من اشعار ودبادى

الشايقى وحريمه الاربعه

يمر الحول وحول بى زول

يجيك الحول وحول بى زول

والزول غول

ونحن ضهابه..نحن تعابه.

.لا نقدا ولا محصول

يا( قشارة) ما معقول

يا (فقاسه) ما معقول

عليك عز دينك المكمول

يضربى الجملة بالميت قداحات فول

وعيشه تقول ضنيب ام سيسى عرضا وطول

وجاز اللمبه فى غلبه

وحق الفطرة للطلبه

وركوب التاكسى بالقلبه

وحليل المنقه والعنبه

ولولا الروح بقت سلبه

بنمص الصلصه من علبه

وكانت جاتنا فى الرقبه

ودا كلو كوم

وتانى ام العيال كوم

الوليه الفنجريه حلاوة نبق

الوليه الغجريه ودايره دق

البطن ديمه منفوخه طبق طبق

يجيها الحول وحول بى زول

يجيها الحول وحول بى زول

ومرة تديها الهواده

وترمى زى زولين زيادة

الله اريتو الزول يزاول

يا حكم صفر دا فاول

البطن بت اللزينا

عايزة تعمير القبائل

واب شنب تعبان

وعرقو يسيل جداول

يلحس الكوع رغم انفو

وان كان مقاول

وياما يشبع فى البشاتن

ويا ما يشبع فى البهادل

شايلا فوق الصفحه(سوسو)

واحد الله

باليمين مقلوده(سيسي)

مالو تانى

اب شنب شايل (امانى)

تلاته بركه

وكل حركه معاها بركه

فى البطن بنجوسها فرفر

والقطر بى وراها صفر

والله يستر

عينى بارده ومانى حاسد

وربنا يتم المقاصد

والله ما شقالو حنكا ضيعو

والله ما سوالو طفلا ما سقاهو ورضعو

الا الربايه خشم بيوت

والمعايش ما ها توت

والمعذب اخير يموت

قد تقولون حراما لست مفتى

ولماذا لست افتى

شيخنا خريج الخلاوى

يكتب البخرة ويداوى

يعشق الماحى

وطارتو اب كساوى

قافل اضانو من البلاوى

لا يفهم الا فى عرس وطلق

قد يجيب بعض الفتاوى

بيعة فى سوق السماسرة

بيعة رابحة وبيعة خاسرة

وهو حامد متشكر

ليس ملحد منكر

يمشى ما بين السرارى

ونساوينو الحوارى

لا تغيب عن قلبو ابدا

(حاجة سعده) لجنه خردة

وهى حاربت فى المهدية

ثم آلت لجلابط وكراضم

عن قريب ستزور الابدية

ثم تأتى(سعديه) وهى رهن الخدمات

و(مفاخر) ومباخر وعيون فاهمات

تعرف الوقت المناسب لتحاسب

ليس فى الدين حرج

آخر العنقود(ليلى)

اصغر الزوجات ليلى

شيخنا ودالشايقى افلح

اشترى ليلى مكعكع فتصلح

وتصبين وتنحنح

وهو شيخ فى هجيع الليل يمدح

يا ليلى ليلك جن

معشوك اوه وان

وتجيب المدح ليلى وتغرود غير هدنه

وتزيد الشيخ قربا

قاب قوسين او ادنى

انها دنيا المطالب

باسم ليلى من يطالب

فى مره

والمرات كتيره

صلى الشيخ الصبح ونافله بايات قصيره

وتعوذ

ودعا الله بان لا يتجوز

وتشهق وتمنطق

وبراس السبحه طق طق

ومضى يتلو الكتاب

مر بالمال والبنون فتبسم وترنم

وبآيات الطلاق فتجشم وتكشم

واذا ما لاقى مثنى وثلاث ورباع

وقف الشيخ طويلا مثل فحل الضباع

وبكى وهو يرخى من حبال وتريه

وجرى دمع الزراعة المطريه

وقال(اين منى زوجة بكرا طريه)

وقال(اين منى المحلبيه)

