فضيحة ( لماذا نحن السودانيون )

الإخــوه الافاضل
السلام عليكم ورحمة الله وبركاته؛؛؛ وبعد
بكل الحزن والاسي العميق يؤسفنى ان اطرح موضوع للنقاش هو ظاهره سيئه لابناء وطننا السودان وخصوصاً في بلاد الغربه وهو عدم اهتمام فئه كبيره من السودانين بالمظهر العام واللبس الائق النظيف الجميل
( والله حاجه تغم النفس تكون في مكان عام وفي بلد من بلاد الغربه تلقي سوداني لابس وسخان او جلابيتو مشروطه أو مره عبايتها وسخانه ومشحمطه ومرفوعه فوق رجليها! ؟؟؟؟
المشكله انو بعض السودانين مابهتموا لما يكونوا ماشين السوق أو مكان عام تلقي الواحد مخصص جلابيه للبيت وجلابيه للسوق وجلابيه كشخه وحلوه عشان يزور بيها اصحابوا واهلوا وكمان تلقي الحريم نفس الشىء عبايه قديمه للبيت وعبايه مشحمطه نص عمر للسوق وعبايتها الجديده لزيارات الاهل والاصحاب
وكمان في بعض السودانين بيتصرفوا تصرفات غير لائقه في الاماكن العامه فمره وانا جاي من مطار جده ورايح الرياض شفت ثلاثه رجال سودانين لابسين جلاليب وسخانه وقاعدين في الارض في صاله المطار والله خجلت ليهم ووشي كان في الارض رحت وبكل اسف قلت ليهم معليش ياجماعه ممكن تقعدوا في الكنب المخصص للجلوس عشان مافي شرطي ولا مسئول يجي يتكلم معاكم
وفي مره تانيه وانا طالع من السير بتاع استلام العفش وماشي بره لقيت ليك أخوانا السودانين نزلوا شنطهم وقعدوا يسلموا على مستقبلنهم بالاحضان وسدوا الباب والناس من جميع الجنسيات يتفرجوا ومالاقين طريقه يطلعوا !!
ياجماعه شنو عدم الزوق ده ؟؟
ومره تانيه كنت في مستشفي عبيد التخصصي بالرياض وديت طفلى لفحوصات لقيت ليك واحد سوداني لافي عمتو ولابس جلابيه وسخانه والله تقول كان نايم في الارض وقاعد في مكتب واحد سعودي جلابيتو تشرح القلب ببياضها والله انا علقت قلت ده شنو جاي يشحد ياربي ولا يتعالج
والسؤال الذي يطرح نفسه لماذا نحن السودانين من دون العرب عندنا عدم مبالاه واهتمام بالمظهر يااخوانا شوفوا اللبنانين والسورين والسعودين وكتير من الجنسيات راقين كيف في لبسهم ومظهرهم
اتمنى ان ينصلح الحال عشان الواحد مايخجل من فئات من بني جنسو

ولكم مني كل الــــــود فضيحة ( لماذا نحن السودانيون ) Moz-screenshot-7

فضيحة ( لماذا نحن السودانيون ) Moz-screenshot-6

من طرف dooody السبت 29 مايو 2010 - 12:35

يسلمو على الطرح اخي عبد العزيز
ولكن انا اخاالفك الرئي نعم بعضه صحيح ولكن نحن السوداانين مهما كانت مساؤنا برضو عندنا محاااسن ماعند السورين واللبنانين والسعودين وغيرهم .. يا اخ عبد العزيز انت كده جمعت كل المغتربين ربما تكون فئه قليله فقط ..
تقبل مروري

ايوه ماكل المغتربين في ناس واجهه مشرفه وناس بتمني انو يغيروا سلبياتهم عشان في النهايه الناس بتقول انهم سودانين ويعكسوا صوره ماجميله عننا

تسلم اخى عبدالعزيز على حميتك السودانيه وغيرتك على بنو جلدتك
وعمتى دى رايك فيها شنو

من طرف **sala35** السبت 29 مايو 2010 - 18:19

تسلم الاخ عبدالعزيز على اثارة النقاش فى هذا الموضوع الهام

نحن شعب سمتنا كل ماهو جميل ومايميزنا التواضع بس حتى فى المظهر بفقد معناه.

لو اخدنا الشعب المصرى مثال فهم شعب يتخذ الاناقة وحسن الهندام اهم سمة تميزه ولا يهتم بالباقى.

