يوميات شندي(شمارات)

نرجو من الاخوه التواصل عن كل مايدور بمدينة شندي بشكل يومي اي اخبار يوميه(شمارات) وخبر اليوم سخانه شديده

الف مرحب بيك اخى مندر عضوا فاعلا حتى نرتقى بمنتدانا

فكرتك جميلة ونحنا كنا فى حوجة لمراسلين من شندى حتى نطمن على شندى اول بأول ونتمنى تكون متواجد بشندى حتى نعيش مع تفاصيل امنا الرؤوم.
ودعوة للجميع لاثراء ودعم الفكرة
دمت،،،،

ليك التحيه وياريت لوكنت في شندي بس للأسف خارج السودان ومتعطش لاخبار شندي (اشتهينا شندينا 600و60يالله ودينا النشاهد محبي)

فكرة جميلة جداً ...
المتواجدين فى شندى يمكنهم مدنا بالأخبار طازجة من موقع الحدث .. والمغتربين نقبل منهم الشمارات التى تصلهم (بس ما تكون قديمة) يوميات شندي(شمارات) Icon_lol

.

شمارات مصطلح غير لائق علما بان الموقع ارقي واجمل من هذه المسميات حيث انه يطلع عليه ارقي طبقة اجتماعية من شندي منهم دكاترة ومثقفين و000الخ وهو بمثابة اللمتنفس لهم وكثير منهم ومنا يكره كلمة شمارات لانها تشعرك بالنميمة وتشعرك بالاساليب السوقية فلماذا لانسميها مثلا اخبار شندي صالون شندي انشاء الله نسميها قهوة التيمان ولاشمارات الحريم

من طرف مندر السبت 12 يونيو 2010 - 16:46

الاخ عبد الله مرحب بيك يااخوي
نسبة لانزعاجك من المصطلح ارجو من ادارة المنتدي الغاء البوست تماما ولو كان امر الالغاء عندي فارجو توضيح الطريقة
اما حكاية الذين يطلعون علي المنتدي من الدكاتره والمهندسين كما ذكرت يااخوي انا لا دكتور لا مهندس لا مثقف انسان اكتر من عادي من الطبقه التي لم تزكرها (او التي تتكلم بهذه المصطلحات)عموما شكرا علي التنبيه مع التحيه

لولا اختلاف الفهم لتلاشة المصطلحات
ارجو من الاداره التنفيز
مع الشكر

حبيبنا عبدالله مرحب بك فى المنتدي
وشرفتنا كتيررررر ونتمني نشوف مشاركاتك الثرة ..

مصطلح شمارات ده مصطلح معروف فى كل السودان
بعرفو الدكتور وبعرفو المهندس وبعرفو التاجر
وبعرفو بتاع البنشر وبعرفو المكانيكى وبعرفو بتاع الفول
وست الشاي وست الفول
والمنتدي مكان جامع يجتمع فيه كل الناس
بعيدا عن المهنة والثقافة منتدي يحوي كل الالوان
ولم يحدد لشريحة معينة من الناس يستوعب كل الفئات ..
ومندر لما قال شمارات حتي يغلب على طابع الاخبار
الضحك والونسة والفرفشة مثلا لو قال اخبار شندي
أو صالون شندي او قهوة التيمان بكون طابع البوست
الجدية والراجل عايز يفرفش ويعيش شمارات اليوم
أول بأول ..
ويا مندوري اخر شمااااااارات الفاشر ودكان التعاون شنو
طولنا منها ؟

منتدى شندى هو منتدي جامع لكل شرائح
المجتمع الشنداوي والسودانى ,, لذلك لا اري
غضاضة في استعمال الالفاظ الشعبية السودانية..
المنتدى اكتر من راقي واكتر من متحضر ,, وكل من
ينتمى اليه لا تنقصه ثقافة او يعيبه جهل ..
اتمنى ان يستمر البوست علي ما هو عليه
وتحت المسمى الذي اختاره له كاتبه..

