توبنا السودانى

كتب عنه من كتب .. وتغنى بجماله وحشمته من تغنى ..

مدحه البعض وذمه آخرون .. تمسكّن به من أحببنه وهجرنه من أبغضنه ...
أنه التوب السودانى بضعة أمتار من قماش (تلتحف) بها حواء السودان .. وتلتحف معها حضارة وتاريخ شعبها ...
تختلف موديلاته وأسعاره ولا يختلف فخرها وعزها بإرتدائه ...
أنه رمز وهوية فلماذا يراه البعض سبة وتخلف ؟

الثوب السوداني زي اصيل وتراث قيم نعتز ونفاخر به لكن ياام احمد العبايه الواسعه والطويله والنقاب حشمه اكتر

هو جميل بس ماحشمة لانو ملون ومزخرف ويبين تفاصيل الجسم
ومابأيد لبسو في الشارع ومافي مشكله لو في البيت او قدام النساء .

الأعزاء ابو فادى وأم فادى أسعدنى مروركم وتعليقكم ..
الحشمة فى الزى بيد من ترتديه من أرادت أن تلبس عباءة محتشمة فعلت ذلك ومن ارادت التبرج ضيقت عباءتها وأكثرت فيها من الزخارف .. وقد رأينا هنا بعض العباءات التى تصف الجسم ولا تستره ..
كذلك حال الثوب من أردات الحشمة لبست زيها الشرعى الساتر مع الثوب ومن أردات غير ذلك فعلت .
والزى عموماً مسألة ذوق واختيار شخصى لكننا نناقش هنا المعانى التى يحملها التوب السودانى ، ولست بصدد من يتخلين عنه لأى سبب .. لكنى أعتبره رمز وأكره أن ينظر إليه بدونية .
ولكم ودى .

اختي ام احمد نعم التوب السوداني من ناحية هو رمز سوداني وتراث لكن من الناحيه الدينيه ليس اكثر حشمه من العبايه الواحده ممكن رجليها تظهر حتى ولو كان التوب طويل ومرات تلقي التواب واقع من راسها وشعرها كاشف لكن انا لما جيت البلد دي اول مره عجبتني شديد حكاية العبايه بشرط انها تكون طويله وواسعه وكمان عجبتني حكاية النقاب وانا من قلبي بشيد بأم فادي لارتدائها النقاب فقد شبت عليه وعموماً اهم حاجه تكون القلوب نظيفه واللبس مافاضح والباقي هين

ام احمد تحياتي كلامك صاح في حتة انو العباية ممكن تكون ماحجاب لو اتزخرفت وبقت ضيقة وانا معاك في حتة انو التوب زينا الجميل اللي يميزنا عن غيرنا من الشعوب لكن انا بشوف انو مايتلبس في الشارع خاصة هنا في السعودية لانو بكون الساعة ديك شاذ ملفت للنظر ....

يسعد صباحك بكل السعادة ام احمد ..

مدونة حنين مهيرة ..