تمنيييييييت ان نحذو حذوهم لان كثير من السودانين بلبسو بمزاجم وببعدو من المقولة (كل مايعجبك والبس مايعجب الناس)

اسمح لى ياعواج الدرب أرد ليك عن العمة التوتال فهى رمز سودانيتنا وعزنا وبوصيك تبقى عشرة عليها فى كل المحافل عشان تعكس واجهة مشرقة.

من طرف huthy2000 السبت 29 مايو 2010 - 20:37

اخى عبدالعزيز لا شك انك قد اثرت موضوع هام للغاية..ومسألة الزى هى مسالة ثقافة وتربية فى المقام الاول قبل ان تكون مظهر عام..وماعكسته انت من صور ما هو الا ظل لثقافتنا وتربينتا فى مجال الزى والنظافة العامة،ولا يمكن لهذا الظل ان ينعدل ما دام العود اعوج..ان ثقافتنا العامة فى مجال النظافة ككل ضعيفة للغاية ولا تتوقف فقط فى المظهر العام واللبس..انظر الى كل مدننا وقرانا واسواقنا التى تعج بكل الصور السالبة والمعاكسة تماما لاشكال النظافة العامة..ان المظهر الشخصى لاى فرد فى اى مجتمع لا يمكن تجزئته باى حال من الاحوال من المظهر العام لذلك المجتمع،فمظهرك الشخصى يعكس صورة المظهر العام للمجتمع الذى جئت منه والعكس صحيح..لذلك اؤكد لك ما لم تصبح مسألة النظافة والمظهر العام جزء من ثقافتنا وتربيتنا بحيث ينشأ ويتربى عليها اى طفل فى كل مجتمعاتنا،فستظل هذه الصور السالبة موجودة..والمجتمعات الراقية هى التى تعرف كيف تستفيد من ثقافات الغير ولا تجد اى ضير فى الاخذ بها طالما انها ثقافة ايجابية..ولعل اليابانين قد استفادوا من الثقافة الامريكية فى الزى وذلك عندما لاحظوا بعد اول سفينة حطت فى موانئهم بعد الغزو الاميركى ان الاميركان لديهم ازياء خاصة فى المجتمعات والاماكن المختلفة سواء كان فى المنزل او العمل او الاماكن العامة والخاصة بدلا عن الكيومتو الذى كان يلبسه اليابانيون فى كل المناسبات والاماكن المختلفة حاله حال الجلابية السودانية المميزة لنا...

شكراً اخي حوذي وفعلاً الإنسان إبن بيئته ولايمكن ان يستقيم الظل إذا كان العود اعوج اتمني ان تنتشر ثقافه النظافه والمظهر العام الائق وفعلاً انا شفت اليابانين في برنامج تلفزوني هم مثل يحتذى به
في الإهتمام بالنظافه والمظهر العام والتعامل الراقي
اتمنى ان نهتم على الأقل في المهجر بالمظهر العام حتى لانخجل منه وفي النهاية هذا لايحسب على الفرد وانما يحسب علينا كسودانين جميعاً واتمنى ان يكون كل سوداني في المهجر واجهه مشرفه لبلده وان يعكس صوره طيبه عن السودانين

عواج الدرب كتب:تسلم اخى عبدالعزيز على حميتك السودانيه وغيرتك على بنو جلدتك
وعمتى دى رايك فيها شنو
( اخي عوج الدرب عمتك تشرح القلب بياض وناصعه وصوره للزي السوداني الاصيل ونحن بنتشرف بزينا الله يديك العافيه والصحه تسلم

تسلم اخى عبد العزيز على هذا الموضوع المهم00وحقيقة تلقى الواحد/ة فى السوق الاولاد مبشتنين وما لابسين كويس والكلام بصوت عالى وفوضى وعدم اهتمام اكتر من اللازم وكتير بنكون ماشين السوق ولما تقول للواحدة سرحى لبنتك شعرها ولا غيرى ليها ملابسها تقوليك نحن ماشين وين ما ماشين السوق وجايين بالرغم من انه السوق والاماكن الاخرى هى البتخلى الاجناس تاخد فكرة عنك وعن بلدك فنرجو ان نعكس الجانب المشرق دائما للسودان والسودانيين00وتسلم مرة تانية00

كلامك حقيقه يابسمة أمل رغم انو السوق مكان مهم بيجمع كل الجنسيات وبياخدوا فكره عننا من خلالو وكمان في حاجه تانيه هي قصة السيارات القديمه شديد البركبوها السودانيين يعني مرات اكون ماشي مع صحبي نلاقي سياره كريسيدا قديمه عطلانه او ماشه وطالع منها دخان كتير ونقول ده اكيد سوداني ولما نصلوا فعلاً يطلع سوداني ههههه ...غايتو الله كريم واتنمى ان نعكس الافضل دائماً عن شعبنا ووطننا

