه00المهم وريناه حالتها فعاين ليها ولم يكلف نفسه بأن يكشف عليها حتى00وقال أقرب مستشفى هنا ا( حوادث الأطفال ) فأحسن تودوها هناك00مشينا بيها ونحنا دايرين نفرطق بالغيظ والبنت قربت تتشنج00مشينا الحوادث00وفعلاً لقينا نفس الصنف اللي بيحكي عنه جبرا00
لقينا ( أطباء إمتياز ) ( حناكيش ) وده اللقب المفروض يطلق عليهم مش ( أطباء )واحده كده ( حنكوشه ) المهم شافتها والمفروض أول حاجه تسعفها وتنزل ليها حرارتها دي00لأبدت في أسئله طويله عريضه ماليها آخر وحتى الحراره ماقاستها ليها والبنت خلاص متضايقه وبدت تستفرغ00وهي لسه شغاله تسأل00وطبعاً نحنا خلاص فاض بينا00المهم طولت عليكم00طبعاً ماعملوا ليها حاجه00غير قالت لينا أفحصوا ليها الملاريا00وعشان إستفرغت قدامهم أدوها إبرة إستفراغ والحراره المولعه الجايين عشاناها ما أدوها ليها حاجه00طلعنا نشعلل نار منهم بالخصوص أنا وبديت أنقنق 00المهم مشينا بيها البيت وأسعفناها برانا بالإستحمام والتحاميل يحدي الصباح مشينا بيهالإستشاري أطفال لاحظوا ( إستشاري ) وكنا طبعاً فحصنا ليها الملاريا وطلعت مافي00وبالرغم من ده الإستشاري كتب ليها حقن ملاريا 00ومضاد حيوي وأدويه كتيره جداً00لأنه الحمى شديده وما إستجابت لخافضات الحراره 00فعمل ليها بما يسمى ( المظله )بمعنى إنو يديها علاج لكذا حاله مع بعض واللي يصدف إنو يعالج الحاله00ويضرب يكون هو العلاج المناسب00المهم نومناها في ( إبن خلدون ) وأديناها العلاج من حقن ملاريا00لي حقن مضاد00لدربات00وتعبنا شديد00المهم إنو ( المظله نجحت ) والبت فتحت عيونها والحمدلله00لكن مأساه عشناها00
فأنا من هنا بحيي الكاتب الناجح جداً الفاتح جبرا00وبديه شهادة أفضل وأحسن وأمثل(كاتب وصحفي سوداني ) 00على رأي مصطفى الآغا 0
وده حال السودان00ماشي بالبركه ساااااي00والفوضى في كل شئ هي السمه السائده فيه للأسف00
avatar
زيزو
مشرف عام حواء شندي
مشرف عام حواء شندي

انثى عدد المساهمات : 687
تاريخ التسجيل : 03/01/2010
الموقع : المملكه العربيه السعوديه /الرياض

الرجوع الى أعلى الصفحة اذهب الى الأسفل

رد: البصيرة ام حمد

مُساهمة من طرف نصرالدين حسون طة في الخميس 15 أبريل 2010 - 20:39

انا اسف جدا ويجب علينا الحفاظ على حقوق الغير وواللة انا ذاتى ماعارف انو الموضوع كاتبة الفاتح جبرة ولكن انا ارسلتة لكم حسب ما وصلنى من احد الاصدقاء للتعميم ولكنى اعد بتوخى الدقة مستقبلا لكم الشكر واكرر اسفى

نصرالدين حسون طة
شنداوي مشارك
شنداوي مشارك

ذكر عدد المساهمات : 15
تاريخ التسجيل : 09/04/2010
العمر : 57
الموقع : الولايات المتحدة- ولاية Minnesota

الرجوع الى أعلى الصفحة اذهب الى الأسفل

رد: البصيرة ام حمد

مُساهمة من طرف كبسور في السبت 17 أبريل 2010 - 18:38

ياجماعة انا شايفكم حملتو علي الاطباء لكن حقو تعرفو الحاصل شنو:
المشكلة مافي الطبيب ولا طالب الطب في السودان
الشاهد في ذلك انو كل طلاب الطب في السودان بدرسو منهج حسب المعايير العالمية وشهادة البكالريوس السوداني معترف بهامثلا في بريطانيا وايرلندا وغيرها .

ونفس هولاء الخريجين بمتحنو كل الزمالات الاجنبية وبنجحو ودائما مركز الخرطوم في الزمالة البريطانية(امتحان الكلية الملكية )بطلع في ترتيب متقدم عالميا.
ونفس هولاء الاطباء عندما يعملو خارج السودان بتميزو.والدليل ان المملكة العربية السعودية خلال الشهور الماضية فقط اتعاقدت مع الاف الاطباء العمومين.

طيب المشكلة وين ؟؟

المشكلة في الدولة ونظام الخدمة المدنية في السودان
انهارت الممارسة الطبية في السودان عندما انهار فيهو كل شئ ولم يفشل الطبيب .
فهويعمل من غير معينات كافية حتي في المستشفيات المركزية .

