ساعي البريد عجبو الكلام نايم عمل

منو الكان يصدق أنو الدنيا يحصل فيها تغيير قدر كدا وحتى البريد بعد ماكان ليهو شنة ورنة يبقى اهميتو محدودة في بعض مهام معينة عن طريق البريد السريع .بعد ماكان يقولوا ليك ماتقطع الجوابات لما تجي مسافر وترسل الجواب ويصل بعد كم اسبوع ومرات شهور ،وبرضو ليهو معنى والناس معتبرنو نص المشاهدة .التلغراف برضو عاش مجدة شديدة ،وكل قصص أعمامك الكبار الواحد فيهم يقول ليك كنت قاعد في الشغل في ماني الله بس جاني التلغراف ،وقالوا لي أبوك مات وطوالي دورنا كومر المصلحة ووصلوني البصات السفرية .ياسلاااااام دا كان زمن حلو وطاعم رغم انو الدنيا كانت بسيطة لكن الحياة فيها الطيبة والمحنة .صحي هسه دخلنا عهد الحياة الالكترونية وبقى التواصل مع الاهل والاحباب مبثوث على الهواء مباشرة ،لكن القصة ذي المسيخة كدا والجواب كان أطعم منها .الام كانت تقول عيدو لي الجواب الجاني من ولدي ويقروهو ليها كل كم يوم وهي مبسوطة وتشم فيهو ريحة ولدا ،وهسه الام والحبوبة دخلن زمن العولمة وبقن شايلات موبايلاتن وعرفن ثقافة الاسكراتش والمسكول والفيس بوك والاسكايب وبرضو شايفات الحياة مسيخة ويقولن ليك ياحليل ايام زمان .وياااحليلا دي ذاتا من الكلمات السودانية الطاعمة والزول لما يقولا بقرب ياخد ليهو بكية .والبت البرسل ليها حبيبا ولا خطيبا جواب تلقاها داساهو وتقرا فيهو كل يوم لما يجي راجع وكمان تلقاها محتفظة بكل الجوابات الجاتا من حبيبا كشئ مابتبدلو بي تمن ،هسه تلقاها خطيبا يضرب ليها في الموبايل وتعمل فيها نايمة .وعلى ذكر البنات والجوابات زمان في المدارس البت يطردوها من المدرسة لو جاها جواب ،لكن تعال شوف هسه البنات لو فتحوا موبايلاتن كان فصلوهن عديل مش يطردوهن ساكت .
والبريد والجوابات دخلت الغناء والثقافة السودانية في الماضي ،ولودايرين نجيب امثلة حاتلقاها كتيرة وماعندها عدد ،بالله ياساعي البريد سلم علي الزول البريد،مافي حتى رسالة واحدة بيها اتصبر شوية ،ومن طرف الحبيب جات أغرب رسايل ،لارسالة تجيني منك لاخبر طمني عنك ،والجواب الحاني منك صار عندي ماليهو قيمة ،واخر خبر كتبو في جواب ،وغيرها الكتير من الغناء .ولكن اظرف واحد لما زعلت منو محبوبتو قال ليها رسلت ليك أجمل خطاب لليلة ردك ماوصل ،زعلانة ولا شنو الحصل ، أنا عندي ظن ساعي البريد عجبو الكلام شم العبير نايم عمل .

المغتربين كانو برسلو جوابات وبتزكر مع الجواب بكون في شريط كسيت تلقي ناس البيت كلهم متلمين حولين المسجل ودموعن جاريه
وقصة الغناء البشيره عندو غنيه بتقول
فالتحي سوداتيل عاملا لينا رباط بالسلامه وصل خبرو في شمبات

اسع سوداتيل بقت سوداني

تسلمى يا سلا..والبريدو مالو تأخر بريدو..ولكن الرسائل الآن اكثر سرعة واكثرضمان عن طريق الوسائل الحديثة..لانو زمان كتير من الجوابات بتروح وين مش معروف،ولما تصل قد تفقد قيمة ما تحمل..ورغم دا كانت اكتر محنة...