اين منى السرتيه

فى نقاء كبحيرة طبريه

ودعا الله عروسه

خطفها خطفها

جاب ضحية هايلة ومذهلة

وتفوت سنه وتمر سنه

وشيخنا عجز وانتنى

شيخنا يا شيخ السجم

خلف زرازير البجم

واحدين اساميهم عرب

واحدين اساميهم عجم

بدا بسيد الخلق ثم زوجات الرسول العشرة

وكل الذين تجمهروا فى البيعة تحت الشجرة

طلحة الخير والزبير

ثم سعد وسعيد

ثم سته مبايعين

ثم (عبد ما يشاء) من البنين

عبدالجليل،عبدالرحيم،عبدالمعين

وتنوع فى القوافى

وفى تراكيب المضافى

شمس الدين، قوس الدين

ولهب الدين وقمر صناعى الدين

آخر الدور

الواحدة بقت تفقس فى تمانيه شهور

والراجل تقول مسحور

وما بخليلو مرة بور

وزراعتو ما بتقع واطه

بعد حولين يزيدوعلى اهل مالطا

بقت الطلبات بالدست

لحسو قدر العندو جت

وحتو درج الخزنه حت

المقاسات بالدست

الوليه تنبح ما انكست

والبت دايره ان اصبحت

وان كان مست

جيييييييييييييييييييييب

قطايف ولطايف

خرائط ولفايف

ومحدق ومفستق

ومحزق ومنمق

وبواريك طوال

ومساحيق دلال

وهلم

وهلم

وهلم

انها نكبه روما والمتمه

ان طعم العرس حلو ولذيذ

وهو راحات واقداح نبيذ

والخوازيق ستأتى

ثم تأتى

وانتفاخات القرنتى

ثم ضربات البلنتى

وبطان كالنمتى

لايقاوم بالدى ام تى

انت تصرخ بنتى بنتى

وهى تصرخ حنى انتى
وما علينا

بت الخير يجيك الخير

وصل جوابك الكاتباهو للولد الحتالى

اكان ترسلى ليهو هين هينين من البركاوى

داك الطعمو حالى

وكان بالقل..شخاليب دوم

و هنا والله نى ومسيخ و غالى

سؤالك يمه عن احوالى

كان شفتيها تغنيك عن سؤالى

انا اتوكرت فى قلب البنادر

زى غريب شرقان مدلل فى الدوالى

جات شايلانى حرة جوف

وانا اتحديت مجالا مو مجالى

مصايب الجامعة اكبر من جميع الشفتو

ولا سمعتو فى ايامى الخوالى

قعاد الكرسى كان شفتيهو

ورم ساقى زى سيد الزلالى

اقلب فى الدفاتر من صباحن بدرى

لامن تمسى

ما بنسى انشغالى

اسوق الليل تحت ضو الكهارب

وديمه هارب من فراشى

وهادو حالى

دا كلو عشان اجيب نمره

انافس بيها واستر بيها حالى

ودى عاد حالتنا ما بتسر البال

ومن يوم ما هديت

ما انسرا بالى

سلاطين العلم يا يمه

ينسوا العشرة فى فد يوم

يدفروك برا زى دفر الطبالى

وخايف من اجيك مرفود

وهادى الفكرة من ما جيت

معشعشه فى خيالى

واخير افتح اضانك

قبل ما تلقى فى اضنى

ملويات حبالى

وكان حصل القدر يا يمه لا تلومينى

لومى على البنادر النورا اقوى من احتمالى

بناتن فيها جسومن رويانات بالدهون

تلصف بلا جلود السحالى

سبيبن ديمه بالحزم الكبار مبهول مردم

فوق قفاهن..وا حلالى

صدورن طامحة زى موية الدميرة

الهايجة تكشح فى العوالى

عيونن واسعه تبلع ميه زى ولدك

تشرك للموحد والضلالى