تحياتي لصاحب البوست الأخ عبد العزيز والمتداخلين جميعا

ما ذكر عبد العزيز صحيح ونتمنى أن تتبدل هذه الصورة قريبا. وربما يكون مصدرها المجتمع السوداني القروي بطبيعته. حيث تجد الناس يقبلون بعضهم بأي شكل أو أكل او لبس. تجدهم يجلسون القرفصاء على الأرض للأكل وفي تجمعاتهم الصغيرة فنقلوها بحذافيرها إلى المطار. يلبس زي الزراعة والعمل ثم يذهبون لأداء واجب عزاء أو تهنئة. فمازالت الصورة البدوية تهيمن على العقل السوداني في تقشفه وزهده في كل شئ.
وبالتأكيد سوف تتغير الصورة مع الانتقال التدريجي من مجتمع بدوي إلى مجتمع حضري يكون فيه مواصفات لمكان السكن تخصص فيه غرفة النوم والجلوس والمطبخ والحمام ويخلو من الدواب. وبعدها سيكون الحديث بهدوء والسير برزانة وأناقة في السيارة ولن يسمح للدواب بدخول السوق

نتمنى أخي سارديه أن يعكس السودانيون ارقي صوره عن المجتمع السوداني الاصيل

أخي عبد العزيز لك التحية لايرقي الأمر لمستوي الفضيحة كل الشعوب فيه المتحضر صاحب الزوق والاوتكيت والاقليمي الريفي
الجلف والجلفنه تظهر علي كل الجنسيات ولكن أنت تلاحظ أبناء جنسك والظاهر ياأخي عبد العزيز تستعر من أهلك السودانين
وأنا براه من وجهة نظري عفويه ومصدر فخر وأعتزاز نعم تجد بعض
المخالفات وأنا معاك
والسوداني في بريطانيا وفي أمريكي وجميع دول الخليج له تقيم
خاص لتمسكه بالقيم والمبأدي أجعل نظرتك شمؤليه
والحمد لله لفيت دول عربيه واوربية والسودانين مصدر فخري واعتزازي اذا نظرتها بمنظار وأقعي علي حسب المنظار تترجم الرؤية لك التحيه أخي

اخي مقنع الكاشفات ده واقع عايشنو وشفناه هنا في السعوديه وحكوا لينا ناس من اكتر في دوله ومابتلقاه مثلاً عند السوريين أو اللبنانين أو في كتير من الشعوب وانا مابستعر من اهلى السودانين لكن بسعى لصلاح الحال ولاني بحب بلدي وغيور عليها بتمنى السودانيين يكونوا دائماً في المقدمه
لك التحيه وشكراً لك

ياعمي انتو بعيديين ياناس الرياض

تعال شوف جدة العمرة والحج والناس كيف

تصدق جنبنا مسجد امام المسجد تعب مع ناس العمرة

السودانيين بنزلوهم كل سنة في فندق جنبنا وجنب المسجد

وتعال شوف في نص الصلاة الجوال يرن " يغني " باعلي صوت

والاخ مايغفلة والناس بعد الصلاة تعاااين والاخ عادي ماهميهوو شي

والله مرة واحد سوداني قام بعد الصلاة ومسك المكرفون وداير

يعمل نصيحة انا طوالي جريت جري وبعدها يكلمني واحد صاحبي

يقولي الزول جاب العيد ،، الله يعين بس النيية بتاعتهم طيبة الله

يحفظهم ويحفظنا ،،،

تسلم اخي الماسي على المداخله واتمنى ان نلتزم دائماً بالاَداب السمحه حقتنا وان نعكس صوره جميله عننا في المهجر كما كنا بالسابق