ياسلام عليك ياسلا
كلامك جميل وطاعم والله
وفعلا الحياة كانت بسيطه وممتعه
وبمناسبة الجواب احكى ليك حكايه واقعيه فى العام 1999 انا جيت السعوديه جديد لنج وكانت اول مره اتزوق فيها طعم ومرارة الغربه وفى مناسبه التقيت بواحد اسمه على راجل كبير فى العمر صارع الغربه سنوات وسنوات ولما تجازبنا اطراف الحديث قال لى ياولدى هى غربت الزمن دى غربه والله نحنا زمان سبعه شهور حتى يجيك واحد يديك خبر البلد وقال لى انا والله مره كنت شغال فى الخلا وجانى جواب ومالقيت زول يقراهو لى وفضلت شايلو فى جيبى اربعه شهور وبعد اربعه شهور حتى بالصدفه قابلت لى سودانى واول حاجه سألتو منها قلتلو بتعرف تقرأ يازول ولما قال لى أى بعرف اقرأ فرحته فرحه والله يوم عرسى مافرحتها وقرا لى الجواب وعرفته الفيهو وانبسطه

حكاية عمنا دى رقم انى اعتبرتها مأساة فى الوقت داك الا انها خلدت فى زاكرتى وظلت بمثابة خزان الوقود الذى يمدنى بالطاقه كل ما فتر عزمى ونالت منه متاعب الغربه

الحمد لله انو التكنولوجيا بتتقدم وتتطور

لكن انا بعرف ناس لين هسي بكتبو جواب وعندهم الجوال

بس بيحبو يكتبو ولاشنو انا ماعارفة !!!!!!!!!!

اختي العزيزة سلااااااا
السلام عليكم ورحمة الله تعالي وبركاته ..
بعد التحية والسلام ..
كيف حالك وأحوالك في هذه المدة الطويلة
التي لم نراك فيها أملي من المولي عز وجل
أن يصلك رسولي هذا ويجدك غارقة فى بحر
من بحور السعادة والهناء وإذا دار محو السؤال عنا
فنحن بخير وعافية ولا ينقصنا شئ سؤي رؤياكم الغالية علينا
الناس كلهم طيبين ويسلمو عليك وناس الحلة كل يوم يجونا فى
البيت ويسلمو عليك شديد..طبعا فاتك برنامج كتير وحاجات حلوة
شديد لو قعدت أكتب الورق ما ح يشيل لي وفاتتك لمة القهوة
والمقيل فى ضل الضحوية وكل ما نخت صينية الغداء بنذكرك
والبنبر بتاعك لسه فاضي يا حليلك ياسلااااااا بنبرك كان لى برة
ومريحانا فى الزيادات وقطيع السلطة وشاي العصر والله فقدناك كتير
املي من الله ربنا يرد غربتك ويرجعك لينا سالمة وغانمة ..
طبعا صاحبتك الكانت بتجى معاك البيت وانتو راجعين من المدرسة
خطبوها والعرس بعد ستة شهور كده والعريس ماشاء الله روقة شديدة وترطيبة ألف وقالو دكتور
فى مستشفي المك نمر وكل ما تجينا صاحبتك تتبسم وتقول ياحليل
سلااااااا هسي كان فرحت معاى وجهزت معاى حاجات العرس وقالت فقدتك فى تجهيز خبيز الخطوبة والناعم لكن والله ماقاعدة تقصر معانا
من سافرتي كل يوم تجينا وتطل علينا وتسال من أخبارك ..
والناس كلهم طيبين والله ومافي عوجة الناس مبسوطة لسه برنامجنا
الزمان من شاي الصباح والفطور وشاي الفطور والقهوة نص الضهر
بعد داك البيت كله بقعد يحضر فى الغداء وشاي العصر وشاي المغرب
بالقيمات والله لمة حلوة فاقداك بس وكل مانقعد نذكر كلامك وضحكك وونستك ياربي متين ترجعي لينا ونرجع الايام الحلوة ..
طبعا أنا طلعت الأول علي الفصل أبوى ما قصر أداني 100 جنية وامي برضو وانتي زمان برضو وعدتينى لما انجح وأجي الأول على الفصل تشتري لى عجلة يكون نوعا جبيتر ماركة الأسد لانو اللساتك بتاعتا دبل
وبتكون كويسة فى الرملة وماتنسي ترسلي لى معاها كراسات وشنطة
للمدرسة وشايف ناس برة عندهم جلادات حلوة للكراسات رسل لي منهم وأقلام معليش يا أختي العزيزة كترت عليك فى الطلبات إن شاء الله
أبقي كبير وأبقي دكتور وأفسحك في كل الدنيا وما أخلي مكان ما أوديك لي ..
وفي الختام تقبلي سلام كل الأهل بدون فرز وأعرفي أننا مشتاقين ليك كتير ومشتاقين ترجعي لينا بالسلامة وبلغي سلامى وتحياتي الحارة لى دكتور نصر الدين وقول لى أظهر علينا ورسل لينا جوابات مشتاقين طلتكم الحلوة علينا يلا ما أطول عليك فى الكلام ومنتظر الرد منك علي أحر من الجمر ..

