رد: فى خيمة ود فضيل

نواصل الليلة جلساتنا في الخيمة ،،
وقلت لي عمنا ودفضيل وصلتنا عدة رسائل في بريد الخيمة ،فيها اشادة وطلبات معينة من الاخوان كبسور وحوذي .
قال لي كنا دايرين نمشي في سردنا تدريجيا،لكن استجابة لطلب ولدنا حوذي حانخصص هذه الجلسة عن الفنان عبدالحميد يوسف وحانتكلم في مرة تانية عن الفنان بادي عليهم الرحمة جميعا ،،
يعتبر الفنان عبدالحميد يوسف حالة خاصة في تاريخ الغناء في السودان ،لانو عاش في فترة الحقيبة وتميز فيها وعمل ثنائية رائعة مع الشاعر عتيق ،وكان يمتلك صوت جميل ،وقدم عشرات الاغاني في تلك الفترة ،بل ان اغنيته المشهورة (اذكريني ياحمامة )ومعها كسرتها (انا داير العنب انا )كانت امتحان ثابت وصعب لكل الفنانين الدخلو الاذاعة منذ افتتاحها في عام 1941ولي فترة تزيد عن ربع قرن من الزمان ،اول ما الفنان يقعد عند لجنة الاصوات ،وكان فيها ناس صعبين ذي العبادي،ومتولي عيد وابوالعزائم ،طوالي يقولو ليهو غني لينا اذكريني ياحمامة ذي مابقولا عبدالحميد ،والفنان الوحيد الذي رضيت اللجنة عن ادائه كان الفنان حسن عطية ..
المهم اننا قلنا عبدالحميد كان حالة خاصة ،لانه بعد الحقيبة كان علي راس الفنانين العملو النقلة ،ونعني بذلك انتقال الاغنية للمدرسة الوترية الجات بعد الحقيبة.وطبعا اغنية الحقيبة في غالبها تميزت بالحن الدائري ،وعبدالحميد يعتبر اول من جاء بالسلم الموسيقي في السودان ،ونعني بذلك تعدد المولودية في الاغنية .
ويعتبر عبدالحميد يوسف استاذ للفنان الكاشف وزملائه في تلك الفترة .
ومن اشهر اغاني النقلة للحاج عبدالحميد يوسف كانت اغنية (غضبك جميل ذي بسمتك) للشاعر الكبير حميد ابوعشر ،واغنية (على موج الاسير) ،وغير ذلك عشرات الاغاني ، وتلسطن عبدالحميد في الغناء الحديث كما تسلطن في الحقيبة ،عشان كدا قلنا انو كان حالة خاصة ..

وكلام ولدنا حوذي صحيح ،من حيث ان الفنان عبدالحميد يوسف ظلم من الاعلام ،ولم يوثق لفنه عشان كدا الناس سمعو غناهو لكنهم ماعرفوهو ،،وحانهديك ياحوذي جزء من نص اغنية (غضبك جميل ذي بسمتك) وتسمعا بصوت صاحبها الاصلي ،،
عليك الله ياحوذي تأمل شعر عمك حميد ابوعشر في الاغنية ،هل دا كلام زول عادي ؟الم يكن سابقا لزمانه بعشرات السنين ؟
واستمع لهذا الصوت الخالد ،وشوف التطريب وتمكنه في الاداء وكيف بغني بارتياح شديد في منطقة الغرار والجواب ،ممايدل على سلامة صوته (الغرار والجواب دي ياحوذي لو مافهمتها خليها،دا كلام موسيقى ،برا المقرر) ،وشوف الفرقة دي رغم بساطتها من ناحية العدد واعتمادها على الايقاعات والة الكمان والعود فقط ،لكن ناس عمك عبدالفتاح الله جابو ،وبرعي وعربي جودوا العزف بطريقة مذهلة .
وانشاء الله نكون ارضيناك في هذه الجلسة ،،

