ذكريات طفوله

جمعه مباركه عليكم
وانا اتجول داخل صفحات المنتدى فجأه لقيت نفسى سارح مع ذكريات البلد والطفوله

الجمعه دائما كانت اجمل يوم نقضيهو بين الاهل والاحبه كانت فرصه لاجتماع الاسره على الغداء ومن غيبة الشمس الواحد يطلع يمشى يشوف الشله خبرا شنو كنا نجتمع فى ساحة المسجد ووقتنا مليان بالحكاوى والقصص وبعد صلاة العشاء كنا نتصيد عمنا ودكبور يرحمه الله طبعا هو مؤذن المسجد ونجبره على الجلوس معنا ويمدح لنا كان صاحب صوت جميل وفى جنبيه روح الشباب رغم ان عمره يفوق ال 70 سنه
تذكرت عندما كنت طفلا وأنا تلميذ فى سنوات الابتدائى الاولى كنا نقرأ بمعهد التربيه نهر جماع

وكنت اسمع بالنار والجنه ولما أطلع من المدرسه اشوف كل يوم دخان يتصاعد من جهة مصنع النسيج بالقرب من المقابر اها الشئ ده أكد لى انو دى النار وظللت اعتقد بل متأكد انو دى فعلا النار البحكى لينا عنها المدرس فى حصة الدين ومرت السنوات وانا اكتم اعتقادى ده ولم أتجرأ واناقش فيه احد حتى كبرت واكتشفت أن النار ابعد من كده والدخان الكنت بشوفو كل يوم انما هو محرقة نفايات شندى

وتذكرت انى زمان وانا طفل كنت بفكر فى علاقة امى وابوى وكنت متأكد اعتقاداً انو ابوى اخو أمى

وتذكرت انى كنت بحب الخريف لانى العصر بكون راقد فى الحوش واعاين فى السحاب وكل ما اشوف سحابه وتعجبنى أتخيل روحى جالس هناك فى طرفه وخالف كراعى وانا اعاين فى قريش من فوووووووووووووووووق

تذكرت ناس كتار بحبهم شديد وانا هسه ماعارف اخباهم شنو

يلا يافرد كل واحد يحكى لينا عن زكريات الطفوله الحلوه

وتزكرت انى زمان وانا طفل كنت بفكر فى علاقة امى وابوى وكنت متأكد اعتقاداً انو ابوى اخو أمى

هههههههههههههههه Smile

عندي قصة لذيذة مع الدراما دي

الله يبارك فيك يا عبدالله
وجمعة مباركة عليك
وموضوعك شيق جدا
ح نجيك بي مزااااااااج

والله يا ابو روان بقرأ في كلامك وبضحك لانى
اتزكرت حاجات كتيييييييييرة حلوة وجميلة
شكلت لوحة وجدان واحاسيس ام تسابيح كنت
اعتقد انى نسيتها ,, لكن بمجرد قراءة عنوان الموضوع
رجعت لأحلي سنين عمرى
ولمن كنت صغييييرة
بلعب في التراب
تسلم ابو روان وجمعه مباركة عليك

ذكريات لذيذة .. ياحليل زمن البراءة قلت لى قايل ديك النار البيتكلم عنها الأستاذ ؟ ذكريات طفوله Icon_smile

وخيالك مع السحاب ذكرنى الرسومات الكنا بنتخيلها على وجه القمر ، واصرار كل واحد منا على أن الرسمة التى تخيلها هى الأصح وهى موجودة على القمر ...
هههه غايتو موضوعك دا حيخلينا نتذكر جنس حاجات !

نزار
ام تسابيح
ام احمد

مشكورين ويلا جيبو العندكم عشان فى حاجات كتييييييره حلوه حانحكيها ليكم

والدعوه مفتوحه للجميع

تسلم ياابو روان ونحنا جد سعيدين بكتاباتك الحلوة وطريقة سردك الاحلى...

وزكريات الطفولة اكيد ليها مساحات فى وجدان كل منا ودا بوست حايخلينا نرجع للزمن الجميل..

دمت ياراااائع....