ملحوظة ..
خلي بالك من نفسك ومن الدكتور
وماتنسو تردو لينا الجواب سريع
طبعا أهل الدكتور كانو معانا قبل كم يوم
كويسين والله ومبسوطين وبسلمو عليكم شديد
وما تنسي العجلة خلاص المدرسة قربت تفتح
وانا ح أدخل مدرسة الأهلية المتوسطة السنة
الجاية إن شاء الله ..

تحياتي وأشواقي الحارة
أخوك المشتاق لكم دوما
نزار ..

(ما تنسي العجلة ) ..

تحياتي : تطور التكنلوجيا ساعد الناس كتير في توصيل الاخبار والمعلومات بسرعه مافي غير تمسك جوالك وتدق وفي ثانيه تلقى الطرف التاني معاك ...لكن الرسائل والجوابات فيها رومانسيه ولهفه وشوق وإنت منتظر الجواب وياربي بعت جواب أو لا وياسلااام لما تمسك الجواب بيدك وانت ليك شهور منتظروا وتفتحتو وتقرأ وتنزل منك دمعه غصب وبعد كدا تلم الجوابات وتبقى ذكري تقعد معاك سنين طويله

والله موضوع ذو شجون ،وكلام أخونا عبدالله ذكرني الزول البنادو يقرأ الجواب ،والناس يجتمعوا عشان يسمعوا الكلام وذكرني ود جيرانا مستهبل يزيد وينقص في مضمون الكلام حسب الناس الموجودين ،ولو في زول موجود وسيد الجواب نساهو في السلام ،صاحبنا البقرأ دا يقوم يدخلو مع الناس ويقريهو السلام ،خليك من كدا دا لو في سيرة قروش في الجواب برضو بقسما حسب الحضور ومابتقيد بالمكتوب .
وعنوان هذا البوست فيهو ذكرى جميلة للشاعر الرقيق والمبدع عوض جبريل ،وهو خير دليل على ان معظم الابداع في السودان طلع من الصنايعية البسيطين وعشان كدا أنا داير أنزل قصيدته كاملة وطبعا كل الناس سمعوها بصوت ترباس لكن تامل النص الشعري حايبين مقدرة عوض جبريل .