أخي مندر لك العتبى حتى ترضى وماتزعل عشان راي فرد واحد .
والبوست عاجبنا أسمو دا ،وماتغيرو ولا توقفو .
اولا متين بقو الناس بقسموهم طبقات ،ونحن في المنتدى دا اسره واحدة مافي قاعة درس ولا مدرج ،وعامة الناس هم ملح الارض ومعظم الابداع في السودان جاء من عامة الناس والصنايعية والبسطاء وليس من المثقفين وحدهم والمجال هنا لايتيح سرد الامثلة ..
بعدين كلمة شمار كمصطلح ليست كلمة هابطة ،وهي مصطلح دخل كل البيوت واجهزة الاعلام وتوافق وتصالح معاهو كل السودانيين ،وهو يعبر عن حالة وهي الحالة الشمارية تصيب الجميع وليس النسوان براهن ،صغار وكبار ..
الشمار ذاتو :هو الخبر الجديد لنج ومدسوس شديد ومن مواصفاته أحداث رد فعل قوي عندما يعلمه كل الاطراف ،والمعلومة اذا وصلت لحدي ستات الجبنة وسيد اللبن وصاحب الدكان بتكون خرجت من كونها شمار وبقت خبر متاح عادي ،ودائما الشمار بكون في الاخبار الاجتماعية السعيدة وغير السعيدة وغير ذلك فمثلا في زول قبال شوية بس اتصل لي بت وقال ليها دايرك ،دا شمار ،ولو في زول قبال شوية بس خطيبتو خلتو ،او راجل طلق مرتو دا برضو شمار .ولكن الشمار ممكن يتعدا لي اكتر من كدا ،الباشكاتب ممكن ينادي صاحبو المقرب ليهو شديد ويقول ليهو عمك خلاص نقلوهو وارتحنا منو ،جوابو جا قبال شوية ويقصد المدير ،الخبر دا في مرحلتو الاولى دي يعتبر شمار ،او الباشكاتب يقول لي صاحبو زولك المحاسب طيارتو قامت المراجعين قبال شوية جردو خزنتو ولقوهو عامل كمشونات وكتبو فيهو تقرير حار ،دا طبعا بكون برضو شمار حار شديد وكمان اخضر ومغربل جديد ،لكن بعد يومين لما ناس الحوش في المصلحة كلهم يتكلمو بالموضوع بكون خلاص بقى خبر عادي ماشمار ..
بتاع الشمارات :هو دائماشخص له مقدرة غير عادية على تحسس الاخبار وتصنتها وتحليلها ،ويلاحظ حركة جميع من في الحي ويشعر باقل حاجة حاصلة وله قرنا استشعار قويات ومرات بكون مجند مصادر بدوهو راس الخيط ،ويداهم الناس العندهم موضوع داسنو ،ويقول ليهم ياجماعة نعال ماعندكم عوجة ويقابل باستياء شديد وهلع من ذوي الشأن خوف تسرب الكلام او المشكلة الحاصلة ..
ناس الشمارات :هم مجموعة من الناس عندهم مرض الاخبار ودائما هم بصاحبو الزول بتاع الشمارات عشان يعرفو الحاصل اول باول وهم دايما بكونو قاعدين جمبو في صيوان البكاء او العرس او في اي مكان لو كان في شمار قوي وحساس ومستعجل والجماعة ديل من تلقاهم متلمين وكاتلين حيلم ويوسوسو اعرف انو بعد يومين بطلع خبر في الحلة وهم بتكلمو فيهو قبل الطبع .وبتاعين الشمار ديل مهابين من كل ناس الحلة خاصة الشباب لانهم هم الاعلام الشعبي وبرصدو تحركات كل زول في الفريق .واي حاجة بتحصل بشعرو بيها طوالي .وطبعا هسه التقنية والتكنولوجيا جات في صالح الشمارين ،وبقي الشمار يتغربل طوالي لحظة وقوعو بالموبايلات والفيس بوك والاسكايبات .

أزيكم ياجماعه .. الحاصل شنو ؟

انا شفت اللمة بى هنا قلت أكيد فى شمار جديد من شندى يوميات شندي(شمارات) Icon_lol

ويامندر أريتنى لو فى شندى كنت مليت ليك البوست دا بالأخبار ..
أخونا الجديد عبدالله ألف مرحب بيك بيناتنا .. والمنتدى يسع الجميع كما وسعتهم شندى وضمتهم بكل حنان ..
وهسه مافى مشكلة أفتح صالون شندى وحتلقانا كلنا بربطة المعلم معاك .. وحبابك عشرة .