سلا اشكرك جدا على كلامك الراقى

ويلا افتحى دفتر الزكريات وجملى البوست

اتمنى ليك السعاده دوما

أحييك يا أبو روان على البوست الجميل ده
وحقيقه ذكريات الطفوله كتيره ولزيزه ذكريات طفوله Icon_lol

لماتحمله من براءه ونقاء فطري
وأذكرمن طفولتي إني لمن يختو الصينيه بتاعة الوجبه مثلاً في الفطور ولمن يكون في كم طبق ببدا بواحد واحد ولمن أشبع منه أمشي للطبق التاني وأقول مثلاً الحمد لله من الفول..وأقبل على طبق الطعميه وهكذا ذكريات طفوله Icon_queen

وتاني موقف ذكرتو لي الوالده قالت لي مره كانت شايلاني وأنا صغيره لسه ماعرفت الكلام كويس
وكانت في بيت عرس وأنا أبكي وأقول نيَه00وأمي تسكتني..وتاني أبكي أقول نيَه وتسكتني وتطلع وتدخل بي00قاموا الناس قالوا ليها مالها دايره شنوطحنيه ولاَ شنو أمي تقول ليهم آي00وماكان في طحنيه الوقت ده
المهم في الآآآآخر لمن أمي روحها حرقتها قالت ليهم دايره لحمه00قالوا ليها طيب الجاب اللحمه لنيَه شنو
ذكريات طفوله Icon_lol

أمي ضحكت وقالت ليهم لمن أكون بطبخ في اللحمه بتقول دايراها أقول ليها نيَه يعني ما إستوت وأنا شبكت فيها نيه نيه لللحمه

المكان الصف الرابع ابتدائى مدرسة معهد التربيه نهر جماع

الزمان سنة 1984م

قبل امتحانات الاجازه الكبيره بشهر تقريباً ونحن فى الفصل جانى زميلى وقتها وصاحبى لاحقاً
(حسن على حمد )
وقال لى ياخ البت دى على طول شايله مننا الاولى ياخ تعال المره دى نقلعها منها
واتفقنا ووضعنا خطط المزاكره والبت المقصوده ولا جايبه خبرنا وحتى الان ماعارفه انو فى ناس فى يوم من الايام عملو جاهدين يقلعو منها الاولى وانتهى الشهر وانتهت الامتحانات وجات النتائج وجينا نحن فرحانين متوقعين النصر فى الرهان الغير معلن وبدا صوت الاستاذ ابراهيم المليك يدوى

الاول نفيسه محمداحمد بحر
الثانى عبدالله حسن بشير
التالت مشاعر عزالدين
الرابع
الخامس
والسادس
و
و

الخمس وعشرون حسن على حمد
ههههههههههههه ومن اليوم داك صارت نكته بينى وبينو وكل مانشوف بعض نموت من الضحك ده شنو ياحسن حالتنا دى ماوريناها اننا منافسنها لو عرفت كان حصل شنو

ههههههههههه
زيزو ياروعه اقصد يانيه ما احلى زكريات الطفوله
شكلك مليانه زكريات يلا اوعك تقيفى قولى العندك كلو

السلام عليكم :ياليت لو الواحد يقيف عمرو في مرحلة الطفوله ومايكبر اكيد حتكون الدنيا في عيونه نقاء وطهر وصفاء وحيكون شايف الدنيا ورديه وكل مااتزكر الايام الحلوه دي بقول يازمن وقف شويه واهدي لي لحظات نديه وبعدها شيل باقي عمري شيل شبابي وشيل عينيا

واتفقنا ووضعنا خطط المزاكره والبت المقصوده ولا جايبه خبرنا وحتى الان ماعارفه انو فى ناس فى يوم من الايام عملو جاهدين يقلعو منها الاولى

هههههه برضه ليكم اجر الأجتهاد ... لكن انا حأكلم دكتورة نفيسة بالحصل زمان .
وحكاية الأولى دى ذكرتنى موقف حزين وكان درس لى ..
لما دخلت المدرسة كان عمرى خمس سنين وقبلونى على اساس مستمعه .. فى امتحان الفترة الأولى جيت الأولى .. البت خلاص راسها كبر وقلت أنا اشطر واحدة ذكريات طفوله Icon_queen

ونمت على كده ... وجات نهاية السنه وطلع ترتيبى السابعه ، ودا كان أول درس عملى فى من كد وجد .. ذكريات طفوله Icon_smile

حبيبنا ابوروان..