رسلت ليك أجمل خطاب للليلة ردك ما وصل
زعلانة ولا شنو الحصل
شهرين مضت تالت الشهور روٌح خلاص عددو اكتمل
أنا في رجاك ما جاني رد رابع الشهور ما محتمل
أنا عندي ظن ساعي البريد شما العبير عجبو الكلام نايم عمل
شاف الحروف مليانة ريد خلاني أحكي ليه النعل
زعلانة ولا شنو الحصل
أجمل هدية من البلد قولة سلام من الأهل
تنزل تهب مثل الدعاش زي كان جفاف والفيث نزل
شرحت ليك حال الغريب كيفن بعاني من الهمل
وضحتا ليك كيفن هجير الوحدة قاسي
وكم بحن لي نسمة من دار الأهل
زعلانة ولا شنو الحصل

موضوعك جميل يا سلا وحنيّن ..
الجوابات غير انها كانت بغرض توصيل الأخبار و الأشواق لكن كانت بتوثق لحياة الناس ..
لما تجى تقرى جواب قديم جاك من زمان بتلقى أحداث لوما كانت مكتوبة فى الجواب ما أظن فى زول يتذكرها ..
مرة لقيت جواب ضمن اوراق المرحوم والدى كنت رسلته ليهو وهو فى السعودية .. والوقت داك انا كنت فى المتوسطة لقيت احداث كتيرة بحكى ليهو عنها ، لو ما خط يدى كنت شكيت فى انى انا الكاتبة الكلام دا .. لأنى كنت ناسية تماماً للأحداث دى .

وبمناسبة الحديث عن الخطابات شايفة البريد السودانى دبت فيهو الروح من جديد وعاملين دعاية فى التلفزيون ( ياحليل زمن البريد ) .

اليك مع التحية وبعد .حان الاوان لأبوح لك بمايجتاح فكري وهو تكسير
الحواجز التي بيننا .اعرف ان هذه الافكار في نفس الوقت قد تدور في
رأسك ..لكنك لابد ان تعلمي جيدا انني لا اريد وأتمنى لك سوى
أن تكوني معي وبجانبي الي الابد .فالحياة التي أعيشها بدونك كأنها
جهنم الحمراء.صدقيني ذلك احساسي فهل تلبين طلبي وتخلعين
هذه الافكار البالية ونبدأصفحة جديدة.وتبدلي الهموم كما تبدلين
كسائك.حتى يراك الناس على حقيقتك ،أما انا فاريد ان اقطع كل
علاقاتي السابقة مع الجنس اللطيف وكل مااتمنى أن يكون على
يديك،لارتاح ويرتاح قلبي،ولكي أزيد شجاعة وقوة واستطيع اقتلاع
الحزن الذي ملكني وأتعبني، فلا تصدقي الا ماترينه من خلال
عينيك،فلاتتعجبي فتلك هي رغبتي في الدنيا،وحقا اقول ان وجهك
نور اضاء ظلمات حياتي التعيسة ،التي كانت بدون مبالغة بدونك
بؤس،وشؤم وكلما نظرت اليك وتكلمت معك كان كلامك وصوتك
كاموسيقى التي تعزف أحلى الالحان،حتى ظننت ان باقي الاصوات
نهيق وعواء..ولاانسى ذلك اليوم الذي عرفتك فيه فقد كان يوم
ولادتي من جديد في هذه الدنيا،وعمري الذي مضى بدونك كان
ملعونا وثقيلا ..فصدقيني هذه هي الحقيقة،أقولها بكل صراحة ...
فيا حسرة على مامضى من سنين ..

لحدي هنا المحبوبة الكلام ماشي معاها تمام التمام ولكنها وجدت في اسفل الرسالة .
*ملحوظة :الرجاء ان تقرأي سطر وتفطي سطر .

أشكر الجميع علي المرور والمداخلة :
حذيفة ،عبدالله حسن بشير ،عبدالعزيز ،مندر ،نانسي عجرم ،نزار ،أم أحمد وكبسور .
ويا نزار ساعي البريد شايل ليك جواب فيهو رد علي رسالتك بتصلك كدا بعد يوم يومين انشاء الله .