دايره أكتب للجميلة اللابسه توبها ومستقيمة
والكتابه بتحلو عن توب في الدواخل ليه قيمة
توب بيميز سر جمالنا وكيف بيزيد فينا العزيمة
وتوب بيستر لي عروضنا ولي جراحاتنا الأليمة
توب بيزيد عزتنا ويربط لي علاقاتنا الحميمة
توب موشح بي شرفنا وزايده أخلاقنا العظيمة
وبالزراق والطرقة ببدا وببدا عن التوب مسيرة
من زمن حبوبة زينب ومن زمن رابحة ومهيرة
بي تيابن سطرن معنى الشجاعة وديمه كاسرات المسيرة
في المعارك جوه قالن وفي الحرب صالن وجالن
جرتقن وطن المفاخر ولبسنو كمان حريرة
ولابسه سودانية تعجب في الأبيض والجزيرة
وحاشا ما بتتبرج أبدا رغم كم عاشق أسيرها
توبنا عنوان لي وطنا وتوبنا لي اسمو بنصون
وداك ضراع عبلة طار والشفون
كان حداد القرشي توبنا والمفستن والمطافي الزاهي لون
يشبه الوهاج في حمرتو كيف بيسحر للعيون
توب بيعجب لابسه أم عرضا مصون
جننت فنانا لمن قام يردد
غنى القمري على الغصون
توبنا رفعة وتوبنا عظمة وتوبنا في التاريخ معزة
توب بيلهم للفوارس يوم نحاس الحرب رزه
توبنا في الخرطوم بيعجب وتوبنا عند شايقية عزة
وتوبنا ملهم للشجاعة
وما اتحرق قلب الدخيل لي قلبو جزه
ولي بديري وبتو زينه وجعلي شايل سيفو هز
للبطان واقف وراكز حاشا ما قالولنا فز
وتوبنا في أم درمان خليلنا وطهر نيلنا وومجد عزة
وفيهو لون في السمحة باين
باقي زي لون الرتاين
في الضواحي وفي المداين
توب بيميز لي بناتنا
وتوب بيلهم لي شعرنا
ونحن نفخر انو كان التوب قدرنا
توب بيزيد فينا السماحة وكيف بينور لي عمرنا
ولما نلبسو
مابنقول ياناس فترنا
بنك معلومات هو توبنا وتوبنا هو الهزاز وغالي
توب بيجمل للحبيبة وللجميلة الزوقها عالي
وتوبنا جاكار أو مراية في أم خديدا زي مراية
بيهو تزدان المحافل بيهو تقدل سمحه جايا
زاينة عرضها صاينه عرضها رايقه محمودة سجايا
والجمال في توبنا أبدا زيو مافي
الأمان ناسج خيوطو بتلقا في قولة عوافي
توبنا كان عودة نميري وتوبنا في البترول مصافي
وتوبنا جاكار ولا توتل توبنا كان نجدة ومطافي
زي هلال مريخ في لونو
والجميل عاجبنا لونو
لبسو ورا الناس فنونو
الجميل يالله صونو
أب قجيجه الزمنو ناضر والأمير بالفتنة باهر
كاسي زهراتنا النواضر والملاك الفيهو طاهر
يوم تجيك لابساهو تقدل الله قادر
والله قادر
توبنا في المليون مربع بالمفاخر كم بيجود
لابسه نوره ولابسه عشه وحتى ميري الفي الجنوب
توبنا بيلهم للحماس لم تزداد الخطوب
وليهو غنى الشادي ردد
شوف عيني الحبيب بالحشمه لابس التوب
والتوب زاد جمالك زينه يا المحبوب
توبنا عنوان لي وطنا ويعكس الفن والأصالة
توب مغطي الراس وساتر لي أم رشيم زايد جمالها
توبنا زي هيبة جدودنا الفاتو بي غادي الرجالة
فيهو من تاريخنا عزة وفيهو من معنى البسالة
فيهو فردة من بلدنا وفيهو من لندن رسالة
توبنا عزنا ياشموخنا وحشمة في الذوق أم نفايل
ستو سودانية حرة وجملت كل المحافل
توبنا قدلتنا وسماحنا وتوبنا كم بالعزة حافل
وأسمع المثل البيقول لك
في تياب العزة رافل
فيهو زولا سحرو زايد زي غزالا فر جافل
ولم وجهو ينور ويلمع القمر من نوره آفل
شوفو كيف التوب محشم يوم تجيك لبساهو عشه
وتوبنا عند الكل بيعج زي خريف العينة رش
وزي أبوي عز الليالي قام وقف لي ضيفو هشه
وعندو تور مضبوح وجاهز قام وقف صينيتو عشا
وزي وطنا البابو فاتح للغريب سوفاتو ممشى
ولم نحن لعبنا شدت
توبنا بيه وصلنا ميس
ولي حرير السمحه ساتر تحتو سوميطه وقصيص
توب بحفل لي عروسنا وفوقو يلمع قرمصيص
وللعروس زايد جمال وتلقى في ساحة الرقيص
وتوبنا جرتق وإرث خالد توب ملفح بي العريس
وشوف مصر البيضا خايل في أم زمام ست النفايل
توبنا مصدر فخر لينا وتوبنا من سودانا شايل
روعة النيل في الأصايل
والنخيل بي عزه شايل
توب بيرفرف زي علمنا وتحت فرع البانه مايل
وده الجمال الأصلي زايد وليهو دايما شوقنا طايل
والفراد في كسلا تعجب لابسه دي الشامخه وأبية
شايله من القاش جسارة وفي الفراد تلمع مراره
سمحه عاجبانا البنية
فيهو من توتيل شموخنا ودي أم شعورا نابضه حية
لابسه فوطتها شايله قهوتها أدت الناس التحية
شايله من دقنه الجسارة
هدندوية هدندوية
والجمال في جبلنا مره
لم لابس توبو مره
ولابسه كلتوم لابسه ميرم
وعزه عند آمنه ومسرة
ألهمن فرسان بلدنا وكل واحد سيفو جر
وللضيوف واقفين يسالموا وكل واحد قدحو بره
يفدوا للوطن المفدى وكل زول بي وعدو بره
توبنا يافرح القبيله لابسه في بحري الجميله
في المحافل توب محفل في البديرية الأصيلة
داك مخطط وداك ساده
وداك مورد زي زهورنا الفي الخميلة
وداك أبيض لونو ناصع زي قمر في داجي ليلة
توبنا جرتق وتوبنا مقنع في العديلة
توب مفلفل أو مطرز
أو مفستن كاسي توب أم زين أسيسا
لابسه فاطمة وديك رية ولابسه ست الذوق نفيسة
عاقلة واعية وعاقلة كالدرة النفيسة
بي ثقافة ووعي شامل كيف تآنس لي جليسها
ومهما يبدع فيهو قلمي ومهما أكتب فيهو ياما
مابتوفيهو القصايد توبنا في السودان علامه
توبنا مجدنا واعتزازنا وتوبنا مصدر للكرامه
توب بيشبه طهر نيلنا ومعنى للعز والشهامة
حشمه فوق