بمناسبة المدرسة انا دخلوني سنة أولي مستمع
وبحكم الوالد معلم فى المدرسة الأنا فيها (ود
أستاذ وكده) يدخلوني فصل سنة أولي من الصباح
أقعد شوية فى الفصل واجري فصل سنة تالتة
لما أحتارو فيني وخلوني أكمل سنة الإستماع
مع ناس سنة تالتة Smile

وبتذكر كان فى واحد فى الفصل ما بتذكر
اسمه منو لكن شكله متذكرو ممكن أرسمو ليكم
بحب أقعد جنبو لما الاستاذ يسال سؤال
بقوم يقول لي الإجابة وارفع يدي سس سس سس سس
والإجابة تطلع صاح صفقووووووو لي كلمة صفقوو لي
دي كانت بتريحني راحة Very Happy

..

الله ذكرتوني احلى ايام حياتي وطفولتي كانت مليانة بالمواقف المضحكة

بتذكر زمان طوالي لما اشوف القمر اقول لما اكبر اشتري سلم طوييييييييييييييل عشان اطلع اشوف فيه شنو ... Very Happy

وماما بتحكي لي عن طفولتي بتقول لي كنتي شيطانة شديد مانزور ناي الاتجري على غرفة نومهم وهاك ياريحة تجينا هدومك معطونة بالعطور Razz

ومن المواقف مرة زرنا وحدة قريبتنا وهي وامي في المطبخ يعملو في الغداء سمعتها تقول لامي انا ماعندى حلل كتيرة
قمت مشيت لي جارتها ودقيت باب بيتهم وقلت ليها خالتو ماعنده حلل لو عنك ادينها والمرة جابت حلتين من بيتها وقالت لي قريبتنا ديل كفاية ولا اجيب تاني !! Wink

( تاني برجع)

مشكورين ياغاليين على المشاركات الحلوه

الذكرى التى خطرت على بالى اليوم ذكرى من زمن الشقاوه

فى الشارع الذى كنا نسلكه لنصل الى دكان الحاره فى منتصف هذا الشارع كان يقع منزل رجل كبير فى السن وله ابن اسمه عبدالسلام هذا الابن كان مدلل عند ابيه وكان يقطع الطريق على كل الاطفال الذين يمرون عبر هذا الطريق كان يضربهم ويخوفهم وفى يوم من الايام كنت ذاهب الى الدكان مع بعض الاطفال الذين هم فى عمرى وكما كنا نتوقع ظهر لنا عبدالسلام ليمارس معنا هوايته المفضله وبدأ يفتعل الاسباب ولكن بعون من الله تغلبت انا عليه وضربته ومن وقتها انقلبت الأيه فصار يخافنى جداً وصار عندما يرانى يلوذ هارباً داخل المنزل كما أننى صرت أتلذذ بضربه أمام الاطفال الذين كانو يموتون رعباً عندما يرونه
ومرت الأيام ومرت الأسابيع وربما الشهور وأنا اقطع ذلك الشارع جيئةً وذهاباً وأنا أحمل راية النصر ولا يضاهى احساسى الا احساس صلاح الدين الايوبى وهو عائذ بمفاتيح القدس الشريف
كنت أعلم أن والد ذلك الطفل لن يترك الأمر يمر بهذه السهوله ولكننى كنت أطمئن نفسى بأن والده لايقدر على اللحاق بى اذا لزم الامر وأطلقت بيرقى للهواء فهو رجل عجوز ولا يستطيع الجرى أما ابنه فأنا كفيل به واذا تعرض لى فسوف يرى منى ما رأى اسماعيل باشا عندما رمى ذلك القليون الملعون فى وجه جدى

