ملف الأمثال السودانية العاميه

الفكرة ببساطة هى أى عضو يكتب مثل عامى والمناسبة التى يضرب فيها المثل أو أى معلومات متعلقه بالمثل حتى لو مواقف معينه لها علاقة بالمثل .. وبمداخلات الأعضاء نستطيع تجميع أكبر عدد ممكن من الأمثال ونستفيد من بعض - وبخته العنده حبوبه معاهو فى البيت حتكون ليهو مرجع ثر.

سرارة اللعوت تتلاقى يوم الموت
قرابتكم كقرابة شجر اللعوت لاتتلاقى أعواده الا عند حرقها بعد قطعها .. ويضرب لشدة الجفا للأقارب اللذين لايتلاقون الا عند مناسبة عزاء.
وربنا يكفينا شر الجفا.

الأخت أم أحمد لك التحية
سبق وأن كتبت موضوع عن الأمثال واليك والى الأعضاء الرابط

http://alakad.ahlamontada.com/montada-f1/topic-t976.htm

شكرا أخى عمر عباس موضوعك جميل وشامل .. وفكرة موضوعى تختلف إذ خصصت الأمثال السودانية الشعبيه دون غيرها- لأن بحر الأمثال غريق- وغرضى أن نبحث أكثر عنها والتعريف بها.ولا أخفيك سرا ان قلت لك أن هنالك هدف آخر وهو تشجيع الأعضاء على المداخلة والمشاركة بدلا عن كتابتى لبوست واحد به كمية من الأمثال العاميه ..
ومشكور مرة تانيه وحأزور منتدى العكد باستمرار ان شاء الله.

ارع بقيدك
يضرب تهديداً أو انذاراً ويعنى سر كما يسير البعير المقيد لا تمرح
دمع المحنه بيقيف ودمع النفع سريف
ويعنى يبكى ذو الرحم والصديق على الفقيد فيقف دمعه ويبقى ذو المنفعه جارياً دمعه وقتاً أطول

تسلمى أختى نهله
وهاك منى دول :ـ
(1) من خلى دارو قله مقدارو
ويقال للشخص الذى ترك بيته ليبحث عن الراحه فى غيره

(2) ياباها مملحه ويدورها حافه
ويقال للشخص الذى يرفض الشيئ ثم يرجع يبحث عنه

(3) بليلة مباشر ولا زبيحة مكشر
أى أن الفقير الكريم ولا الغنى البخيل

قليل الفهم يآكل الكسرة ويخلى اللحم

يضرب المثل لمن ينشغل بصغائر الأمور عن عظائمها فهو كمن يملأ بطنه بالكسرة تاركاً اللحمة لغيره.

فكره رائعه أم أحمد00
جبناه فزع بقى لينا وجع
يضرب للشخص يؤتى به للمساعده فيزيد الطين بله ملف الأمثال السودانية العاميه Icon_lol

00
ان شاء الله يكون تفسيري ليها صحيح00

ويطابقه المثل الذي يقول
جبناك يا عبد المعين تعين00لقيناك عايز اعانه00

ما تشكر لي الراكوبه في الخريف : ـــــــــــ
الراكوبه عندما يصب المطر لاتقي ساكنها كاملاً من المطر..
ويضرب في حالة الناس الذين لا مواقف لهم , ولا تجدهم ساعة الحاجه لهم .

تسلمي يا أم أحمد علي البوست الرائع والجميل ..

من طرف **sala35** الأحد 31 يناير 2010 - 8:49

[*الناجحة من عشها زوزاية
ويضرب المثل ليعني ان نتيجة كل شئ واضحة من بداياتها..

ويرادفه

**المطر اللين من بشايرو بين

وايضاً

***العريس من بشتو والمطر من رشتو

الفقراء إتقاسموا النبقة ..
وهو مثل للتكافل والتعاضد وضد البخل ..
فمهما كان الشيء قليل
يتقاسمه الناس بينهم برضاء تام وبفرح كبير.

شدرة أكان أتلولحت أما هبوباي ولا أبلاي

وهو من أمثال اهلنا ناس غرب السودان. ويقصدوا أبلاي (عبلاج) وهو القرد الضخم .