رمية : تعرف يااخوى عبدالعزيز والله العظيم قبال يومين اتذكرت البوست حقك دا ،انا مشيت لمستشفى دار العيون بحي المهندسين بالجيزة لزيارة والد واحد اخونا ،وجدت المستشفى راقي شديد ،نظافة،وترتيب وهدوء وطاقم جميل من الاطباء والسسترات،والمرضى من كل الجنسيات مرتبين ومهندمين وما لفت نظرى فى جماعة سودانيين غير ناسى الزرتهم سايقين ابوهم كبير فى السن ،راجل وقور مرتدى الزى السودانى الكامل ،ولكن ابنه الشاب منظره مخجل ،جلابية متسخة ويصعب عليك ان تتبين لونها الاصلى ،ولافى شال فى رأسو بنى اللون على شكل عمه بطريقة كاريكاتيرية ،ومرتدى شبشب حمام ،ومع ذلك مدعى خفة الدم ويمازح فى الاخوة المصريين شمال ويمين.....
بديت بالرمية دى كلها عشان اطرح رأيى بصراحة فى الموضوع وانا اتفق مع الاخ عبدالعزيز انو السودانى داخل وخارج وطنو مفترض يعكس صورة مشرفة للبلد ،اذا كان مغترب او زول عمرة او علاج،ولازم يتذكر انه سفير لبلده واهم من السفير الرسمى لانه يتعامل مع غيره من الشعوب والسفير الرسمى يتعامل مع جهات رسمية والشعوب التانية ماعندها معاهو احتكاك واسع .ولابد للسودانى ان يكون محترم فى زيه وتعامله وكل شئ..وجايز ياخي الاجنبي ده ماشاف اي سوداني غيرك ويفتكر انهم كلهم سجمانين زيك كدا،وحتى بعد كده لو قابل سودانيين كويسين حايظل الانطباع الاول عننا في ذهنه ومابتمسح بي سهولة .وفعلا نحن اكتر الشعوب في الخارج ماعندنا عناية بالشكل واللبس ومرات بنكون اقرب للبهدلة ،والقصة دي حاصلة فقط بسبب اللامبالاة والاستهتار .
كسرة :حكى لي واحد مصري كان شغال في مستوصف علاجي في السعودية ،انهم كإسطاف اجنبي بشيلوا هم لما يرقد معاهم سوداني وذلك بسبب الازعاج في الزيارة وعدم الالتزام بالهدوء والتعليمات وطوالي سرحت بي خيالي وتذكرت المشاهد ...(الواحد بعد يدخل جوا المستوصف ومايعرف زولو راقد في ياتو غرفة ،يقوم يتصل علي المرافقين ،ومرات يتصل علي زول خارج الموقع يكون عارف الغرفة ، ويصيح باعلى صوته كأنه في الهواد :أسمع ياحسين ،معاك صديق ههههه ،نحن هسه في بطن المستوصف ههههه جينا مع عباس بي عربيتو ،قلت لي الزول راقد في الغرفة كم ؟الغرفة 14 هههههه ،الجنب المصعد طوالي ،كويس خلاص خلاص ،الموضوع اللأمس داك ماتنساهو ههههه،آي آي مشوار الجماعة ههههه،ولا أقول لك خلاص خلاص لامن نتقابل بعدين ) وطبعا المكالمة بتكون على مسمع لكل الناس في كل الغرف والطوابق ،والأجانب بكونوا مستغربين أنو الزول ده من ياتو كوكب ،والغريب أنو بكون ناس الاستقبال على مرمى حجر من أخونا صديق هذا لكن هو طبعا ماعارفهم قاعدين ليه ولا داير يعرفهم ،ومثل هذا السلوك وغيره أصبح طابع للسودانيين في الخارج ،ونتمنى ان ينصلح الحال .

لي إضافة بسيطة فما ترك الأخوان شيئا والحقيقة المؤلمة أن نسبة الأمية كبيرة عندنا لذلك مسألة الثقافة والتربية التي ذكرها دكتور حذيفة هي المحك ومعظم العمالة السودانية رعاة أنا اعمل في منطقة بدوية وبكل أسف تجد شاب عمره 22سنة ولا يعرف الكتابة وبكتب لهم الخطابات تصور ان مرتباتهم لا تتجاوز الألف ريال ولكنهم يرونها كثيرة حسب مستوى المعيشة التي كانو يعيشونهاأحدهم مرة أرسل 500 ريال وبدأ يوزعها في الخطاب وأنا مندهش وتبقت له 20ألف بالقديم طلب مني أن أكتب لهم أن يشتروا بها بابا قلت له المبلغ لا يكفي قال الباب ما برميل وبفتحوه مثل هؤلاء البسطاء لا تتوقع منهم الأناقة وهم من مناطق معينة بالسودان لا داعي لذكرها وبنفس القدر يوجد سودانيون يخزو العين في الأناقة

شكراً أخي كبسور على هذه المداخله الثره وأوفيت وكفيت ؛؛ ربنا يديكم العافيه
ومشكور أخي محمد أحمد مصطفي على الإيضافات المفيده... ونتمنى ان ينصلح الحال وتتغير المفاهيم وتنتشر تقافه النظافه والإهتمام بالمظهر العام لدي جميع أبناء شعبنا

فضيحة ( لماذا نحن السودانيون )

فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

ردفضيحه (لماذا نحن السودانين)

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )

رد: فضيحة ( لماذا نحن السودانيون )