والاستشاري الذي اعطي الطفل يااخت زيزو كوكتيل معذور لانو لو طلب الفحوصات ماحاتجي بي سرعة ولو جات مافي ضمان تكون صحيحة .
انهار تدريب اطباء الامتياز والنواب في السودان لان الدولة مادايرة تخسر قروش لاقامة الاخصائيين بالمستشفيات فهربو لعياداتهم الخاصة .

هل تعلمي يا أخت زيزو ان العامل في وزارة الطاقة او التصنيع الحربي بصرف قدر 5 استشاريين في وزارة الصحة ؟؟
هل تعلمي ان الفاقد التربوي الذين استوعبو كمنسقين للدفاع الشعبي والخدمة الوطنية الواحد فيهم بصرف مايعادل 10 اطباء امتياز ؟؟

الدعوة موجهة للجميع للدخول لصفحة نواب الاخصايين (علي الفيس بوك )وحاتسمعو وتشوفو العجب ..

هذا جزء قليل من الظلم الواقع على الاطباء في السودان .

رمانى في اليم مكتوفا ثم قال لي اياك اياك ان تتبلل..




 
avatar
كبسور
مشرف المنتدي السياسي
مشرف المنتدي السياسي

ذكر عدد المساهمات : 228
تاريخ التسجيل : 05/04/2010
الموقع : Misurata Libya

الرجوع الى أعلى الصفحة اذهب الى الأسفل

رد: البصيرة ام حمد

مُساهمة من طرف د.عوض محمد الخضر في الثلاثاء 20 أبريل 2010 - 18:41

رمانى في اليم مكتوفا ثم قال لي اياك اياك ان تتبلل..حكمة بليغة
وسلمت يداك بما كتبت يا ام احمد لانصاف قبيلة الاطباء
وللاسف كل السخرية والمهذلة التي يلاقيها اهلنا الغلابة من متلقي الخدمات الصحية باقسام الحوادث الحكومية حاصلة للاسف الشديييييييييييييييييييييييييد وكلامك صح 100% اخت أم احمد بس برضو تدني مخرجات التعليم في جامعاتنا في السنوات الآخيرة بصفة عامة في جميع المجالات وفي مجال الطب بصفة خاصة
وصحيح في حناكيش عايزين يبقو دكاترة وبس وبي فلوسهم؟؟؟ونتمني الضميريصحي لما الواحد يتعامل مع ارواح البني آدميين
والله المستعان ويشفي الجميع
avatar
د.عوض محمد الخضر
شنداوي مميز
شنداوي مميز

ذكر عدد المساهمات : 228
تاريخ التسجيل : 26/08/2009
العمر : 44
الموقع : http://profshendi.blogspot.com/

http://profshendi.blogspot.com/

الرجوع الى أعلى الصفحة اذهب الى الأسفل

رد: البصيرة ام حمد

مُساهمة من طرف أم احمد في الثلاثاء 20 أبريل 2010 - 18:55

د.عوض محمد الخضر كتب:رمانى في اليم مكتوفا ثم قال لي اياك اياك ان تتبلل..حكمة بليغة
وسلمت يداك بما كتبت يا ام احمد لانصاف قبيلة الاطباء
وللاسف كل السخرية والمهذلة التي يلاقيها اهلنا الغلابة من متلقي الخدمات الصحية باقسام الحوادث الحكومية حاصلة للاسف الشديييييييييييييييييييييييييد وكلامك صح 100% اخت أم احمد بس برضو تدني مخرجات التعليم في جامعاتنا في السنوات الآخيرة بصفة عامة في جميع المجالات وفي مجال الطب بصفة خاصة
وصحيح في حناكيش عايزين يبقو دكاترة وبس وبي فلوسهم؟؟؟ونتمني الضميريصحي لما الواحد يتعامل مع ارواح البني آدميين
والله المستعان ويشفي الجميع

أخى العزيز عوض محمد الخضر .. الخيل تجقلب والشكر لحمّاد ..إحقاقاً للحق انا لم أكتب مما ذكرت شيئاً وأعتقد أنك تقصد مشاركة أخونا كبسور ، لكما التحية.
وتعظيم سلام لأطباء بلادى .
avatar
أم احمد
مشرف عام المنتديات المتخصصة
مشرف عام المنتديات المتخصصة

انثى عدد المساهمات : 1311
تاريخ التسجيل : 08/08/2009
الموقع : السعوديه - جيزان

الرجوع الى أعلى الصفحة اذهب الى الأسفل

رد: البصيرة ام حمد

مُساهمة من طرف د.عوض محمد الخضر في الأربعاء 21 أبريل 2010 - 15:06

أم احمد كتب:
د.عوض محمد الخضر كتب:رمانى في اليم مكتوفا ثم قال لي اياك اياك ان تتبلل..حكمة بليغة
وسلمت يداك بما كتبت يا ام احمد لانصاف قبيلة الاطباء
وللاسف كل السخرية والمهذلة التي يلاقيها اهلنا الغلابة من متلقي الخدمات الصحية باقسام الحوادث الحكومية حاصلة للاسف الشديييييييييييييييييييييييييد وكلامك صح 100% اخت أم احمد بس برضو تدني مخرجات التعليم في جامعاتنا في السنوات الآخيرة بصفة عامة في جميع المجالات وفي مجال الطب بصفة خاصة
وصحيح في حناكيش عايزين يبقو دكاترة وبس وبي فلوسهم؟؟؟ونتمني الضميريصحي لما الواحد يتعامل مع ارواح البني آدميين
والله المستعان ويشفي الجميع