ولكن للأسف نشوة النصر هذه لم تدم طويلاً ففى عصر يوم من الأيام جيت ماشى بذلك الشارع مزهواً بنصرى على ذلك العبدالسلام ورأيت والده جالس جالس فى ظل الجدار وهو غالباً مايقضى أوقات العصر على هذا الحال
عندما رأيته انتابنى شئ من الخوف والحذر وشعور غريب مثل ذلك الشعور الذى يحسه غزال صغير يريد ورود الماء ولا سبيل للماء الا بمروره عبر عرين أسد جسور وأمامه خيارين اما ان يرد الماء ويذهب للبحث عن وجبة عشاء واما ان يصبح هو نفسه وجبة عشاء لذلك الاسد الجسور وليس امامه من خيار ثالث
عندما اقتربت منه نادانى أزيك ياوليدى انت وليد حسن بشير ؟ كيف حالك أبوك كيفنو ؟ ماشاءالله ماشاءالله تعال نسلم عليك ... وأنا المسكين صدقت واقتربت ببراءه منه لاسلم عليه وعندما مددت له يدى كــــــــــــــــــــــــــــــــف وكأنى مارد خطفنى وهوى بى فى مكان سحيق وعينكم ماتشوف الا النور وأخرج الحبل الذى كان قد دسه وراء ظهره وتغيرت لهجته تعال هنا بتدق عبدالسلام ولدى قايلنى مكسر ومابقبضك والباقى ما حاأحكيهو ليكم لأنكم يمكنكم تخيل شكل ذلك الغزال الصغير وقد صار الأن بين فكى ذلك الأسد الجسور
وبعد أن أفرغ على ظهرى كل مافى صدره من غل ونوايا مبيته تركنى وأنا لا أقوى حتى على البكاء وقمت أمشى راجعاً الى بيتنا وعيونى ترى نجوم واقمار واشكال غريبه تتطاير امامى كما اننى قد رأيت فى تلك اللحظه قوس قزح بالوان تختلف تماماً عن التى عهدناهو بها عندما تصب المطره ونجرى ونلعب
على كل حال وصلت البيت ودخلت دون أن أحدث اى حركه تلفت انتباه أهلى لأننى لا أريد لأحد أن يعرف ما قد حدث ولم أحكى لأمى ولا لأبى وكل مافعلته فى تلك الليله هو تحسس ظهرى فقد كان ياله من حبل لقد ترك على ظهرى أثار كتلك التى تتركها عجلات سيارات الفيرارى فى رالى الصحراء المغربيه

أحييك اخي عبدالله على هذه الروعة .
وفي طفولة كل منا عبدالسلام وشقاوة شديدة .
هسع انا قت اسلم عليك بس وجاييك مرة تانية بي مهلة شوية .
واتمنى كل الاعضاء يحكوا عن شقاوتهم .

تسلم اخى كبسور على كلامك الحلو

تعرف ياعبدالله ياأخوي ظاهرة عبدالسلام دي موجودة في كل حي وكل مدرسة أساس بين الاطفال ..
وعبدالسلام ده خلى طلاب كتار يابو المدرسة واهلم ماعارفين السبب شنو .لانو كان بحقر بيهم ،يقلع منهم سندوتشات الفطور ،وريال المدرسة ويكفتم .
وعلي زمنا في فترة الطفولة والمدرسة الابتدائية ،كان لازم يكون عندك حماية ،عشان مافي زول يحقر بيك ،اما أن يكون اخوانك او اولاد اهلك معاك في نفس المدرسة ،او ان تكون منضم لي شلة فتوات يهابم الاطفال ،او تكون متميز في الفصل والفتوات يعملو معاك وحدة جاذبة تتوفر فيها الحماية مقابل انك تشرح ليهم ومرات تخليهم يشفو في الاختبارات او الامتحانات .برضو لو بقيت الفة الفصل او علي الاقل نايب الالفة برضو بتقدر تكون في امان مقابل انك الفتوات ماتكتبم لامهرجلين ولا متاخرين .
أنا شخصيا ماكنت بخاف من زول ولم اعاني من عبدالسلام لان ربنا هباني بسطة في الجسم وشجاعة معقولة ومافي زول بقرب مني ،بالاضافة لذلك معظم المرحلة الابتدائية كنت الفة الفصل عشان كدا كانت اموري مريحة .لكن الطلبة التانين كانوا بعانو من عبدالسلام شديد خاصة وانو في مذاكرة مسائية في الابتدائي والمتوسطة .وزكرياتها غنية بالقصص والطرائف ،وكنا لما يكون في مباراة هلال مريخ مسخنة منقولة في التلفزيون ،يقوم بعض الفتوات بعملية اقتحام لي مكتب المدرسين بعد الحصة الاخيرة ويقومو بتعطيل الرتينة وبذلك تلغى المذاكرة المسائية ونجري جري لحضور المباراة والتلفزيون غالبا كان في الاندية شغال بالبطارية ..
دا كوم ولما تجي الاجازة كوم تاني ،فقد كنا ننزل الجناين اخر النهار بعد عودة المزارعين الى بيوتم ونطلع أشجارالنخل والمنقة ونسبب هلع شديد لاصحاب الجناين وفي ذلك الوقت اشتهر احد زملائنا ويدعى عوض الله باستهداف اجود اشجار المنقة والبلح بالطلوع او بواسطة الحجارة وكان المطلوب رغم واحد بواسطة المزارعين في المطاردات ولكنه كان سريع ومابقدرو يقبضوهو وما قدرو يرتاحو منو الا بعد أن نقل والده خارج شندي .