من طرف **sala35** السبت 3 يوليو 2010 - 21:46

اخوي العزيز نزار .
سلام وتحايا كتيرة ماعندها عدد مني لك ولكل الاهل .
أما بعد ..
كيف حالكم واحوالكم عساكم بكل خير اما اذا دار محور السؤال عنا فاننا لاينقصنا شئ سوى رؤية ربوع شندى ورؤياكم الغالية.
وصلنى جوابك المليان بالمشاهد والذكريات وادخل فى نفسى شجن ، خاصة عندما ذكرتني قهوة ضل الضحى وصينية الغداء والبنبر المفضل خاصة وانا فاقدة للجو دا فى الغربة فهما كانت الدنيا هنا جميلة لكن برضو تظل مسيخة وماعندها طعم والزول مابتم سعادتو الا في ديارو وبين اهلو ،وصاحبتي طبعا كلمتني بي خطوبتا وربنا يتم ليها ويعدل خطوتها ،وفعلا هسه انا لو كنت هناك كنت وقفت معاها وهي مابتقصر معاي ،وفي عرسي تذكر وقفت معاي وقفة شديدة اسبوع كامل في الخدمة مارجعت بيتم والله هي زولة حبوبة ماعارفة اجازيها كيف ،لكن انشاء الله بجي احضر عرسا واقيف معاها وانتو من هسه شدو حيلكم معاهم ماتتلوموا الناس ديل ماقصروا معانا كلهم ، مابتتذكر يانزار وقفة ابوها واخوانا معانا في كل مناسباتنا.وقلت لي لسه في برنامجكم داك ذاتو ،الونسة والشاي باللقيمات والجبنة والله دي حاجة حلوة وذي ماقلت ليك طعم حياة الزول وسعادته الحقيقية بين الاهل والاصحاب .
والله يااخوي عجبني نجاحك شديد وفرحت والاول دي اصلك ماتفكها ليهم وتستاهل المية جنيه من ابوي وانا ذاتي ذي ماوعدتك مابقصر معاك العجلة الدبل شحناها ليك واسكت ساكت دي عجلة قوية شديد ،دبل وعندها برضو موتور مع البدال بس ماتخلي الشفع يكسروها ليك اصلم حاسدين ،والأقلام والشنط وحاجات كتيرة حلوة رسلناها ليك مع ناس اسامة عجيب وهسه بكونوا وصلوا الخرطوم .سلم علي امي وابوي والاخوان كلهم وعلي ناس الفريق كلهم انشاء الله هم كلهم طيبين وشديدين ومافي زول شاكي من حاجة .وتقبل سلام د.أبودقن وقال ليك شد حيلك شديد في المدرسة،وهو برضو حايجيب ليك حاجات حلوة ،ووصاك برضو شديد علي المنتدى وقال ليك ابقى عليهو عشرة .ونأسف شديد انو رد الجواب اتاخر لكن والله كان في شوية مشغولية وضيوف وجري .
وفي الاخر برضو داير اوصيك علي النعجة والغنمايتين ،الواطة اليومين ديل حارة شديد ماتقوم تعطشن واديهن البرسيم ذي زمان ماتتلخم بالكورة ولعب العجلة .والنيمات ماتنسى برضو تسقيهن كل يوم المغرب .
ملحوظة :العجلة مرسلة في الطريق بس العب بيها بعد السخانة تبرد وماتلخمك من قرايتك ..

أختك المشتاقة دوماً
سلاااااااا

ساعي البريد عجبو الكلام نايم عمل

ساعي البريد عجبو الكلام نايم عمل

رد: ساعي البريد عجبو الكلام نايم عمل

رد: ساعي البريد عجبو الكلام نايم عمل

رد: ساعي البريد عجبو الكلام نايم عمل

رد: ساعي البريد عجبو الكلام نايم عمل

رد: ساعي البريد عجبو الكلام نايم عمل

رد: ساعي البريد عجبو الكلام نايم عمل

رد: ساعي البريد عجبو الكلام نايم عمل

رد: ساعي البريد عجبو الكلام نايم عمل

رسالة من شاب الي محبوبته ..

رد: ساعي البريد عجبو الكلام نايم عمل

رد: ساعي البريد عجبو الكلام نايم عمل