من طرف huthy2000 السبت 12 يونيو 2010 - 19:15

والله وبكل صراحة..اعتقد ان اجمل حاجة عملها المنتدى هو روح الاسرة الواحدة لدرجة انو الواحد بقى يخرم لطلة كل واحد فينا بالمنتدى حتى لو ما كتب اى حاجة،يكفى بس انو يديك احساس بوجودو قريب منك فى المنتدى...وطالما انو نحن اسرة واحدة فمن الطبيعى انو الناس تختلف والشاذ هو ان نكون على اتفاق دائم... ولكنه اختلاف فى الاراء وليس فى الاشخاص لان الذى يجمع بيننا اكبر من كل شئ...وقد يكون البعض منا تعرف على الآخرين من خلال هذا المنتدى ومن خلال كتاباتهم...ومن خلال هذه الكتابات اطلعنا على الكثير من الخبايا التى خبأناها لسنين عديدة ولم ترى النور الا من خلال هذا المنتدى..يعنى عرفنا بعض بقلوب مفتوحة..وليس من السهل على الانسان انو يفتح قلبو لشخص تانى لو ما توفر عامل الثقة..وطالما كلنا فتحنا قلوبنا دا معناهو اننا كلنا بنثق فى بعض وبنحب بعض..وهل هنالك معنى للاخوة الصادقة اجمل من ذلك، ان تثق فى الآخرين من غير ان تراهم..فلنحافظ جميعا على هذه الروح الجميلة التى تجمع بيننا بل نحاول ان نطورها اكثر من ذلك...و المشكلة انو نحن جينا نفتش للشمارات وما لقينا اى حاجة ولا حتى ريحة شمار...

تحياتي للجميع والله اللمه دي انا ماشفتها لكن الاخبار جاتني فكره رائعه ولذيذه وزي ماقال دكتور حزيفه إختلاف الاراء لايفسد للود قضيه ومافي مشكله خلينا نكون ديمقراطيين اى واحد يقول زي ماعاوز شمار كزبره اخبار صالون المهم محبتنا لبعض زي ماهي والتواصل بينا اكيد في حدود الإحترام وتقدير الاخر ونحن اولاد بلد واحده
الفكره جميله يلا عاوزين نشاط وحماس

اخواني مندر وام احمد طبعا شوقنا لايوصف لاحبار شندي ومن الاخر كدة انا قاعد لكم من اليوم في الصالون وياريت تصنف الاخبار الي الاتي الدرجة الاولي الافراح والاتراح دي لانها دايمة ومابتنقطع يعني لكي لاينطفي نور الصالون الدرجة الثانية الاخبار العامة السياسية الرياضية الثقافية التعليمية الدرجة الرابعة الاخبار الخاصة والسرية وكل هذه تحتاج لدقة في ايصال المعلومة الصحيحة لذا لازم يكون في كنترول للصالون وماديارين التفاح الفاسد

ياجماعه الحاصل شنو حتى البوست دا إندفن Question

البوست ده اندفن عشان المهاترات رغم محاولات ام احمد وحوذي ..
نحن كلنا في منتدانا الجميل كتبنا واتعارفنا واتخاوينا وبقت بينا تلفونات
ورابط اكبر من رابط الدم لاننا ماحصل اسأنا لواحد فينا اودخلنا في مهاترات لاتخدم المنتدي
ارجو من الجميع بذر روح المحبه والتسامح وترك مالايفيد في النهايه كلنا اخوان .

يوميات شندي(شمارات)

يوميات شندي(شمارات)

رد: يوميات شندي(شمارات)

رد: يوميات شندي(شمارات)

رد: يوميات شندي(شمارات)

رد: يوميات شندي(شمارات)

رد: يوميات شندي(شمارات)

رد: يوميات شندي(شمارات)

رد: يوميات شندي(شمارات)

رد: يوميات شندي(شمارات)

رد: يوميات شندي(شمارات)

رد: يوميات شندي(شمارات)

رد: يوميات شندي(شمارات)

رد: يوميات شندي(شمارات)

رد: يوميات شندي(شمارات)

رد: يوميات شندي(شمارات)