الف شكراً ليك اخى كبسور وأرجو ان تواصل لقد امتعتنى باسلوبك الجميل

الحصة الاخيرة ويقومو بتعطيل الرتينة

ما شاء الله عليك ياكبسور انته من زمن الرتينة هههه

متابع ومستمتع في صمت

ياعبدالله أنكرب وشد حيلك في البوست الجميل دا وانا هسه جيتك ضيف ساكت ماتتكل علي القصة .
الماسي يااخوي انا ماكبير لكن قليص ساكت ،والرتينة دي انت ماعارفة ساكت ،ضاقت عظمة شديدة في زمن مضى وكان سيد الرتينة في الحي لايقل أهمية عن العمدة ،والبصير ومساعد الحكيم والتمرجي ،والاستاذ ..
والحلة كلها بتحترمو احترام شديد ،ولو في أي كرامة ولاسماية الناس بعزموهو اول زول ،وكان في حوجة شديدة للرتينة في كل المناسبات الاجتماعية من افراح واتراح ،وسيد الرتينة كان في نص الحفلة بجي داخل الدارة قدام البنات عشان يتمم علي رتينتو ويشوفا لو محتاجة دايرة هواء ولا كويسة ،وفي تلك اللحظة بكون عندو احساس عالي من الاهمية زيو وذي اي خبير اجنبي .وضمن مهام الرتينة كانت المذاكرة في المدارس واعز امنية كانت عندنا انو الرتينة تتعطل وكان عندنا معاها غبينة وعداوة تقليدية ودائما اصلو مابنتمنى سلامتها خاصة اذا كان في كورة كاس تفك الراس ..
والرتينة من عظمتا كان البت الجميلة في الوكت داك بشبهوها بيها وتلقي يقولو ليك فاطنة الرتينة ،وتضوي زينة ،ويعادل المصطلح قنبلة وشديدة حسب التوقيت المحلي للجامعات اليوم ..
يعني باختصار كدا ياجماعة الرتينة دي ماهينة وبنطالب بتكريمها من هذا البوست ..

مبالغة يا كبسور...والله الليلة خليتنى اموت من الضحك..والرتينة دى اديتا عظمة شديدة...ويا كبسور ما الرتينة براها الدايرة التكريم..حاجات كتيرة دايرة تكريم...السحارة،المحفضة،حقة الصعود،المجروس،‘كورة الشراب،كوكرع،بابور الجازللطبيخ،تموت تخلى،البرينسة....و....و...وهدوم المدرسة والشنط......