التوب هو تراثنا وعزنا وحشمتنا
نحن ما ننظر للتوب من المنظور السعودي
وفعلا بكون شاذ فى الشارع السعودي
وملفت النظر
ننظر للتوب من نظرتنا السودانية بت الخالة وبت العم
والجارة ونسوان الحلة ولم نري فيهم الا احتشام
وطهر ونقاء وعزة وشموخ
كم في ناس محجبة ومحجبة على الظاهر
لكن الله أعلم ما في الدواخل بعدين العايز السترة
ما بكون محتاج لي نقاب يتلف حوله ..

ويا حلات الدنيا بيك وإنتي بالتركوازي

يا سلام عليك يا ود الجمرى
وبعد كلامك دا مافي كلام..
كفيت ووفيت

فعلاً كفيت ووفيت ياود..

وكتر خير الشاعر أو الشاعره الكتبت الكلمات دى عن التوب ، لأنه عبّر بالجد عن اعتزازنا وفخرنا بالتوب .

انا فى رايى الشخصى انو ثوب المرأه عندنا مثله مثل جلابية الرجل وعمامته هو زى رسمى وخاص بنا نحن كسودانيين ومهما كانت نظرة الغير له يظل فى نظرنا اجمل زى وتظل اهميته لا تقل عن جواز سفرنا فكلاهما يثبت للعالم بأننا سودانيين
ولكل شئ اصل وصوره فمهماتغيرت نظرة شبابنا للثوب ومهما اختلفت الاذواق ومهما غمرت اسواقنا اصناف موديلات الملبوسات فكل هذا يبقى هو الصوره والثوب هو الاصل الاصيل