ويضرب المثل بمعنى أن اي شئ يحدث بكون في ليهو سبب ومافي حاجة بتحصل ساكت.

يلمها النمل وياطاها الفيل ..
وهو مثل يقال للذين يكدحون ليلا ً بنهار ويجنون حصاد تعبهم ..
فيأخذه منهم أحد أصحاب النفوذ أو من هو علي شاكلتهم .

**دنيا دبنقة دردقي بشيش...

والدبنقة في عامية كردفان تعني الزير صغير الحجم او القلة.
ولمن لا يعرف الزير من الحناكيش فهو اناء من الفخار يحفظ ويبرد فيه الماء...

ويضرب المثل بمعني ان الدنيا تحتاج للصبر والحكمة في كثير من الامور...

***الدنيا دولاب ....

مثل سوداني مشهور ويعني ان الدنيا حالها متغير وماعندها ضمان..

ويتضح شرح المثل اذا علمت ان الدولاب المقصود هو احد مكونات الساقية.وهو متحرك ليمكن القواديس من الدوران لرفع الماء من النيل الي الجدول..
وعدم وجود اشتقاق لكلمة دولاب في اللغة العربية قد يشير الي انها كلمة وافدة من اللغات القديمة...

يا حافر حفرة السوء وسع مراقدك فيها

يقصد به من يعمل شر يحصد نتيجة عمله وكما تدين تدان.

يا أم أحمد تسلمي دائما" إقتراحاتك نيرة

ضل الدوم بيضل بعيد
ضل يعني ظل وهذا المثل بيعني أن أقاربك يعينو الغريب وما يعينوك

علي شناتا قامتلها سن في لهاتا

ويضرب المثل للشخص كتير العيوب والمشاكل عندما ياتي بمصيبة جديدة

التسوى كريت تلقي في جلدها
وكريت هي الماعز لما تاكل شجر القرض ويستعمل القرض لدباغة الجلود
والمثل يضرب لما زول يعمل شر ويرجع ليهو عملو في نفسو

الماعارف شيلك بجلبقك

ويضرب المثل أن من جهل شئ لايعرف مقداره واذا اوكل أمر لغير اهله نتيجته الفشل

الحسنه في المنعول00زي الشرى في القندول00

يعني يعني صدقوني عارفه المثل لكن مافاهماه!ممكن شرح؟ ملف الأمثال السودانية العاميه Icon_redface

الأخت الفاضلة أم أحمد
لك التحية الطيبة سلااام شنداوي

يقال في المثل ويستخدم بطرق شتى

لحقو الزينين
أو
بجي ألحقك الزينين

وهذا المثل شنداوي بحت

الزينين هن آل الزين في مربع سبعة وتسعة

عدد من الأسرة كان يركبون مركب من غرب شندي فغرق المركب ومات معظمهم

لك التحية والتقدير

خالد محجوب

أبو معتصم كتب:
الفقراء إتقاسموا النبقة ..
وهو مثل للتكافل والتعاضد وضد البخل ..
فمهما كان الشيء قليل
يتقاسمه الناس بينهم برضاء تام وبفرح كبير.

الكرم عرف به أهل السودان قاطبة

لكن هناك من يزيدون في الكرم حتى فاقوا حاتم الطاي

كانت من عادات بعض القبائل أن يكرموا الضيف حتى راحته يهيئنها له

نزل بعض الفقرا اي اهل دين وقرآن عند رجل كان كريم ومحدود السعة

وبعد أن أكرمهم

بالليل أحضر لهم خادمه تقضي معهم الليل وكان لا يملك غيرها وكان أسمها نبقة

فتعاقبوا عليها

لذا صار المثل يقال الفقرا تقاسمو نبقا

وقد عرفت بالآلف واللآم عند بعض مستخدمي المثل

الفقرا إتقاسموا النبقة

ويظل معناها ثابت اي التكافل حتى في الشئ الذي لا يقبل القسمة

والله أعلم

الأخ خالد على محجوب .. سعدت بمرورك وسعدت أكثر بإضافاتك الثرة ، وحقيقة دى أول مرة أعرف المعنى الحقيقى للمثل ( لحقوا الزينين) رغم استعمالى له كثيراً ....
لك أجزل الشكر .