كبسور وحوذى ياسلام عليكم والله ماقصرتو وزكرتونا حاجات جميله وحلوه وفعلا بتستحق التكريم
وانشاءالله نحاول نديها حقها ونحكى زكرياتنا معاها ويتخيلى انو مجرد ان نحكى زكرياتنا مع الحاجات الجميله دى فهذا يكفيها من تكريم لانها عاشت فى زمن لايعرف الطمع ولا الزيف ولا الخداع
والله كلامكم اثار جواى زكرايات جد حلوه بس معليش الوقت لا يسمح ولى عوده وشايل معاى كيس مليان حاجات وزكريات سمحه

نواصل في ذكريات الطفولة وقفنا مابين عبدالسلام الكان عامل قلق لي ناس عبدالله ،وعوض الله الكان عامل قلق للمزارعين ،والرتينة حقتنا حقت المذاكرة العجبت الماسي شديد ،وسيد الرتينة واهميتو العجبت حوذي .ووقفنا المرة الفاتت بعد جينا من المدرسة النهار ومشينا السواقي وحكينا قصة عوض الله .وبنحاول نرجع نلحق برنامج عالم الرياضة قدر الامكان يوميا ولو كان اليوم خميس مابنمشي الساقية ونقعد نحضر برنامج الحان في الاذاعة بتاع معتصم فضل وكان له شعار موسيقى جميل وفيهو مختارات للاغاني ،ياربي في زول من ناس المنتدى بتذكر البرنامج دا ؟طبعا كلكم صغار قدر نانسي عجرم والبرنامج وقف سنة 89 .وقبال الغداء في البيوت بندخل في مغالطة مع الامات والحبوبات في اننا ماعمنا في البحر ويقولوا ليك من شعرك وغبشتك دي استحميت في البحر وطبعا انت بتبقى السماء قريب ولازم تنكر شديد عشان القصة لو ثبتت عليك بتجيك دقة مضمونة من ابوك .
قبال مايختوا الغداء بقيف هنا وحاواصل تاني في الزكريات المرة الجاية .

وقفنا ساعة دايرين يختوا الغداء ،وطبعا ابوك بكون موجود ،والامنية الوحيدة لك ان تمر هذه الفترة بي سلام من واقع أنو حاتتم معاك مراجعة اليوم وبتكون شايل هم يكون في حاجة تستوجب العقاب ،وتاني حاجة بتكون داير تتغدى سريع وتلحق تمرين كورة القدم وبرضو بتكون شايل هم تجيك تعليمات لفترة العصر تحرمك من التمرين ،عشان كدة ماتصدق تشرب الشاي طوالي تقوم تزوغ من عين ابوك .وحتى لو كان مخطط ليك أوامر للعصر حايتلفت ليك ومابلقاك .
والتمارين في الوكت داك مسخنة شديد،ودافوري صاح ومرات بكون التمرين مايعرف بالدكنابة وهنا لايتم التقيد بعدد قانوني للاعبين ولا مساحة الملعب وبكون عادة مثل هذه التمارين فيها خشونة شديدة وربك يستر مايفكوا ليك كراعك أو يكسروك ،ومع المغرب التمرين بنتهي ،ونرجع البيوت .ونقيف مع هذا الرجوع لحدي المرة الجاية ..

يا دوووووب يا كبسور انا عرفت اخوانى
الكبار كانو بكبو الزوقة بعد الغدا طوالي
وبعد مرات ما ينتظروا الموز .. بالذات
لما يكون في شغل في البيت.. زي
درم الحيشان رملة وفتح المجاري
ايام الخريف,,ولايكون في نقل طوب وطلبة..

من طرف **sala35** السبت 3 يوليو 2010 - 21:57

بوست جميل شديد ..

