اسماء جعلية خالية من الدلع

أسماؤنا السودانية القديمة الأصيلة، كان من الصعب بل المستحيل بأن تأتي لها باسم دلع،
فمهما بلغت براعتك فلا يمكنك أن تدلّع أسماء مثل: بلة، الطريفي، أب جيبين، التجاني،الجمرى.
الخزين، عجبين، الزبير، أب كساوي، الصديق، فضل المولى، فتح الرحمن، عبد الجبار، البشير،
عكاشة، الجنيد، تيراب، الريّح، الماحي، حمد النيل، حسب الله، جبارة الله، أب سقرة، البي كيفو،
تميم الدار، جبر الدار، عمسيب ، الجاك، الجزولي وغيرها..
عليْ النعمة تحاول تدلع أي واحد من الأسماء الفوق ديل إلا ضهرك كع ينكسر، لأنها أسماء قوية زي
الخرسانة.. أسماء مضببة ضد التدليع زي العكاكيز.. أسماء أهلنا زمان أسماء رجال وما في أي
طريقة لتمييعها أو تدلعيها، حتى النسوان عندنا كان أسماهن صلبة ومحتشمة، وتنافس أسماء الرجال
في قوتها وخشونتها، فنلقى أسماء مثل ست النفر، الساتر الله، أم حقين، البتول، سكينة، التاية،
نفيسة، النخيل، أم زين، بت الجقمتها وغيرها، والواحدة حتى لو أهلها كانوا متحررين، بالكتير
يسموها الصندلية، ومع ذلك ما تقدر تشوفها أو تشم ريحتها، النسوان كانن بنات خدور.. . والراجل
ذاتو بيكون معجب باسم أمو المحتشم وتلقاهو يحلف بيهو في الصغيرة والكبيرة فنسمع: أنا ولدك
آآآ ام زين .. أنا ولدك آآآ البخيتة.. هسه أولاد الزمن ده يقولوا شنو ويحلفوا باسم منو..
معقول الواحد يقدر يقول: أنا ولدك يا عبق أو أنا ولدك يا رنا؟
أهلنا الكبار الزمان كانوا ما بعرفوا الني وكل شيء عندهم نجيض. الني بدوهوا النار..
عليْ الطلاق تنطق الاسم كده لما شعرة جلدك تكلّب، وتتنفخ وجضومك تتورّم من العجب والخيلاء بهذه الأسماء

مش زي أسماء الأيام دي، شدة الأسماء ما بقت مايعة تقررررّب تخت الاسم في التلاجة عشان يجمد
ويبقى اسم رجال.
شوفوا الأسماء دي، وائل، وضاح، وحيد، وليد، وديع، ربيع، مازن، تامر، لؤي، راني، هاني، نادر،
حمادة، طلال، أيمن، مهند، إيهاب وغيرها.. والأسماء دي رغم مياعتها لكن الناس برضو دلعوها، فحصل
ليها ما يعرف في اللغة بتمييع المايع وهو محرّم لغوياً فسمعنا ب: هنو، ولي، مزوني، تموري، عموري،
ندوري، أيموني، هنودي، هوبة وغيرها من الأسماء المايعة الما شادة حيلها..
وكذلك غناهم كان غناء رجال وأصواتهم كانت أصوات رجال، كان المغني يغني الليل كلو بدون مايك
وصوتو تلقاهو زي الجبخانة
وكلابنا برضها بقت مايعة وكسلانة ومسكينة وما بتهوهو في زول، الكلب تجي ماشي فوق ليهو ما يقول ليك هوْ،
ولو بقى نشيط خلاص، يقوم ينبح فيك بتهوهوة واحدة تاني ما يزيدها، كأنو عامل ليك مس كول.. مرة ناقشت
مسألة عدم مبالاة كلاب اليوم مع واحد كلب، فقال لي: زمان كان بيطغى الحماس والانفعال على أدائنا ككلاب،
وكنا بننبح في الفاضية والمليانة، لكننا لما شفنا الحكومة ما بتدفع لينا مواهي وحاولت تستملحنا، قلنا
ما لنا ومال المشاكل والعباطة الفي الفارغ.. ونحن الآن في ظل نظام عالمي جديد ولن ننبح ببلاش لأنو في
حاجة اسمها الم لكية الفكرية وأصواتنا دي لازم تقيّم التقييم المناسب
واللي عاوز ليهو (هوت دوق) يشوفوا بعيد مننا، نحن خلاص ودعنا عهد العباطة والتهور.
فقلت في نفسي: يا حليل زمان وأيام زمان.. لما الكلاب كانت بتسك الشفّع وتشرط هدومهم.. الآن نبيحها
ذاتو بقى مشروط.. زمان تجي ماشي تلقى الكلب منتظرك في الطريق مليان جسارة وعنفوان ولسانو حالو
يقول يا دنيا ما فيك إلا أنا، أما الآن فالكلاب بقى مغضوب عليها وضالة ومهمشة وبتعيش على حافة النسيان
ولو نظمت نفسها كويس ممكن تدخل الغابة أو تقيم في فنادق وتعلن التمرد وتعمل ليها حركة تمرد وممكن
تسميها حركة تحرير الكلاب وتختصرها في كلمة (حتك)..
يا جماعة الكلام ده عيب في حقنا وما بصح في حق شعب عاش (عالماً) بين الأمم .. ويا جماعة كفانا تمييع
أسماء وتمييع فحولة وتمييع قضايا وتمييع مياعة وخلونا نرجع لقديمنا ونخلي
في البنسوي فيهو ده، الكلام ده بالحيل ما سمح في حقنا ..
ويا حليل الشعب السوداني الفضل..
نحاول معاك غايتو
الخزين=خزنة
عجبين=جيبو
الزبير= زوغ منو
أب كساوي=برضو زوغ منو
الصديق=مافي
فضل المولى=فضول
فتح الرحمن=فتوح
عبد الجبار= ده ما اسم سوداني -عالمي ده-
البشير= يا ريس
عكاشة= زوغ منو
الجنيد=مافي
تيراب= Turbo
الريّح =ريحة
الماحي= مح مح
حمد النيل= حمودي العسل
ست النفر: توتا, تستس
البتول: توتا, بوبا، بوببا
سكينة: سوكا
التاية: توتا
نفيسة: نوسا, أوسا
النخيل: نانا
أم زين: زينا (بلهجة شامية)
طبعا معظم الناس بفتكروا اسماء زي وائل ولؤي وغيرها اسماء حنكشه
مع هي من اسماء الاسد ... والاسد ملك الغابه مشهود له بالقوه وعدم المياعه

حبوبتنا كانت لما يجوا سموا مولود .. بتقول دقيقه اجرب الدعوه اول في الاسم ( الدعاء عليه )
تبدأ تجرب تعال يا ... تجيك الطاويه حبالها .. حتي بعد داك تقول خلاص سموه

هسي اسمي المافي كلو كلو دا كيف معاك ؟

في بعض الاسماء لديها اسماء دلع غير مشتقة منها ولا ادري هل سودانية ام تقليدمثلا :
فاطمة : بطة
مصطفى : درش
ابراهيم : أبو خليل( دي ممكن ليها سبب)

ههههههههههههه

موضوعك جميل وواقعي للقاية

لاكن يابو الشباب العولمة يا تلحق يا ماتلحق

والناس جاررررررررية في الفارغة و المليانة

مشكور وتقبل تحياتي ياود حسن طة