أهل الحـد غفرو والجيران كفرو

شرح المثل:
ان اهل المتوفى رفعو الحد(بكسر الحاء) وجيرانهم مازالو مواصلين فى حزنهم وكمان بلومو فى الناس.

ويضرب المثل :
عندما يتنازل صاحب الحق الاصلى عن شئ او موضوع ما ويتمسك به غيره.

**** لحق امات طه*****
ويضرب للشئ اذا انتهي او بالسوداااني كدا طيارتو قامت
وبيقولوا انو طه دا كان ولد وحيد وخالاتو 6 وكلهم بيحبوهو حب شديد
ويوم من الايام طه طلع من البيت وما رجع وامو طلعت تبحث عنو وبرضو ما رجعت
وكل مره تتطلع واحده من خالات طه للبحث وما ترجع لحدي ما انتهوا كلهم
ولا رجع طه ولا رجعوا اماتو
والله اعلم

الماعارف بقول عدس

شرح المثل:
( يحكى أن رجلاً يحمل سكيناً ويطارد آخر بسبب غبينة شديدة وفى اثناء ذلك قلع الخائف شتلة عدس وحملها معه وهو مازال مطارد فمر بجماعة وسألوه الزول دا ساكييك لشنو؟ قال ليهم بس قلعت لى شتلة عدس من زراعتو. فلما وصل صاحب السكين حاشوهو منو وقالو ليهو :يازول انت مجنون؟ داير تكتل الزول دا فى شتلة عدس؟قام قال ليهم Sad

الماعارف بقول عدس).

ويضرب المثل:
عندما يتداول الناس أمر ما دون معرفة حقيقته.

الحسنة في المنعول زى الشرى في القندول
المثل دا يضرب لما تعمل حسنه في زول ما بستاهل ويرد الحسنة باساءةو ما يقدر
مجهودك ويقابله بالتجاهل او التعالي والشرى في القندول يعنى شرارة النار لما
تصل قندول القمح او العيش ويشتعل بسرعة والله اعلم
لعيوووووونك يا زيزو Smile

الفوله بتتملى والبقارة بتجى

شرح المثل:الفولة هى منطقة منخفضة من الارض تتجمع فيها مياه الخريف ويستفاد منها رعاة البقارة فى باقى فصول السنة فى شراب البهائم وغيره.

يضرب المثل:لما يتلوم زول فى اخوه وبذكره الاخر بانه يوما ما بجيهو تااانى محتاج وبوريهو.
ويرادفه من الامثال:بجى الخريف واللوارى بتقيف.وايضا: كراع البقر جيابه.

جارك القريب ولا ود امك البعيد
والمثل دا يعنى انك لما تكون بعيد من اهلك واخوانك
(زي حالتنا دي)
تبقي عشرة علي جارك لانو في الحالة دي هو الاقرب ليك
اكتر من اخوانك

بيدى الحلة بكا والنقارة عصا
شرح المثل:
بمعنى ان الشخص يمثل الحزن عند ناس البكا ويتحول منهم لناس العرس ويطرب بالحفلة.

يضرب المثل:
للشخص الذى ليس له موقف محدد وبجامل كل زول ويوافقه على رايه ويقول ليهو كلامك صاح. [b]

من طرف **sala35** السبت 13 مارس 2010 - 13:04

الشر إن بات مات
شرح المثل
سيدالغبينة او الزول الزعلان كل مايصبح عليهو يوم بقل انفعالو شوية وتخبو ملامح الشر.
يضرب المثل:
خاصه عند ناس الاجوادية فى امتصاص الشخص الغضبان لتفادى رد فعله فى ساعته الاولى عشان مايشتكى الزول الظالمو فى المحكمة ولايعتدى عليه بيده.

المسكين دقل
(بضم الدال والقاف)
هو من امثال اهلنا ناس كردفان
الدقل عندهم بمعنى الجضل بكلام اهلنا فى الشمال
وهو جذع الشجرة المتبقى بعد قطعها او هو العودالصغير
ويضرب المثل :ان الشخص المسكين فى المجتمع مافى زول منتبه ليهو.فهو كالدقل لاتحس بوجوده إلا لامن تعتر فيهو .