زكرى اليوم زكرى حلوه وطريفه
زكرى من الزمن الجميل
انا واصحابى اتنين عبدالخالق وأيوب كان جننا اصطياد العصافير وما فى شجره سلمت من شرنا وأيوب هو قائد الفريق الانتحارى ده مره قال لينا نمشى الليله نصيد فى روم سماعيل وروم سماعيل للذين لايعرفونه بيت قديم وفاضى ومكسر يقع فى حارتنا حارة الشوكاب وياما نسجت حوله روايات ناس يقولو ليك مسكون وناس يقولو فيهو حاجات عجيبه المهم صاحبنا أصر علينا لازم اليوم تكون المهمه فى البيت ده ونحنا بعد تردد حسمنا أمرنا ومشينا بس بحزر شديد أتزكر كانت الغرف كتيره غرفه تدخل الى غرفه كأن القدر عاوز يورطنا أكتر وكل ما تعدينا غرفه ضربات قلبنا تقول دل دل بعدد الغرف التى تركناها ورانا المهم وصلنا غرفه القدر المحتوم وصاحبنا لهفان للصيد ودخلنا الغرفه ونحن رافعين راسنا للسقف ومقهين وماشايفين التحت رجولنا المهم فجأه الدنيا اتقلبت بينا شئ صريخ وقدر ماجرينا ماعرفنا حل من باب لى شباك المهم ربكم رب الخير أتخارجنا بعد سلة روح وكل واحد بقى يعاين فى التانى ونرجف من راسنا لى رجلينا الدم ماشى وهدومنا مافضل فيها غير حتت سغيييييييييييييييره مامغطيه حتى الحتت المهمه
عارفين الكان موجود وعمل فينا العمايل دى شنو أتاريها كانت فى كلبه والده هههههههههه والله مارماكم فى كلبه والده وخصوصاً فى مكان زى ده

ههههههههه مبالغة .. لو طلع ليكم عفريت كان أخير ليكم من الكلبة الوالدة ذكريات طفوله Icon_lol

.

ههههههههههههههه نعم والله ياأم أحمد لو كان عفريت كان يكون أرحم ونحنا زاتنا فى أوج المعركه كنا قايلنو ده الجن والعفريت باليحكو عنو الناس وماعرفناها كلبه الابعد ماخلاص وصلنا لى بر الامان

هههههههههههههههههههه والله يوم مابتنسى ابدأ
أحكى ليكم سر صغيييير فى اليوم ده ضاع منى شبط محبب لى روحى أشتراهو لى أبوى للطهور من باتا للأسف تركته ورائى فى أرض المعركه ولم أتجرأ وأحاول العوده له الى يومنا هذا

انا والكلاب أصلاً ما أصحاب ولحدى هسه بخاف منها مووووت ..
مرة كنت طالعة مشوار وجنبى خالتى فى العربية وبتتونس بمزااج مع أختى فى الكرسى الورا .. وكان فى كلب فى شارع معين مكرهنى ليك كل ما أجى بى جنبو يسك ليك العربية .. انا طبعاً أول ما قربت لمكانه رفعت ليك القزاز ، وبالرغم من كده أول ما هجم على العربية انا رحت صارخة ودايسة بنزين ذكريات طفوله Icon_lol

.. وخالتى وأختى قعدوا يصرخوا قايلين العربية حصلت فيها حاجة .. ولما عرفوا السبب قربوا يدقونى هههههه وقالوا هم الغلطانين أنهم ركبوا معاى ذكريات طفوله Icon_lol

.
والغريبة لما يكون أخوى سائق نفس العربية الكلب ما قاعد يسكوا !!

ههههههههههههه خلاص مدام انتى ياام احمد شجاعه للدرجه دى رايك شنو لما تمشى السودان اوصف ليك مكان شبطى تمشى تجيبهو لى معاك بس اعملى حسابك الشئ المؤكد الكلبه احفاده مالين روم سماعيل