و ساعة اقيف قدامن

انكس راسى بى قدرى وجلالى

مشيهن سوا زى سرب الغزال

لكن نفورن مو غزالى

عدادن ما بخبرو

الا وين ما امشى الاقيهن قبالى

وقصاصن ينقر بى عصاتو

وما يفرق دريبن

من بين دريبات القمارى

بخورن فى سما البندر

يدوخ متل مسك العشارى

رقيصن ينهزنلو بلا الفلو

اللماتو غابن منو فى ضل المضارى

يجمع فى قفاهو وينطرح

يتمطى تحتحت مفاصلو

ودا الياهو الفاكى جبارى

دلاليكن تجيب الضال

على متاهات الضهارى

غناين اصلو ما سمعنابو

اكنت بقولو ليك

الا هسع مانى طارى

وطنبورن معشرق وحسو فاقع

لا فيهو كنتر

لا ودع فوقو بيرارى

عشوقن فى الرقيص

يتلوى زى سيد المغص

يوم يبقى فى حالة طوارى

والمداين ديمه فايرى

زى وحوشا فى البرارى

والمآسى كتيره حاصله

والمكضب يلاقى بوليس الصوارى

عاد دى حالتن بقدر انستر معاها

خلاف احاكى الناس واضارى

وانتو راجينى يوم اجيكم بى شهادتى

وينبسط ضهرى وكبارى

وبرضو خايفين من اجيكم بى غريبه

وفى خجل قايد صغارى

والقدر بى قادى كاتب لى شيتن

لانى حارى ولانى دارى

الا حاجه واحدة تكون فى علمك

انى جايى

وتانى راجع لديارى

ويانى حميد القديم

الا بس

فاقد حجابى

وراح سوارى

يمه

كترى من رضاكى

وسلمى لى على المعاكى

قولى للحبوبة زيك

انحنا شيبنا وماك براكى

سلمى لى على جروفنا

ووزينا وحتى جدادنا البكاكى

سلمى لى على بناتنا

وقولى ليهن والله مانى ناسى

طارى شلاخا مواسى

زى شقوق بيتا سداسى

طارى نقشا فوق خدودن

بين ضفايرو

وشوفو قاسى

جسمى فى البندر ممدد

الا بيناتكم بى حواسى

سلمى لى على البكادن

والبشتت فى التواقى

فى الكرد محراتو قالع

وصوتو فوق تيرانو عاوى

ما حزم بقجة تيابو

وقام فجر لاحق اللوارى

اخيرلو يحفر فى جروفو

ومالو ومال حفر المجارى

سلمى لى على الضرايح

والفضل من الخلاوى

والفقير الفوق حصيرو

يكتب البخره ويداوى

مع السلامة

ودعتك الله

ولى وصيتك مانى ناسى

لى شفقتك مافى داعى

وابقى عشرة

الراعى واعى

فى بحور اهل البنادر

من زمن طالق شراعى

كان نجحت بجيك غانم

وكان فشلت بجيك ضراعى

شكرا لك الاخ حذيفة وانت توثق للشاعر د.محمد بادي

فهو يستحق الكتير والاعلام لم يعطيه حقه وقد امتلك مقدرة عالية على تصوير المشاهد وانت حينما تسمع له قصيدة فصورها تتحرك قدامك على رجليها ،وكمان عندو مقدرة فائقة على الكتابة بالعامية ،فهو يجري وحده في هذا المضمار من غير منافس وقديما قالو ان افضل من كتب بالعامية في السودان هو الشاعر حدربي محمد سعد وفي ظني ان ودبادي لايقل عنه في هذه الملكة .
لكن عليك الله ياحذيفة فتش قصيدته (هوي ياوليد )ونزلا لينا ..

اخى كبسور شكرا على المرور واستجابة لطلبك نزلنا ليك هوى يا وليد...