غضبك جميل زي بسمتك
على كل حال شكلك بديع ..
حكم الغرام بي تذللي
وحكم الجمال بى تدللك
الاشتياق والاحتراق والوجد لي
الابتسام والإنسجام والحسن لك
عجبا تكون قاسي ووديع شكلك بديع
غضبك جميل زي بسمتك

نظرت عيونك لمحنتي
وسحر الجمال في بهجتك
خايف خدودك تنجرح من نظرتي
خايف فؤادي يذوب حنان من نظرتك
جرت وجفيت وجفاك فريد
يا آية المعنى الرفيع

كيف الخلاص يا دنيتي
ما بين صدودك وجبرتك
أراك قريب لكن بعيد عن رؤيتي
من بعد ما أوقعتني في فتنتك
جرت وجفيت وجفاك مريع
يا آية المعنى البديع

من طرف huthy2000 الخميس 20 مايو 2010 - 14:19

امبارح من شدة ما اتكيفت من خيمتكم لمن جاتنى( لخمة راس)..هو معقول فى زول يسمع غنا ولاشعر زى دا وما يصحى بى(لخمة راس)..اصبروا على شوية انا جاييكم فى الكلام..اها لما صحيت من النوم لقيت الساعة ستة و نص قمت افتكرت انو الدنيا (عصر)..معناها مفروض اكون فى الدوام قبل ساعتين و نص..وبسراع لبست هدومى ويا الشارع جاك زول..اها ما مشيت خطوة خطوتين حتى بقيت ادندن(غضبك جميل زى بسمتك)...هيى،هيى يا اخوانا دى ما سمعتها امبارح باليل..معناها اسع(الصباح)ما(العصر)...يا اخوانا فى (لخمة راس) اكتر من كدا..وبرضو غضبك جميل زى بسمتك...

الرايعه سلا لكى التحيه والاحترام على الكلام الجميل دا
وعليك الله عمنا ود فضيل دا تسالى عن المرحوم الجابرى
طبعا كان تعزب لحدى ما اجيز صوتو من قبل الاذاعه
حكاية العجله الكان بمشى بيه الاذاعه
وبرضو وفاة امه كيف كان اثرها عليهو

الاخ عواج الدرب لك التحية
وشكرا على زيارتك للخيمة
انت معجب بالفنان الجابري ودا معناهو انك زول سمعك راقي
الفنان احمد محمد عبدالله الشهير بالجابري قامة وقيمة فنية عالية
وحكاية صعوبة اجازة الاصوات دي عادية زمان،فالعديد من الفنانين الكبار لم تجاز اصواتهم من اول مرة وكان عادي الواحد بقولو ليهو تعالينا بعد ستة شهور وتاني يقولو ليهو بعدستة شهور.
دا كلو بسبب حرص اللجان الشديد انو مايقدمو صوت للشعب السوداني ويكون فيهو شك .وكانت الساحة مليانة قمم .
الجابري ناس الموسيقى قالو عندو صوتين ،احدهم صوت عالي غليظ (باريتون) والثاني صوت حاد (سبرانو) ،ومع كدا كان نفسو واسع،وبلحن بهذه المقدرات عشان كدا من الصعب تقليده ،يعني لو جاء واحد من نجوم الغد ديل او الواعدين يقلدو نفسو حاينقطع طوالي .له الرحمة .

له الرحمه ولكى ياسلا التجلا والاحترام
مشكووووووووووره

تتواصل جلساتنا اليوم مع عمنا ود فضيل داخل خيمته العامرة...
قلت ليهو ياعمنا شايفاك سرحت بينا بقصص الحقيبة دى وطولنا ماسمعنا من شعرك.هل عندك ملهمة كتبت فيها شعر غزلى ؟ ودايرنك الليلة تدينا قصيدة وتورينا مناسبتا .
قال لى أبداً مازغت منكم وشعرى جاهز والليلة بسمعكم منو .
أى شاعر لايستطيع أن يكتب شعر غزلى من غير محبوبة أو ملهمة .فهى التى تفجر مقدرته وتعبر به من شخص متذوق للشعر الى كاتب يمتلك ناصية القصيدة.
افضل انواع الشعر عندى مايجمع بين الفصحى والعامية لانو بكون طاعم ومسبك .
فى احدى الامسيات والدنيا قبايل عيد جانى طيف المحبوبة فكتبت قصيدة وبديكم جزء منها