علي سيرة الكلاب اتذكرت قصتى مع كلبة اولاد الشيخ..
وهم جيران ناس عمى في مويس.. كنت يوم بزاكر مع
اولاد عمى واتأخرت لي بعد المغرب ,, وقويت قلبي قلت
ليهم بمشي بيتنا براي والمسافة كانت قريبة ,, طلعت
من بيت عمى وفجأة الكلبة قالت هو هو ,, وانا فكيت
البيرك,, للتعترنى لاقانى كوم رملة في الشارع وبدل
ما ألف منو طلعت فيهو وادردقت في الارض والكلبة وراي
بقيت اكشح ليها الرملة في وشها وهى تحاول تعضينى
المهم هى اتراجعت وانا قمت واصلت الجرى لحدى
البيت ,, لما وصلت حسيت بي دم في يدى وامى شافتو ..
دا شنو يا بت؟؟ دى كلبة ناس الشيخ..
وكان في سعر حايم في الحلة ومافي مصل في شندى..
ابوى شال خرطوشو ومشي يكتل الكلبة وامى رجعتنى
بيت عمى لانو مساعد طبي ,, لاجراء اللازم.. ولانو ما كان
في مصل في شندى كلها قرر عمى انو يتشونى بالنار..
وكنت سامعة ليك كلمة ((لا يعذب بالنار الا رب النار))
وقعدتا اكورك((لا يعذب بالنار الا رب النار)) واصرخ ولميت الجيران .. وبعد شوية شميت ريحة الشية .. وبعد دا ابوى سافر الخرطوم جاب المصل
وادونى 12 حقنة في صرتى.. ولسة اثر التشة في يدى..

هههههههههه قصص الكلاب دى الليله (سيرة وانفتحت) وانا متأكدة كل الناس عندها مواقف معاها ..

والله يا ام احمد بكتب واضحك براى
زى المجنونة .. وعندى تانى قصة
مع كلبة والدة بس كدى نشوف باقي
قصص الاعضاء..

يلا يا ام سبوحه اعترفى
اهااا الحصل شنو

هووو هووو سيره وانفتحت ...
في يوم من ايام الشباب حلوه الشباب دي مش كده المهم انا ومعاي واحد صاحبي جايين من حفله والساعه 2 صباحا قمنا قلنا نختصر المسافه ونشق المقابر عشان نصل سريع وفي اثناء مانحن ماشيين يطلع لينا كلب ابيض وكاتم صوت مانبح لكن ظهر فجأه من خلف المقبره وصاحبي ده قايلو واحد قام من قبره وقعد يكورك بأعلي حسو الله اكبر الله اكبر لا اله الا الله وانا قبل صاحبي مايتم تكبيرو كنت وصلت البيت ولهسه وصلت كيف ماعارف .

هههههههههههههههه وتانى هههههههههههههه
دى رهيييييييبة بصراحة .. تستاهل جائزة أقوى خلعه .

حصلت حاجات كتييييرة ,,
لكن انتو لو ما حكيتو انا تانى ما بحكى

Mad

يا جماعة والله أنا زول جرسة شديد ومن ما شفتكم تتكلمو عن الكلاب زدتو علي الخلعة العملها فيني عبد العزيز ...
المهم زمان وأنا طالب في الإبتدائي كان الطرق بتاعتنا كلها كلاب وكنت ما بقطع الطريق كان ما قطع معاي زول ... واليوم داك وأنا ماشي المدرسة مع صاحبي فجأة كدا شال المفتاح بتاع الدرج بتاعي وما لقى يرميهو إلا جمب راس الكلب والكلب في سابع نومة ... ودا أخطر كلب في المنطقة دي في الزمن داك وكنا بنسميهو هجام من كثرة النوبات القلبية التي كانت تنتاب كل من يأتي بهذا الطريق ... المهم صاحبي جدع المفتاح من بعيد جمب راس الكلب وقال لي كان راجل أمش جيبو ... وشوفو يا جماعة الجرسة بدت ... لكن القصة جابت ليها كرامة ... المهم الواحد يتصرف يجيب المفتاح بأي طريقة ... وفي لحظة أتتني فكرة جنونية ... أخذت أحبو بهدو على أطراف أصابعي حتى وصلت بقرب رأس الكلب وهو في سابع نومو لا يدري بما يحدث حوله ... مددت يدي بهدوء لكي ألتقط المفتاح وأنا أنظر إلى الكلب في رعب وأسأل الله أن لا يستيقظ ... ولكن الكلب إشتم رائحة التوم والبصل على يدي و ... و فتح عينيه , و ... هووووووووووووووو صاح الكلب ... ورغم أنها هوهيوة ذهول ورغم كل ملامح الخوف التي كانت ترتسم على وجهي ... كلانا فرّا هاربين من هول المفاجأة ... وكانت هذه هي المرة الوحيدة التي أرى فيها هذا الكلب يجر أزياله هارباً .