هوى يا وليد

هوى يا وليد

يا دلوعة يا مرنوعة

اعدل ايدك المفدوعة

واتلحلح واقيف دغرى

وواسى صدرك مع صدرى واتشدع

ليك الحق

شان ولدوك فوق اسفنج

وحتى اول جديد سوهو ليك بالبنج

وهسع هوايتك انك تلعب البنق بونق

وليك الحق

عشان فطموك بعد ما زدتا فوق سنتين

وفى سن عشرة نومك كان على الليدين

غطاك بالشاش وفرشك بحرير الصين

والبتدورو كلو بتلقى قاب قوسين

ابوك مليان وجيبو سمين وقلبو سمين

وفاتح ليك حساب فى البنك والتامين

وليك الحق

عشان ما خضتا فى وحل المطر والطين

ومن الترعة ما سويت شراب الهين

وما قيلتا فى ضل دومة بى فرعين

وما شاققتا عرق النيل مع الوزين

وليك الحق

عشان ادمنتا عيشة اللين

مشى الاسفلت ما جربتو بالكرعين

ركوب اللورى فى شمسا تصر العين

وما عانيت وقوف الصف ورا التموين

عشان يا انت مابتدرى سجل ابواتك البدرى

دحين اسمع..اقيف واسمع سماك الباكى

مجدو الزال ياما كان تحتو رجال

ابوخنجر وابوشوتال والصقر البجيك خوجال

صوتن كان يمين جلجال

ومكسيين كمال وجلال

لكن الزمن اسرع سيفن بلحس الفقرة

وما كانوا برضوا بالحقرة

وكانوا بضبحوا الشقرة

وكانوا بضوقو العادوهو نوم الكوع

وكانوا بموتوا فى شان حرمة المفزوع

الجعلى اب شرابا حار

وقالوا بيعدى يومو خنق

والشايقى البياكل النار

وفوق نحاسو متخنق

ودرفون البجا الصقار

وحاقب سيفو ياكل الشق

والغرباوى عينو شرار

وكضب القالوا عندو عرق

والنيلى البعرفوا كتار

على كتل الاسود جرق

والبطحانى والشكرى

وغيرهم من اهل فخرى

ومنهم اصلى لا بشبع ولا بقنع

هوى يا وليد

حصل جربتا كب السارية فى القلعة وخلا العتمور

وشفتا بروقا تترقص وتتحرقص تقول مطوية فى قرقور

وعاوى الزيفة ينفخ فى جبال النقعة زى الصور

والحصحاص يجرفو السيل يكنسو على مهاوى الخور

وفلب الصاقعة يطرشق يكب النار دمار وشرور

وشفتا الحال عرق مقلوع جبل متروم فرع مكسور

جمال غرقانة بى حالا وحد الموية فى الغرغور

وابن آدم المسكين نجاتو تحت قرون التور

والعوتيب يجيك يجرى

يشيلك وانتى ما تدرى

وما بيرفع

وهوى يا وليد

حصل سادرتا بالديداب

وقدامك مراحك وراكب الخباب

ودربك طولو يملا العين سحاب

وغبار ومويتو سراب

وهوا كرباجك البكاى

يبكى على ضهور الضمر اللى انجاب

وتسرى الليل وما تضوق هجدة

لو كان النجم ما غاب

وبعد ايام تجيك لفتة

ويلوح ليك فى البوادى سحاب

وتكرف من دعاش العينة

تملا رئاك عطر واطياب

تلقى الوادى خضر

زى تقول ما كان خراب ويباب

وبت ام ساقا تقييل

من ضحاها على المعالى ونسمة الهباب

وتفرش ليك حزمة نال

تحت سيالة تريانة فروعا قراب

وتنفخ كل آهاتك مع المزمار

تصوغ الحان ملانه شباب

وتنسى الدنيا

كل الدنيا ما عندك معاها حساب

خلاف برقا يشيل حرقاص

او رعدا تقول رصاص

وقت فرقع

هوى يا وليد

حصل صحاك عز الهجعة صوت شتما بعيد مخنوق

وجاتك شخرة الطنبارى مشتاقا يسوى القوق

ونومك طار واتقسم والرشرش صبح مفروق

واتلفحت نص من توبك الجرجار..

على الدلوكة سايق سوق

وتلقى هناك بنات بلدك ولاد بلدك

يعلُو الصفقة تقدح فى القلوب شوق

ونغم الفال ابشرن يا بنات بالخير..