منو الغيرك...
أدى العيد حلاوة أسمو
قسم طعمو بين الناس
وجمل فى كل شفاه رسمو
منو الغيرك...
خلى الريدة بالاحساس
وكل محب زول حساس
قليبو خفيف ورهيف جسمو
منو الغيرك...
للمحنة أساس
وطيفك للخيال مقياس
حويتك بالضحى ويس
وبى شيخى الزيارتو إتنين
ينجيك ربى من العين
ياالإسمك فى الحروف ستين

ونواصل فى جلسة قادمة بإذن الله،،،،،،

ستين في البنات راسية وتقيل ميزانك
فوق للنجمتين والقمرة عالي مكانك
خصاك بالجمال والمولى عظم شأنك
كساك هيبة ودلال وليك عفافك صانك

كلمات قرأناه سابقاً فى هذا البوست وأعجبنا بشعر عمنا ود فضيل وشاعريته ... واليوم يتحفنا برائعه أخرى من شعر الغزل ...
لك التحية عمنا ود فضيل وياليتك تفتح لنا أبواب بستان شعرك نتجول فيه ونستمتع بنظمك الجميل ...
ولك التحية سلا مثنى وثلاث ورباع على هذا البوست المتميز جداً ...

يا سلا ويا عمنا ودفضيل ما بالغتو عديل..يعنى عشان عارفننا بقينا نخرم لى حاجاتكم الحلوة دى،بقيتو تطولو الغيبة وكمان لما تجو تدونا الحاجات بالقطارة..وبصراحة جكيك ام تسابيح دا ما بنفع معانا ولا بفك الخرمة، ادونا بالجردل الكبير..وكما عندكم جردل كبير شيلو الجردل اللى قاعد فى راكوبه ام احمد اللى عملتا ظاهرة ومباريانى لاى حته امشى عليها..

خاص لسلا: عجبنى شديد انو يكون فنانك المفضل مصطفى سيد احمد...

فات الكان بدينا احساس بالالفة

وكان راوينا

ولافى ورانا مدينة مدينة

حتحت فينا غناهو الطاعم

وفات قنعان من خيرا فينا

أم احمد كتب:ستين في البنات راسية وتقيل ميزانك
فوق للنجمتين والقمرة عالي مكانك
خصاك بالجمال والمولى عظم شأنك
كساك هيبة ودلال وليك عفافك صانك

كلمات قرأناه سابقاً فى هذا البوست وأعجبنا بشعر عمنا ود فضيل وشاعريته ... واليوم يتحفنا برائعه أخرى من شعر الغزل ...
لك التحية عمنا ود فضيل وياليتك تفتح لنا أبواب بستان شعرك نتجول فيه ونستمتع بنظمك الجميل ...
ولك التحية سلا مثنى وثلاث ورباع على هذا البوست المتميز جداً ...

تسلمى ام احمد وازدانت الخيمة بمرورك ودا من ذوقك الراقى وانتم موعودين بحلقة طويلة نعرف عبرهاكل اشعار عمنا ودفضيل...

شكرا ليك يأخ حوذي
مادام انت معجب بالفنان مصطفي في بوست كامل توثيقي له في منتدى الاغاني .أطلع عليه وساهم بقلمك .

الرايعه سلا كيف حالك واخبارك شنو ياختى مسؤله من الخير
ماله سواليف عمنا ود فضيل متقطعه نحنا منتظرييين الجديد
تخرييييمه \\\سلا انا من قراء كتاباتك بس الصوره الرايعه دى
عامله ليه ضيق لانه بتاخذ جذ من الموضوع
لكى التحيه والاحترام

مزيد من القراية .

[b]نفضنا الغبار من خيمتنا العاااااااااااااااامرة بكم ......وفى انتظار عمنا ودفضيل والحكى ...خلييييكم قراااااااااب

فى خيمة ود فضيل