[/size]

الخيل تقلب والشكر لي حماد

وقصة المثل حدثت خلال فترة دولة الفونج
ودارت معركة شرسة كاد ان يقتل فيها احد ملوك الفونج ،جرح ،وكان لابد من اخلائه من ارض المعركة واعادته لتلقي العلاج .واشرف على نقله ابنه حماد وكان مقربا لديه .ولكن المهمة الاكبر كانت لابنه الاخر وهي مناوشة العدو علي ظهور الخيل حتي لايهجمو علي موكبه .
ولما وصل بسلام وتعافى قال (والله لو ماولدي حماد كنت ضعت )
فقال ابنه الاخر (والله الخيل تقلب والشكر لي حماد)فصارت مثلا
يضرب عند نسيان فضل شخص معين او نسبته لغيره .

الرائعة أم احمد فكرتك مميزة
تخريمة لسلا..انت متخصصة في أمثال اهلنا بغرب السودان والا شنو طب هاكي ولو ماعرفت أفسره مظبوط عليك بيه
يداك أوكتا وفوك نفخ
يقال للزول البوقع نفسه في ورطة براه اما بفعل يديه او بلسانه (فوك نفخ أي فمك تحدث) والله اعلم

من طرف **sala35** الأحد 2 مايو 2010 - 10:39

التحية ليك عمدة شندى ومليون مرحب بيك...
احمل كل الود والمعزات لاهل غرب السودان وصديقاتى فى الجامعة كلهم من الغرب ومشيت معاهم الابيض وودبندة وبارا والزريبة وعبرى عرفو الشمال واثرتم شندى ..
واستفدت خالص من ثقافتم وامثالم وحتى اللهجة كنت متأثرة بيها فترة(ناكلو ونشربو ونمشو)
الليله ياعمدة شندى ذكرتنى ايام لاتنسى فى رحاب الغرب ومثلك صحيح100%وسمعتو من ام صاحبتى وشرحتو بنفس طريقتك.

[b]

من طرف **sala35** الخميس 6 مايو 2010 - 15:10

المرفعين بعرف جوعار رفيقو

ويرادفه

ابو القدح بعرف محل يعضى اخوهو

(الجوعار هو صوت المرفعين)
يضرب المثل
ليدلل ان الشخص لا يستطيع ان يخبى حاله وصفاته عن من يشابهه او من يعلمه جيدا .

وييييين امثالنا السودانية السمحة ..
يلا يا جماعة كل زول يدخل يكتب مثل..

دوّار جمل نسيبتو , ان لقاهو يغني وان مالقاهو يغني .
يضرب لمن لاهم له , ولا يكترث بمسئولياته .

أن بقت فأس مابتشق الرأس
كان زمان ما بي تشق الرأس دي من الامثال المحتاجه لتحديث
متفقين معاي وبدل الفاس حنستعمل شاكوش
واحد مشوكش يكمل مشروع المثل lol!

المشتهي الحنيطير يطير
يضرب المثل في الشي المكروه

الجفلن خلهن اقرع الواقفات
يضرب هذا المثل في من ترك الاهم وانشغل بغير المهم

الراجل أفجخيهو بصله قبل مايبقى أصله
يعني راجلك أديهو العين الحمراء من أول يوم قبل مايطلع ليك فوق رأسك
وطبعاً ده من الأمثال الخاطئه لانو الزواج بيقوم على الموده والرحمه

الحساب ولد
أي الحساب كالولد لا ينسى يضرب عند المغالطة في الحساب

الحوت ما بهددوه بالغرق
يضرب بعدم المبالاة بالوعيد

(الحسنة في المنعول زي الشري في القندول)

يضرب لمن تخدمة بلامقابل ولا يشكر ولاحتى يظهر في وجهه علامات للشكر.
خصوصا خدمة الوالدين وعدم شكر وتقدير الابناء لهم.

من طرف arahim الإثنين 23 يونيو 2014 - 9:14

بخيت شكروه قال داك شهر تانى
قيل أن شخصا اسمه بخيت رأى بين جماعة هلال رمضان دون غيره واراهم اياه فشكروه وشهدوا له بقوة الإبصار فاغتر بالشكر وقال داك هلال تانى ، يضرب لمن يدعى معرفة الشئ اكثر من الواقع المعتاد