قصة للكاتب د طارق جبريل

أها شفتو عوض بقى يطلع في الرملة ويتشجع لامن البنية تديهو بسمة من بعيد... جملة الايمان الزول ان بقينا قلنالوا ترفع رملة الخرطوم دي كلها هنا كان رفعها... بس مرات لامن البت تبقى مافي وتشوفو طالع بي صفيحتو يمين لسانو ماديهو زي كلب الحر... وعيونه من التعب زي عيون ام سيسي... ولامن البنية تكلمه... يا زول جضومه تتنفخ زي العندو برنبوفي ... وتحلف تقول الزول دا ان بقى مات وهو في الحالة دي حا يدفنوهو وهو ضاحك لا قعر اضانو..
الايام الاولى كلها وانا اتاوق فيهو من فوق زي الزول الصابة فوقو مطرة البت تتونس معاهو وهو مبلم زي ولد الطهور ... بعد اسبوع كدة حتا لسانو اتفك... وشوف عيني بقى يقول ليها صباح الخير... عوض يقول صباح الخير.. ايوة والله... عوض الناشف داك زي عود الطلح بقى يجي ممسح وشعره مسرح.. ومريح كمان بالرغم من انه الريحة عاملة زي النفتالين... لكن اهو عوض بقى يتريح بعد ما كانت ريحتو مع العرق ترمي الصقر.. والله ان بقيت مريت بي جنبو ساكت ريحتو تخليك تدخل في غيبوبة.... يا جماعة خير زولكم اشترى ليه مراية شخصية لانه لو ختاها مع اخوانه الكتار ديك الا يوزعوها ذرة ذرة بيناتهم... وبقى بعد نضرب الفول في الديم يشيل باقي الزيت ويتمسح بيهو... عشان يظهر ناعم وكدة...
المهم يا الزينين زولكم بقى يهضرب بالبنية والبنية مكسرة فيهو... واصلو كان لي عوض ما عايز الطابق اليلم دا كلو كلو ما يتم... عوض المسكين الغنماية تاكل عشاهو بفى يغني شيتا: اساسق بالدريب الجايي بي حداكا.... وشيتا انا دستوري نازل هناك في العمارات... ودي ما بعرفو جابها من وين... دحين انا شفت زولي اتشعلقلو جنس شعليقة يفكو منها الله ساكت..
- شوف يا عوض انت راجل رفيق العمر كله القصة شكلها ما لافقة معاك
- ياخي ليه عشان انا فقير يعني
- ما كدة يا الحبيب بس انت لسة المشوار قدامك فيهو مليون كيلومتر
- ياخي بقطعوا معاها
- يا راجل البنية دي سميحة ما قلنا حاجة بس صعب تنتظرك حا يجي اي واحد مرتاح ومتمسح ويخطفها منك وانت تبقى فاتح خشمك زي العوير...
- ياخي انت مالك عايز تكسر مقاديفي
- هي وينة مقاديفك دي انت عندك مليشة اخوان وناس ابوك راجنك تقول لي مقاديف
زولكم عين لي كويس وكبسني بنية وخلاني مرمي ومشى...

شفتو كيفن أنا والهادي بتاع الدكان سكتنا ساكت وزولك شغال في التليفون..
- والله انا ذاتي ما عارف ليه عملوا لينا الجمعة دي اجازة
الزول دة اظنو الصلاة بقى ما فاضي فيها... وشوية شوية تسمع الضحك... بالله عوض الضحكة تمرق من حلقو زي قدرة الفول الهاجرنها بي حجر.. خخخخخخيييييييي اهييييييييي اههههه..
- الليلة شربتي شاي الصباح بدوني...
هو دة حب دة ولا صينية فطور...
- بس انا وحياتك لي هسا ما فطرتة وما اظني بقدر لانه شايك بتاع الصباح كان بيفتح نفسي...
جملة الايمان الزول دة الصينية اليقعد فوقها يلحقا امات طه.. يمين يقوم آخر زول ولو جو صورو الصحانة والصينية من بعدو بالاشعة ما يعرفوا كان فوقها شنو من شدة ما مسحها مسح ياخي ده لامن يقعد في الصحن بالله حتى لو شبعان حسادة ساااكت يخرت الصحن لامن يلحقها صنع في الصينmade in China...
- اها الليلة شربتي عصير المنقة ولا خلطي ليمون بس..
