يازول سرك في بير

كلمة يتدوالها السودانيون كتير ،تلقاهم يجرجروا ليك الزول في الكلام عشان يحكي ليهم حاجات خاصة ويقولوا ليهو يازول والله سرك في بير .لكن هل فعلا اليومين ديل السر في بير ؟؟
الاجابة علي هذا السؤال طبعا نسبية علي حسب تجربة شخص واخر ولا تحمل ان نقول لا أو نعم .
بس نصيحتي ليك ياحبوب ماتحكي لاي زول اليومين ديل كلام حساس او خاص ،لو كنت في السودان او خارجه،والونسة بين الناس بتكمل ،واعز اصدقائك طبعا برضو عندو ناس تانين عزيزين عليهو ،يقوموا يجيبوا سيرتك ذي الماحاصل حاجة ويفتوا كلامك كلوا للناس ،عشان كده اعمل بنصيحة ابونا الشيخ البرعي لما قال :ماتفشى سرك لي كافة المخلوق ولو يبقى سرك .وانت ذاتك بي صراحة لو صدرك ضاق وحكيت لي صاحبك اصلك ماتلومو لانك انت الغلطان قبل ماهو يغلط ،وانت اول زول حكيت بسرك قبل ان يحكي هو .
وعلي هذه السيرة الناس يقولوا ليك فلان داك بطنو بطن عملية وبقصدوا انو مابمسك اي كلام ،تكلمو بي هنا ،وتقول ليهو الكلام ده ماتمرقو ،وطبعا هو كده مرقان الكلام حايحلا ليهو زيادة وبكون مستمتع بالحكي .وبرضو يقولو ليك فلان داك بطنو غريقة ،ودا طبعا اصلو مابتكلم وتلقاهو عارف في الحلة اسرار كتيرة وساكت بيها .
قال ليك في مرة من ذات المرات ،في راحل بالليل قال لي مرتو ،انا غيرت رايي والبت دي مابديها لي ولد اخوي ،دا ولد سجمان ساكت،بس الكلام دا ماتمرقيهو ،فقال ليك المراة دي بس بقت راجية متين الواطة تصبح ،وطوالي ذاعت هذا الخبر المستعجل لي جارتها عبر الطاقة المفتوحة بين الحوشين لزوم الشمارات في موجز الساعة ستة ،والخبر انتشر عبر الطاقات ولما الواطة صبحت كويس كان الكلام خلاص وصل الجزار وسيد الفول وسيد الخضار والحلة كلها عرفت الكلام وقال ليك الراجل لما جاء راجع اخر النهار لاقاهو واحد أطرش في اول الحلة ،وشبكوا ليك اشارات وجوطة ،صاحبنا مافهم ،لكن في واحد بفهم اشارات الاطرش شرح ليهو ،وقالو الاطرش دا قال ليك ود اخوك حميتوهوا بتكم مالو عيبو شنو ؟؟

لو الزول ماقدر مسك سرو مافي واحد تاني يقدر يمسكو ليهو (وسراً فارق الشفتين ضـــاع )..

كنا أيام الجامعه نقول لي الزول احكي و"في بير سرك" دي معناها سرك في امان وكان قلنا ليهو "سرك في بير" معناها سرو لحق سر الراجل الاطرش العرفو دااااك
دحين ياكبسور احكي و"سرك في بير" ههههههههههه