والجنيات تطير لى فوق

وكم زغرودة تتفجر تفور بالناس بعد ما تروق

يعوم الوز صدورو تشابى للمجهول وما بتضوق

تميل زينوبة زى البان

يمين وشمال تودى الطوق

واخوان ام شلخ ينكبو جوا الداره

زى صقرا نزل من فوق

ضرب الصوط والركزة بيفرق الناس

عشان زينوبة ما بتحوق

وعاد تتحزم الجنيات وتتنظم تقيف فى روق

وكل واحد يهز ضرعاتو والحجبات تزح لى فوق

جفير الخوسة فايت الكوع

وسيرو مع العضل مطبوق

والطاقية تحت الحاجب المعقود

هدية ام زين وما مشرية من السوق

ويتقدم عريس السمحة رافع صوطا

كان بسوقو بيهو النوق

والعنجاوى ينزل فوق ضهورهم

بس تقول منشطحة فيهو بروق

يبدا مجراهو بالترقوة

ويتحدر مع الضلع القصار ملصوق

واحمر عين يشم الدم

بعد ما يرش بنات عمو ويزيدهن شوق

وثابت حيطة لا بتهز لا بتلز

وصارى جبينو كلو عروق

وقال بعد العقد.

.طلقانة ما يحجزوهو الا يخلو ضهرو شقوق

هناك الحال مغير جد

وهيجة الناس تفوت الحد

وكان حجازو مد الليد بتسمع كع

وهوى يا وليد

حصل شارفت دغشا بدرى فوق حجارة مخانق النيل

فى سنة تساب والشرقى حزم القيف وطفح الكيل

وشوفت الهيبة فوق اسيادا والشخرى البكتل الحيل

وشفتا الجارى يحفر فى جروف كوكبنا

بس داير يشقو عديل

يجيك بى صدرو متحزم ومتلقف

صفوف فى صفوف يحاكى الخيل

ومويتو الهايجة تبلع جب

وتجقم فى مدالق السيل

وفوق الرملة مشرور العشارى طويل

معشعشة بين نوايبو الطير.

.حليلو جزايرو جاها النيل

وحالف ما يخلى شبير.

.حزم اطرافا يكسر فيها بالهدام

وينحر فيها بالقرقير وبكرة يموصا يشرب طينا

يزرع فيها شلالات هدير وهدير

وتكسح مركب النواتة

عايمة على قرون الموج جناحا كسير

رواسيها مالى اصابعو فى المجداف

يقوم لى فوق ويجى من تانى فوق الدفة

رافع ايدو ينده فى جملة الصلاح واهل الخير

هناك الموت يمين شافوهو شوف العين

ومافى شفيع وما فى مجير

تقول الزول يعرف اجلو ومكان موتو

لولا انو ما كشفو الاله لى غير

عاد مادام رقاب الموج

تمد لسناتا فوق للحيف تكب الصير

وشن فضل بلا الغرق البدور ناعى

وفعلا كانوا ياهو مصير

ومشت المركب الغرقانة بين موجتين

طفروا منها النواتة بطن اللجة قالوا اخير

تماسيحا يقالدوا الموج

يصارعوا عتاوة العرق الكتالو مرير

ساعة يعومو بالضرعات

وساعة فج صدورون ضمة ما اتبلت ولو قطير

ديل يا وليد

ولاد النيل رضعوا الهيجة من صدروا

ومن الطيبة رضعوا كتير

الواحد فعايلو كتر ونضمو دقاق

نهرتو يمين تسوى الفاق

ومرا اصلو لا ضاقوهو لا بنضاق

كفاك يا وليد بلاش فاقة

خلاص انا تهت فى الاشواق

وما برجع

وهسع ضلمة

لا شايفك ولا بسمع

شكرا لك ياحذيفة علي هذه القصيدة الرائعة .

شوف الشعر دا غني كيف بالصور والمشاهد .

والله بي صراحة ود بادي دا بحسسنا بي سودانيتنا الحلوة وطاعمة .
ولما اسمعو بحس انو الدنيا مازالت بخير ..