قد يصفه البعض بأنه لايكفى لحشمة المرأه ولكن اذا اردنا الحكم فالننظر لشارعنا السودانى هل الرجل فى الشارع السودانى والشاب فى الاماكن العامه داخل حدود الوطن يرى فى الثوب شئ من التبرج او تثار غريزته لمجرد انه رأى امرأه تلبس ثوب بالتأكيد لا فكلنا سودانيون وكلنا نعرف تماما مامعنى ان هذه او تلك تلبس ثوب , قد أتفق مع الذين يقولون أن الثوب السودانى يلفت النظر فى الشارع خارج السودان ولكننى أختلف مع الكثيرين فى السبب الذى يلفت تلك الانظار وفى رأيي السبب هو اختلاف العادات والتقاليد وتعود النظر على شئ معين واذا اردنا اثبات النظريه فالنأتى بأمرأه سعوديه مثلاً تلبس العباءه الى احد الشوارع فى سوق شندى فالننظر ماهى ردة فعل من هم من حولها
وباختصار شديد الثوب السودانى والسودانيه التى تلبسه فخرنا وعزنا وتاج راسنا
وشكرا لكى ام احمد على طرح مثل هذه المواضيع القيمه

يا بلدي يا حبوب
أبو جلابية و توب
وجبة و سديري وسيف وسكين
يا سمح يا زين
((الرائع وردى))
التوب السوداني رمز لجمال المرأة السودانية تغنى له المغنون ولحن له الملحنون من شعر عاشقي الجمال السوداني

شفت التوب وما لاقاني أجمل منه
شفت التوب بس التوب
سيد التوب يكون كيفنه
((أبو عركي البخيت))

و شوف عيني الحبيب
بحشمة لابس التوب
(( علي إبراهيم اللحو ))

ماأجمل توبنا السودانى ونظل نفاااخر به فى كل المحافل...

تسلمى ياام احمد على هذا البوست الثر بتراثنا،،،

قد يصفه البعض بأنه لايكفى لحشمة المرأه ولكن اذا اردنا الحكم فالننظر لشارعنا السودانى هل الرجل فى الشارع السودانى والشاب فى الاماكن العامه داخل حدود الوطن يرى فى الثوب شئ من التبرج او تثار غريزته لمجرد انه رأى امرأه تلبس ثوب بالتأكيد لا فكلنا سودانيون وكلنا نعرف تماما مامعنى ان هذه او تلك تلبس ثوب

شكراً أخى عبد الله على المرور والتعليق ..

فقط أردت أن أؤكد أنه من الظلم اتهام الثوب بعدم الحشمة ،فالبعض يتهم الثوب بعدم الحشمة لأنه شفاف مثلاً . ولهؤلاء أقول أن الثوب السودانى مكمل لزى المرأة .. فالمرأة تلبس تحته من الملابس ماتستر به جسدها كاملاً حتى خمار الرأس ، مثل هذه ماضرها بعد أن هذا أن تلبس ثوباً شفاف لأن جسدها أصلاً مغطى ..
أما من لبست غير ذلك وكشفت عن ذراعيها وساقيها وشعرها فالمشكلة فيها وليست فى الثوب .

sala35 كتب:

ماأجمل توبنا السودانى ونظل نفاااخر به فى كل المحافل...

تسلمى ياام احمد على هذا البوست الثر بتراثنا،،،

شكراً سلا فتعليقاتكم ونقاشكم الهادف هو ما أثرى البوست .. فلكم التحية .

ياجمال التوب السوداني

يابلدي ياحبوب اب جلابية وتوب
هكذا غناها فنان افريقيا الاول العملاق محمد وردي
وما اجمل التوب السوداني

الشيخابى & محى الدين كروتش .. مشكورين ياشباب على المرور والتعليق .

توبنا السودانى

توبنا السودانى

رد: توبنا السودانى

رد: توبنا السودانى

رد: توبنا السودانى

رد: توبنا السودانى

رد: توبنا السودانى

رد: توبنا السودانى

رد: توبنا السودانى

رد: توبنا السودانى

رد: توبنا السودانى

رد: توبنا السودانى

رد: توبنا السودانى

رد: توبنا السودانى

رد: توبنا السودانى

رد: توبنا السودانى

رد: توبنا السودانى