اول مرة اشوف لي حب في انواع الفواكه في سوق الخضار...
- تعرفي انا بتعجبني وجناتك شديد...
سبحان الله عوض كلامه كله طوب وملطم واسمنت الليلة كمان بقى يعرف الوجنات..
- لا والله ما بجاملك انا لو بجاملك معناها بغش في نفسي...
الزول دة بعد شوية حا يقول لي ما عايز اشتغل طلبة تاني..
- انت لو عايز تعرفي نفسك كويس انا بديك عيوني عشان تشوفي بيها نفسك..
شن طعم عيونك وهن عملات زي عيون الكديس الزارنو كدي ما فيهن اي تعبير..
- تعرفي يدك من شدة ما رطبة وناعمة لمن اسلم عليك شعر جسمي كله يقوم..
شعر جسمك قايم خلقة.. الزول دة بالله تقول ابو القنفد شعره كله قايم زي الابر
حتى شعر نخرينو طالع زي المسمار الداقنو معوووج في خشبة....
ربكم رب الخير جاب مصطفى اخوهو الصغير يناديهو للفطور حتى زولكم قطع المكالمة..
وقام جري للبيت... شفتو الزول النفسو مسدودة... يمين انطلق زي بيرك عربات السفراء
للفطور
المهم مشينا يوم السبت لي شغلنا وعوض السعادة ناطة من عيونه تقول عندو غدة درقية...
يمين ونحن في الطريق ضاربين الكداري للعمارات الزول دة اي اغنية حب وجلكسات غناها...
بس الوكرة الوكر فيه انه دا آخر اسبوع ومنه نحن نخلص الشغل هنا...
لمن قلت ليهو كدا زولكم نطط عيونه ونفخ الهواْء من نخرينو زي الحصان بتاع السبق.. وكضم الكضمة البي وشيها... انا قلت اسد ليه نفسه عشان يخلي الشغلانة لانها ما حا تلفق... اتاريني بوظتها تاني لانه زولكم بقى مهموم ويعضعض في لسانه زي الكلب الماسكو السعر....
فطرنا وجينا لقينالكم البنيي السميحي في الباب ومعاها اختها كمان انا سلمت فسراع وطلعت لي طوبي واسمنتيني... وخليتو براهو... الظاهر عليها اخت البنية كانت عايزة تشوف (جمس بوند) بتاع الامتداد دة... تاوقت عليه من فوق لقيتو يقرقر ساكت مع البنيات وبعد شوية شال صفيحتو ومشى لي رملتو.. لامن طلع فوق جاء عندي..
- انت مالك مشيت فسراع كدي
- يا زول انت سيد الشغلانية من اولها تموت موتك
- اختها قالت لي صاحبك دة مالو مسيخ كدة بس سلم ومشى...
- انا راضي بي مساختي دي يا زول والله ذاتو عشان عارفني مسيخ اختارلي قراية البيطرة
- ياخي ما تكابرني انا...
- يا زول اكابرك في شنو انت جنيت...
- يمكن اختها تعجبك..
- شوف يا ابو عويض انا ماني فاضيي للحب... ووجع القلب ماني قادر عليه فشان كدي لا بقدر احب هسا ولا حاجة يا زول المشوار طويل...والبنيات ديل ما بينتظرننا... هسا يجي واحدا متمسح ومليان قروش ويعرسها ويخليك فاتح خشمك ويمشي..
- ياخي انت مالك زول متشائم كدة
- ياخي انا عارف امكانياتي... ياخي انت بس شوف في ابو البنيات دي كويس... الراجل يلمع من النعمة.. ما حسدناهو لكن ما حا يقبلبنا نحن ناس قريعتي راحت ديل... ياخي الراجل تريان وجضومه مليانة لامن مدلدلة زي معلاق اللبن... وشوف انت جضومك مكرمشة كيفن علي السعن الناشف...
- بي شناتي دي البنية حبتني...
- مبروك عليك وخليك عايش في الوهم...

كملنا اسبوعنا ورجعنا لي امتدادنا وخليت عوض ما بين بيتهم وتلفيون دكان الهادي...
وبعد اسبوع انا سافرت مصر لي بيطرتي وهو مشى جامعة الخرطوم لي صيدلتو...
الجوابات بيناتنا ما انقطع... وعوض كلامه كله عن بنيتو وحبهم وانه بتجي عندو لامن تشتاق ليه في كافتريا الجامعة... يعني شغال خلط صاح...