يا مهد الكرم يا منبع الوطنية

كم سودانى يفخر بيك وسودانيه

سنيت النضال فى السلم فى العلنية

عجيب يا الاتحادى اركان بناك عتية
ابو الوطنية ساسك كان سواعدو فتية
للجيل الجديد نهديك شعارنا هدية
وحدة وسلام تكون ديمقراطية
من الازهرى والهندى واحسب مية
افكار الحزب والانجم المسمية
ابوهاشم ركز يوم شال حمالة المية
كاريزما الشهامة ومركز الهاشمية
ياكا تلب الحمول ياكا العليك الرك
جبل التاكا الخاتى قولة كك
فيك من سر ابوك ومن فراسة المك
ومن بين الرجال الكلمة عندك صك
ابوهاشم قدل يوم الرجم والدك
وارث للعلا وابن الشهيد لا شك
المعقود تحلو،العاقدو ما بنفك
تقطع كالصراط يوم العجن والعك
شوف هادى العمايم والنفوس الطيبة
جات من الفجاج تقصد مرابع طيبة
معمدة بالوجع بعد النضال والغيبة
ما بترجع بلا شيتا يرد الهيبة
دربك يا زعيم قدامو رحلة عصيبة
حزب الاتحادى عصايتك اللى تمشيبا
كان قويتا هى التديك مناعة وهيبة
وان نقرت حشاها السوسة
تبقى مصيبة
الارواح فداك شيل من خيارك نقها
غير كترة كلام من غير لجاجة ونقة
ميثاقا غليظ فى المهلكات ما رق
ما همانا فى اللى اتوالى واللى انشق
نحن القوم ونحن مثقفين واشقاء
نحن الاتحادى البى دمانا مسقى
نحن اهل البلد ان جات نشيل نتوقى
نحن اولادها والولد النجيض ما عق
نحن اهل الفداء والسلسلة الممتدة
نحن اصحاب عقود طالت عليها المدة
ابواتنا القبيل عبرو ودليلهم عد
نحن على المبادئ لا نكوص ولا ردة
نحن بلدنا ما تحلالنا غيرها العيشة
ما بنسيبها للداير يقصقص ريشها
نجيب دستورها بالقانون وننصر جيشها
الدين المغشغش راح وفط العيشة

( هوى ياوليد ) قصيدة أكثر من رائعه .. واتفق تماما مع أخى كبسور فى مدى أحساسى بالفخر لكونى سودانية وهذه صفات اولاد بلدى .
شكراً جزيلاً حذيفة واصل امتاعنا بالمزيد من شعر الدكتور ود بادى .

تسلم اخونا حوذي علي مجهوداتك
المقدرة في التوثيق لعمالقة الشعر
والفن السودانى..

شكرا للاخوات ام احمد وام تسابيح على المرور،والاضافة الممتازة من ام تسابيح..وسنتاول اليوم هذه القصيدة والتى بعنوان( اخوالبنات)
انا اخو البت