سرا فارق الشفتين ضاع

دايرين نواصل في قصة السر الفي البير دي شوية .
الصندوق الاسود في الطيارة يعتبر حافظ اسرارها ولكنها اذا سقطت او دمرت هو مستعد يكشف عن هذه الاسرار .ويقولوا ليك برضو فلان كاتم اسرار الرئيس او المدير وده طبعا بكون من خاصة خاصته وديل ذاتم مرات بجي وكت يطلعوا الاسرار .
كلمة سكرتير تقابلها بالعربي أمين السر وكان ناس الحزب الشيوعي السوداني لامن كان ليهو شنة ورنة ،زمن ناس الشفيع وعبدالخالق وأحمد سليمان المحامي ،عاجباهم كلمة أمين السر دي ويقولوا ليك الشفيع امين سر الحزب .
كل الدول تحتفظ باسرارها العسكرية وغيرها ،ولكن بعد مضي خمسين سنة خلاص تدخل التاريخ ويمكن لاي شخص شاهد للاحداث يرويها وتفتح كمان الوثائق المدسوسة وهذا الكلام متبع خاصة في الولايات المتحدة والدول المتقدمة .
السودانيين من دون الشعوب بسموا السر ،وسرالختم وتاج السر بالذات في الاسر المرتبطة بالطرق الصوفية وهي من الاسماء المميزة لنا ولا يشاركنا فيها اي شعب .
كسرة : واحد صاحب مطعم سمك كاتب على اللافتة (محلات السر للاسماك المقلية والمشوية والمحمرة ) ،فطر عندو في يوم من الايام واحد مسطول وكانت رابطة معاهو قام قال ليهو يالسر ياخي اللافتة دي دايرة تعديل ومافي داعي لي مقلية ومشوية ومحمرة لان الاسماك ماحاتطلع من التلاتة احتمالات دي .السر فعلا شاف الكلام دا منطقي قام مسحها وخلاها (محلات السر للاسماك ) ،صاحبنا جاهو في يوم تاني وقال ليهو يالسر ياخي المحل بقى معروف والريحة ضاربة أمسح محلات والاسماك .اللافتة رست علي كلمة السر ،سيد المطعم اتمحن فيها قام نزلا مرة واحدة .

كبسور ياغالى والله كلامك جميل وممتع وزكرتنى حكاية المره المشهوره بنقل الاخبار وافشاء اى سر مهما كانت خطورته وقال ليك فى مره من المرات اخوها عمل ليهو عمله وهى عرفت اخوها خاف منها تزيع سرو وفكر فى طريقه يمنعها من التهور وزياع سرو المهم بعد كلام طويل واقناع انو هو اخوها البعزها وبريدها وقام وفى الاخر ساومها على انه يديها 100جنيه على ان تحفظ السر فقالت ليهو والله رغم انو الموضوع صعب لكن مامشكله بحاول احفظ سرك عشان الميه جنيه دى هى برضها كمان ماشويه المهم اداها القروش ومشى قال ليك المره دى ليلها بقى بسنه والليل كلو تدخل وتمرق وتعد فى القروش والنوم تب ابى ليها المهم اول ما الصباح طلع شالت القروش ومشت لى بيت اخوها ودقت الباب ولما جاها قالت ليهو ياخوى والله انا الليل كلو النوم ابى لى وقدر ماحاولت أحفظ سرك والله ماقدرته تب دحين امسك قروشك دى عليك

نواصل في الحاجات المشتقة من كلمة السر .
يقولوا ليك فلان ده متزوج في السر وطبعا الراجل بكون قبل كدا متزوج وداسي الكلام من زوجته القديمة ونسيبته واولاده وخايف من المشاكل .
وبرضو نسمع كلمة سر الليل وهو عباره عن رمز يستخدم خاصة في المناطق العسكرية بقصد التأمين ومافي زول يستطيع الدخول الا اذا عرف سر الليل .
وكمان زمان الناس يقولوا ليك فلان داك كان سر تجار شندي ،وهو الشخص الضامن لحركة كل السوق وكل التجار يتعاملوا عن طريقه،وكل بضائع الجملة تجي في الاول عنده حتى بعد ذلك توزع في السوق ،وطبعا ماكل تاجر يستطيع ان يصل لهذه المنزلة ،وهي تتطلب وضع مالي معين بالاضافة للحكمة والشخصية الاعتبارية وبكون التزامه الشفوي له وزنه ،وزمان كان يطلق هذا اللقب في شندي على المرحوم أحمد جمال الدين جد العضو حسام ،والمرحوم الخليفة عبدالرحيم أبودقن جد العضو د.حذيفة .

يا كبسور

في انتظار مزيد من التفاصيل حول اسم / السر أو تاج السر

تحياتي /ساردية

(عندى ليك كلام سر أوعك تكلمى بيهو زول) وتتقارب الرؤوس ويخرج السر من البير الأولى لينساب جداول فى حديث المجالس وونسة العصارى ...

يكاد لا يذكر إفشاء السر دون إقترانه بمقدرة بنات حواء الفذة فى إفشاءه .. فهنالك صورة نمطية تربطهن بالثرثرة وإفشاء الأسرار .
ياريت تتوسع لينا فى النقطة دى كمان أخى كبسور .

يازول سرك في بير

يازول سرك في بير

رد: يازول سرك في بير

رد: يازول سرك في بير

رد: يازول سرك في بير

رد: يازول سرك في بير

رد: يازول سرك في بير

رد: يازول سرك في بير

رد: يازول سرك في بير

رد: يازول سرك في بير