لمن رجعت في الاجازة لقيت ليك النيران مولعة...

آه دخلت على عمي عبد الله و قلت ليهو "عم عبد الله شايفك ليك يومين ما مشيت الشغل وما سافرت
- يا ولدي منتظر لي قطر بضاعة اسوقه لي بورتسودان ولي هسا ما ملوهو
- احسن ترتاح شوية
- انت ناس اذاعة لندن دي حقو يدوك وسام ياخي انا من قمت وانت تسمع ليهم
- يا ولدي ياها تسليتنا خصوصا لمن نكون سايقين القطر مافي شي غير الاذاعة ولهيب الشمس.... صاحبك مشى الجامعة (ده عم عبد الله بسألني).
- ايوة بكرة ان شاء الله بمشي عليه الداخلية ازوره
- دحين انت فهمك شنو في الشئ البيقول فيه ده
- انت كدي باركها والله بسهلها... بس انت قول خير
- يا ولدي دة كلام اصلو ما بيدخل العقل.. نمشي نقول للناس ديل شنو.. نقول ليهم نحن حق الملاح عندنا في تلتلة..
- يا عمي هم موافقين كدة وحا يدبروا امورهم وبعداك انت عداك العيب
- يا ولدي ما تدخلونا في ضفورنا نحن ناس علي قدر حالنا وصاحبك دة من دون اولادي فاهم الحتة
- يا حاج والله الله بيصلحها بس انت قول خير
- ياخي الولد ده من يومه وهو صغير عامل زي لوح التلج مجننا...
- يا حاج لوح التلج هسا عايز يعرس لو خليناهو كده بسوح
- ضاحكا بشدة.. الله يرضى عليك يا ولدي تقنعوا يخلي الموضوع ده وكمان ان بقى ما خلاهو امرنا لله...
- بس كدي انت قول خير وكله حا يتصلح..
- ربك كريم يا ولدي

اصبحت الصباح مشيت لي عوض في الداخلية لقيته بيفطر... شافني حنكو وقع زي الدلو لمن يرموهو في البير..
- أها خير إن شاء الله..
- كدي هسا فطرني بعداك نشوف الحاصل..
- ياخي انت غتاتك دي أصلك ما بتخليها..
جابت ليها غتاتة كمان.. طيب يا زول موت موتك انا ماشي...
- يا طارق روق عليك الله ياخي انا في شنو وانت في شنو
- انت الجكس موش حا يجي هسا
- ايوه
- خلاص انا لمن يجي الجكس حا اقول ليك الحاصل
- ياخي الجكس حا تجي معاها خالتها عشان تعرف الحاصل
- خلاص لمن تجي...
أها ونحن قاعدين في الكلية فجأة تطل علينا البت وخالتها وأختها كمان... جملة الإيمان خالتها اشد منهم كلهم... زولة منعمة ورايقة كدة... تقول رز بي لبن... انا في الأول قايلها ما متزوجة اتاريها فايتة الاربعين وعندها 3 أطفال كمان...
- سلام يا شباب
- عوض قام يتراشق: اهلا بالناس الحلوة... ده صحبي طارق.. ودي خالة الشباب حنان...
(ابو الزفت يا عوض الناس ديل شكلهم حا يطيروا حنانك زاتو)...
- اها فطرتو يا شباب
- والله انا فطرتة بس طارق ده لسة ما فطر
- انت عوض خلصت محاضرات ولا لسة
- خلصته
(يمين زولكم كان عنده امتحان ملاحق كان قال كملت)
- خلاص نمشي نفطر كلنا مع بعض في اراك اوتيل
- انا دنقرت علي عوض في اضانه: ياخي شغلنا في البنا ده كله لو جمعناهو ما بفطرنا في اراك اوتيل ده اتخارج يا ولدنا انا عندي جنيهين بس حق الرجعة
- انت قاعد تقول لي صاحبك شنو
- لا ابدا
- ياخي انا عازماكم الليلة وعايزة اتعرف عليك انت بالذات كويس ممكن...
- يا ستي انا ما عندي مانع بس ليه انا بالذات يعني
- عشان انت وقفت مع الشباب ديل وقفة سمحة وبعدين انا عايزة اعرف عملت شنو مع اهل عوض عشان نفرح بيهم
- يا زولة انت مالك مكبرة القصة كدة انا حاولت اساعد صاحبي وبس رغم انه الموقف صعب جدا
- انا عارفة وحاسة كدة
..... ومشينا اراك اوتيل....
و في الاراك هوتيل..
- اها يا شباب تفطروا شنو انا بقترح ناخد سمك فرايد...
- شوف يا عوض قول لي الزولة دي تشوف لينا فول زيتو كتير عشان نتمسح بعد ما نكمل.. فرايد شنو
وهي ذاتها فرايد دي تطلع شنو انا السمك البعرفو القرقور وكان بالغتة البلطي... انا عايز اغمس
- كدي روق يا طارق عليك الله وخلي جنك دة الزولة دي عازماك وعايزة تعرف ناس أبوي قالوا شنو
- انتو بتقولوا في شنو..
- لا مافي حاجة
ضربنا الأسماك والسلطات...
- يا شباب شاي ما بطال
- يا طارق كدي تعال اقعد جنبي
- اوكي
- اها الحصل شنو
- والله الناس ديل انا اقنعتهم بعد صعوبة لكن لي هسا
هم ما مقتنعين وشايفين القصة ما بتجي يمشوا يد قدام ويد وراء
- يعني ما حا يجوا
- لا ما كدة بس بصراحة كدة ما مقتنعين انه يمشوا مع ولد لسة بيقرأ
وكمان الحتة بتاعة إنه انتو تتكفلوا بي كل حاجة دي وهم يجوا يد قدام ويد وراء شوية مأزماهم
- انت ما شرحت ليهم
- اكيد بس هم شايفين القصة قصة كرامة... والناس ديل رغم فقرهم إلا إنه عندهم كرامة فايتة الحد
وشايفين إنهم حا يجوكم عشان خاطر ولدهم .. يعني ما برضاهم
- ممكن انا امشي اقابلهم
- بيعتمد على الشئ العايزة تقوليهو ليهم
- انا بس عايزة اشرح ليهم انه نحن النسوان بس العارفين الأمور حا تمشي كيف...
لانه رجالنا ما عارفين انه خالات البت هم الحا يشتروا كل حاجة... الدبل وامور الخطوبة كلها... حتى لبسة عوض من عندي انا
- والله أشوفهم وأرد عليك... بس حاولي إنك تفهمي نفسيتهم..
يعني لو حسوا انك بتجرحيهم حا تبوظي القصة كلها...
- هو ولد عمها دة ما حاسس إنه البت ما عايزاهو..
- حاسس بس هو مُصر
- ياخي الموضوع دة عجيب من أوله
- قالوا لي إنك معترض
- أنا ما معترض ولا حاجة ولا عندي الحق دة... بس أنا بعرف أهل عوض كويس..
ناس طيبين وفي حالهم.. ومنتظرين عوض دة ينتهي بتين عشان يساعدهم مع أخوانه
- كل شئ حا يتسهل..
الشئ الحارقني وفاقع مرارتي عوض شغال يتبسم ويكب في الجلكسات مع القرمبوز
ومرة مرة يخت يدو في خدو تقول عايزين يصوروهو في جنة الأطفال
وأخت الجكس تراقب فينا أنا وخالتها زي رئيس العمال
- انت ما شايفة إنه الموضوع غريب
- غريب... بس بتنا بتحب الولد شديد وأخير لينا تعرسوا بي رضانا وقدام عينينا من تعرسوا من ورانا
- عوض زول كويس شديد
- انا عارفة كدة كويس... عشان كدة نحن عايزين نشتري راجل... عندك اعتراض
- ابدا ابدا و في سري قلت (يشتروا شنو هو عوض ده لو بالغ ما بجيب ليهو نصف جنية يلا أقسام)
- انت ما عندك مشروع زواج كمان
أها بدينا في الكلام الأعوج... كان كدي نقوم نمشي...
- لسة بدري.... المشوار طويل
- يعني ما عندك جكس
يا النبي نوح... بدينا في جرجير الكلام والبحيت
- لا على باب الله
- يعني مافي واحدة عاجباك
- حتى لو في حا يكون الموضوع سراب ساكت
- ياخي إنت ليه متشائم كدة
- ما متشائم بس تقدري تقولي عارف حدود الحاجات العندي كويس وما عايز اتشعلق في الهواء
- حتى لو في ناس انت عاجبهم شديد
أهاااااااااااااااااااااااااااااااااااااااا
يا سيدي الحسن.....