اللكعت قرن الخمرة النازة

على وردان الصبوة الراكزة

الجنيات الهازة

صدورن لازة

ورقن نص زى خيط الشله

بالحيل آآآجنى

اى والله

الجنيات الحزمو الجبة

وعرق الشده

عليهم نايه وصبه

قول ما دلَ

رجالا حصدوا الحبه

عيشهم هادو انكال واتعبَا

ومنو كتير فى الواطه انكبا

وباقيهو مصوبر واقف قبه

الحمدآلاف...الشكر آلاف

الحمد آلاف الشكرآلاف

العيش الرقد اصناف اصناف

الولد الكان

عزام

حلاف

ضياف

الرزق الجانا مدلا

الحلق الجاف اتبلا

بالحيل آآآآ جنى

اى والله

الوادى الجانا مترقن

مد جناحو الطايل شرقا وغربا

القبلى بروقو على القلعات اضربن

الدُكن البعدن قربن

فوق صنقور المحلة الطالت كبن

قول للمحلة بيوتك خربن

قول مادل

الحلق الجاف اتبل

بالحيل آآآآ جنى

ايى والله

مرحاتنا شرابهن يوت ما غبن

شبعانات فى الشقل اب شوك‘، ما شبن

الُحُمل ولدن وربن

حلماتن تقلن جرن

فوق سيقانهن كبن

اللبن العاتم فى ضرعاتن جبن

المغصة،ان كان ضرعاتن خربن

القرعة آآآآآ وليد

السعن آآآآ بنيه

القربة كمان كبوها الميه

شوفو النعمة السالت فوق قيزان الرمله

ناس البندر لبن الشاى بالعمله

سمح الخمج الفوق اسيادو

سمح العز المن اجدادو

الجنيات المشو ما عادو

كان بالرده اكان اتنادو

غرب حامد وشرق بله

كانوا بحلبو الضرع الادلا

كانوا بحضرو الخير القدحو معلا

الجنيات ما كفرت بنعمة الله

بالحيل آآآآآآ جنى

ايى والله

ذات فى يوم

والغيمة تهتف مطرا نقع

فوق نوار الطلح الفقع

ريحة البرم ان جاتك

عطرا فايت

خمر الفوق اردافا مجدع

شفنا الوادى يقشقش فى دمعات الليل

والتعل الشايل بدا يتفقع

تلب حامد فوق مخلوفة اب زور واتريع

طلق الرسن اب زمة وسوا خبيبا بدع

هود فى رقاب الصى

لاقوهو تلاتة زبيدية

خالفين سيقاننم فوق السنكيت

ورقاب ألبل بيناتم مرخيه

محجوبات بالخرز الفصلو السوميت

كل واحد درقة وسيف وطبنجية

وباقى جرابهم مليان دلميت

الجنيات اتقبلو وضاقوا الحارة

وضاقوا المره

وكان حجازهم صقر الجو

حامد كان عارفين

ضاقوهو رجال قبالكم

شوفوا ارزاقكم اخير من ضو

حامد عوج الطندب آآآآآ وليدات

عوج الطندب

نار القصب الهبلت ما بتعدلو

شوفوا شلوخو

مطارق رقدن

وكل تلاتة ،يمين، سياف اتقبلو

حامد راضع مفخ التنك البدبد من ضرب اهلو

نهارا.. ركزوا تمام واتعدلو

حبوبا القارع مادله

ولدن ما ختالن زله

شن قولك فيهو

عليك الله

بالحيل آآآ جنى

ايى والله

وين مراتع الدرت الباسط دايما ببكى عليهن

وين بنوت الحله

البُكر عصرا بدرى يسون فى شاهيهن

بعد الليل ما يهود

ونحن نهود

عاد اماتن ينادن ليهن

نمشى على القيزان نتقادم

اقيس الخطوة مع التاتاى ومشيهن

والله البعد الحاصل ما نساهن

وحاتكن،فى قمراتنا بشوف ويشهن

الا النضم اب غنه

اللهج السكر وين بلقاهو

بنات الريل الدوب ليهن

الخوف يا ناس

كان يبقى الشوق الحاصل بينا

معشعش فيهن

مقنع سابل وين بلقاهو

وطرفا زابل وين بلقاهو

وعين بتدنقر من واليهن

الوجنات الشعن بقن

ودالعين النايم زرقن

مو زايغ ،رسيان وميقن

زولهن كان خدران ومحقن

من الشوفه عروقو يطقن

كان الدنيا بى الصح تتخلا

كان بركنا معاهن فى رملات الحله

الا كمان بنشوفا مذله

الجنيات الغابت جابت

انت الجيب

بس قايلو قميص افرنجى وكرتونات كرمله
لا لا وحاتك

حاشا وكلا

ديل يوم عادوا

اتلافوا الجاهل بحقوق الله

ديل كم لحقوا البشهق

ضايق،وداووا العله

الولد الجايى، حقايب سفرو تقال

تقال تقال

من جنس كتاب ومجله

الحكمة،النضم اياهو الكان

الحكمة،الولد اتوضا وصلى

عادة البلد،الدخلت فيهم سكنت

سكنت ما بتتخلا

نحن كمان طارين الحله

ودرنا الطله

نشيلا معاهم فرحه وميته

حلاة الموت كان فى عيديه

من اشعار ودبادى

من اشعار ودبادى

بت الخير..يجيك الخير

رد: من اشعار ودبادى

هوى يا وليد

رد: من اشعار ودبادى

مركز الهاشمية(مدح للسيد محمد عثمان الميرغنى)

رد: من اشعار ودبادى

رد: من اشعار ودبادى

اخو البنات