وسقط المريخ...

* يا العجب غايتو (نومتك) الكانت في برنامج صدي الملاعب جيت وتميتها في مباراة الامس.
* الفريق كلو امس كان نائم.
* الجمهور ذاتو نام ..وقت صحي قام يجدع.
* الباشا حارس مرمي..وجمال الوالي في كنبة الاحتياطي..ومحمد عبدالله مازدا في المقصورة.
* جنس لخبطة.
* يا جمال الوالي انت في (المقصورة) بتلخبطها ..كمان عاوز تقعد في كنبة الاحتياطي.
* اول مرة اشوف لي رئيس نادي بقعد في كنبة الاحتياطي.
* آخرتها يا الباشا ناس المريخ بقوا يلعبوك (حارس مرمي).
* انت ناقص.
* دا انت طلعت اي كلام.
* كمان بقيت تلعب حارس مرمي.
* الباشا في المريخ مرة ليبرو ومرة طرف يمين ومرة محور ومرة حارس مرمي.
* بكرة بنشوفك تلعب في اهلي شندي.
* يا ناس المريخ طمعتوا فينا زيسكو.
* الفرق بين الهلال والمريخ في الدوري الممتاز 6 نقاط..والفرق بين الهلال والمريخ في البطولة الافريقية برضو 6 نقاط.
* يعني الفرق بيناتنا بقي (كلية طب) عديل.
* بينا وبينكم يا عالم (كلية طب).
* ابونقطة..... عارفين ليه ماعرف يكتب (الشكوي).
* عشان الشكوى فيها ثلاث نقاط.
* وثلاث نقاط..ما تحلموا بيها.
* دي حاجة اكبر من قدرتكم.
* انتوا فاضين لي من الاعارات الوهمية.
* تاني قولوا لينا في مطر.
* غايتو المطر دي إلا تكون صبت في اكرم الهادي سليم براه.
* احتمال تكون في مطرة...لكن نحن ما شفناها.
* مطرة الزمن دا بتجي بالقطاعي.
* بعدين اكرم دا بكون الي الان متأثر بي مطرة الاردن.
* البرد الدخل فيه الي الان ما طلع.
* مطرة صبت في اكرم الهادي سليم وريتشارد وكلتشي.
* (اولادنا) سابقا.
* طمبل في كنبتو صبت فيه مطرة.
* لكن يا الوالي بالغت عديل ..بقيت تقعد في الكنبة مع اللاعبين.
* عاوزين يغلبوا كيف وانت قاعد ليهم في الاحتياطي.
* اقول ليكم حاجة...استفيدوا من الوقت واعملوا ليكم (طابق ثالث).
* الصفوة بقت تجدع.
* ما تجدعوا فينا.
* في الممتاز يجدعوا....في سيكافا يجدعوا ..في البطولة الافريقية يجدعوا.
* الطيشنة البتعملوا فيها دي شنو؟.
* الطيش دا نحن في (الجري) بنكجنوا.
* قرار متوقع ..اعفاء مازدا ..وتعيين جمال الوالي مديرا فنيا للمريخ.
* المرة القادمة يمكن يلعب ليكم عديل...الزول دا ما قصر معاكم ..يعمل ليكم شنو تاني.
* المريخ لعب 3 مباريات وجاب ليه من المباريات الثلاث نقطة واحدة.
* المفارقة ..ان الهلال في ثلاث مباريات (هدف) ما سجلوه فيه.
* شفتوا الفرق كيف بين طيش المجموعة ومتصدر المجموعة.
* واضح ان الذي صنف المريخ ووضعه علي رأس مجموعة الهلال (احوص).
* جاسوس احوص يا عالم.
* المريخ الذي صنف علي رأس مجموعة الهلال جاء وتذيل مجموعة الهلال بعد انتهاء مباريات الدورة الاولي للمجموعات.
* لا يصح إلا الصحيح.
* نحن شغلنا عملي ..بنتكلم بي الارقام.
* الهلال مطلوب منه بعد فوز زيسكو ان يخرج بنتيجة ايجابية امام كانو في نيجيريا.
* لابد ان يحقق الهلال هنالك نتيجة جيدة وعلي اسوأ الفروض ان يأتي من هناك بنقطة.
* واضح ان المريخ سوف يكون (تكية) لفرق المجموعة..اي فريق يجي ويشيل منو نقاطه.
* يا ناس الوصيف سوكفتونا ..وتوكستونا.
* بكرة ان شاءالله صفحة من الغلاف للغلاف التي اجلتها بعد خسارة المريخ لاجراء التعديلات اللازمة فيها.
* عمود بكرة ان شاءالله سوف يكون تحت عنوان (سوكهتونا).
* اي حاجة نحن عندنا بي نظام.
* ريتشارد من الواضح انو في الهلال كان شايلو (مرق).
* فات مرق واتشتت (الاهداف).
* خايف اعلام المريخ يقول لينا ريتشارد لم (يتأقلم) حتي الان.
* وارغو طبعا معذور.
* احتمال ..اي حاجة جائزة في المريخ.
* مفاجأة.
* بعد مباراة امس المريخ قرر يشتكي.
* يشتكي في شنو كمان؟.
* قالوا فريق زيسكو كان عندو لاعب سنة 1943 اعير الي نادي استرالي.
* المفاجأة ان الاعارة كانت وهمية.
* بس ان شاءالله تعرفوا تكتبوها.
* انتوا تلفون عماد الطيب ما عندكم.
* في حاجة زي دي ما بتلفت بقيف معاكم.
* دي شكوي وطنية.
* المشكلة المريخ لعب في بطولة الاندية الافريقية للابطال بنفس الاسلوب الذي يلعب به في سيكافا.
* سيكافا خربت طبعكم.
* خبر عاجل : يا ناس المريخ يا ريت لو جات امس مطرة ..كنتوا ليقتوا ليكم عذر.

منقول من عمود الرائع محمد عبدالماجد....صحيفه قوون

والله ياأخى محمد أنا عمرى مادعيت على أحد لكنى اليوم بدعو الله أن يطبق الارض على أكرم الهادى ومازدا لنرتاح منهم ومن الألم والمرض الذى يسببونه للملايين وأقول لك بكل صدق من أجلهم بقيت أكره مشاهدة المباريات بل كرهنا المريخ نفسه الذى عشقناه قبل أن نعرف مامعنى العشق وأنا بسأل اداره المريخ الى متى سوف نبقى تحت رحمة هاؤلاء العلوج وأنا لو كنت مسؤل عن الكوره فى المريخ لقلت لأكرم روح بيتكم لغاية ما نكون فريق نسائ وتعال ألعب معاهم لأنو المابلقى شبهو الله يطلع روحو

هههههههههههههههههههههههههه
سبحان الله
والله امبارح في زول قال لي نفس كلامك دا عن اكرم
قال لي الزول دا زاااتو يغري المهاجمين بالهجوم
لانو شكلو ماااااااااااااااااااااااااا(بخوف)!!!!!!

والله من أمس ماضحكت يلا نقوم نتغدى بعد الضحكه الحلوه دى والله فتحت شهيتى يا محمد الله يديك العافيه

وسقط المريخ...

وسقط المريخ...

رد: وسقط المريخ...

رد: وسقط المريخ...

رد: وسقط المريخ...