أخى العزيز عوض محمد الخضر .. الخيل تجقلب والشكر لحمّاد ..إحقاقاً للحق انا لم أكتب مما ذكرت شيئاً وأعتقد أنك تقصد مشاركة أخونا كبسور ، لكما التحية.
وتعظيم سلام لأطباء بلادى .
مشكوووورة أختي الغالية أم احمد للتصحيح شكله الواحد خلاص خرف انت تعرفي أنا شكلي قرأت العنوان أم احمد الفي عنوان وما انتبهت لكاتب المشاركة كبسور لك العتبي حتي ترضي اخونا كبسور وبالمناسبة أسمح لي أحييك وارحب بيك في دارك ومشاركتك متميزة ومنصفة لا تعقيب عليها واكرر أسفي لعدم الانتباه والتركيز هذا وما مني من العلي وربنا يلطف علينا
avatar
د.عوض محمد الخضر
شنداوي مميز
شنداوي مميز

ذكر عدد المساهمات : 228
تاريخ التسجيل : 26/08/2009
العمر : 44
الموقع : http://profshendi.blogspot.com/

http://profshendi.blogspot.com/

الرجوع الى أعلى الصفحة اذهب الى الأسفل

رد: البصيرة ام حمد

مُساهمة من طرف كبسور في الأربعاء 21 أبريل 2010 - 18:23

د.عوض محمد الخضر كتب:
أم احمد كتب:
د.عوض محمد الخضر كتب:رمانى في اليم مكتوفا ثم قال لي اياك اياك ان تتبلل..حكمة بليغة
وسلمت يداك بما كتبت يا ام احمد لانصاف قبيلة الاطباء
وللاسف كل السخرية والمهذلة التي يلاقيها اهلنا الغلابة من متلقي الخدمات الصحية باقسام الحوادث الحكومية حاصلة للاسف الشديييييييييييييييييييييييييد وكلامك صح 100% اخت أم احمد بس برضو تدني مخرجات التعليم في جامعاتنا في السنوات الآخيرة بصفة عامة في جميع المجالات وفي مجال الطب بصفة خاصة
وصحيح في حناكيش عايزين يبقو دكاترة وبس وبي فلوسهم؟؟؟ونتمني الضميريصحي لما الواحد يتعامل مع ارواح البني آدميين
والله المستعان ويشفي الجميع

أخى العزيز عوض محمد الخضر .. الخيل تجقلب والشكر لحمّاد ..إحقاقاً للحق انا لم أكتب مما ذكرت شيئاً وأعتقد أنك تقصد مشاركة أخونا كبسور ، لكما التحية.
وتعظيم سلام لأطباء بلادى .
مشكوووورة أختي الغالية أم احمد للتصحيح شكله الواحد خلاص خرف انت تعرفي أنا شكلي قرأت العنوان أم احمد الفي عنوان وما انتبهت لكاتب المشاركة كبسور لك العتبي حتي ترضي اخونا كبسور وبالمناسبة أسمح لي أحييك وارحب بيك في دارك ومشاركتك متميزة ومنصفة لا تعقيب عليها واكرر أسفي لعدم الانتباه والتركيز هذا وما مني من العلي وربنا يلطف علينا



شكرا الاخ د. عوض علي المرور والاشادة

ولازم ندافع عن الاطباء لانو الناس ماقادرين يفرقوا بين فشل الخدمة وفشل الكادر في حد زاتو

فمثلا انهار قطاع السكة حديد ،النسيج ،مشروع الجزيرة ،التعليم وتراجعت خدمات كتيرة ولو قلنا دا حصل بسبب فشل العامل والمنهدس والزراعي والمعلم ،طبعا حانكون غلطانين .لانو السبب في كل ذلك هو تراجع عام في سستم الخدمة المدنية في السودان ..وفي كتير من الاحيان الكادر بكون متميز .لكن ماعارف ليه بس الحكاية لما تجي في الخدمة الطبية الناس بخطوها في الاطباء ؟؟

اما ام احمد فهي فعلا خيل هذا المنتدى وليست حماد ..

وبالمناسبة ياام احمد المثل دا سوداني اصيل وله قصة وحا اكتب عنو في منتدي الامثال ..
avatar
كبسور
مشرف المنتدي السياسي
مشرف المنتدي السياسي

ذكر عدد المساهمات : 228
تاريخ التسجيل : 05/04/2010
الموقع : Misurata Libya

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى