فى خيمة ود فضيل

دخلت خيمة عمنا الشاعر ود فضيل ووجدته راقد على عنقريبه الهبابى يشرب فى الجبنة ورحب بى ترحيبا حارا وبعد السلام والمطايبة اصر ان اشاركه شراب الجبنة.وبعد داك قلت ليه نحنا ناس منتدى شندى دايرين نجلس معاك ونشوف خبرك.قال لى بالحيل يابتى بعرفكم ومرات بدخل فى منتداكم وعاجبنى.
فى البداية طلبت منو يكلمنا عن الصفات البتتوفر فى الشاعر شنو؟ قال لي لااازم تكون فى موهبة بالفطرة بالاضافة للاحساس المرهف عشان مايكون الشعر مصنوع صناعة.بعد داك لازم يقوى الشاعر ملكته بالاطلاع الكتيرعشان يلقى مفردات متنوعة يعبر بيها.وكمان الاطلاع بمكن الشاعر من تجويد الاوزان والموسيقى فى شعره .سألتو ياعمنا يعنى الواحد يطلع على اى نوع من الشعر.؟ قال لى الاطلاع على الشعر منذ العصر الجاهلى والمعلقات ومن بعدهم لحدى ناس الشعر الحر والتفعيلة.وماكتب بالعامية والفصحى.والشاعر لازم يعرف حتى المربعات والمسادير.ولازم يقرأ كلام حاج الماحى وابوشريعة وحياتى وحتى غنا ناس الحقيبة.قلت ليهو خلاص ياعمنا ودفضيل الليلة ادينا قصيدة من شعرك عشان مانطول الكلام وورينا مناسبتا .قال لى يابتى حاأقول ليك قصيدة مرثية كتبتها يوم وفاة الاديب الكبير الطيب صالح ... قلت ليه خلاص قبال القصيدة ادينا كلمتين عن اديبنا الطيب صالح.قال لي دا عبقري الرواية العربية والعالمية ويعتبر من رواد التجديد . ووضع فيها مدرسة سردية جديدة قبل ماركيز.وصنفت روايته موسم الهجرة الي الشمال ضمن افضل مائة عمل في التاريخ الانساني.ويكفي ان الناقد الكبير رجاء النقاش قال انه لم يصدق عينيه وهو يطالع هذه الرواية لاول مرة.وقد حزنت عليه منابر الادب والثقافة في القاهرة وبيروت اكثر منها في الخرطوم.وقصيدتي سميتها (الطيب الولي الصالح) وهو احد القابه التي اطلقها عليه الاستاذ محمدبن عيسى صاحب مهرجان اصيلة...

بعد الناس عمومن نام... سمعنا الزين علي النيمات
شاقي الليل نبيح وصياح..هوووووي ياناس..
الليلة كلامي خاتي العمدة.. وماهو غنايا في
التومات..
الخبر الجانا اسود وشوووووم ..وعم الدنيا ظلام وحداد..
هوووووي ياناس الطيب مات..الطيب مات..
ويامحجوب مريود قال ليك شوف بسراع مرسالاً واعي
لمدبولي ومنسي المصري..الطيب مات..
في داك الحين ..والخلق اتلمت عندالزين..كبار وصغار
شافوا النور تجاه الساقية ..وجاهم صوت درويشاً صالح
اقيف يالزين الزول مامات..هوووي ياناس الزول مامات
الطيب عايش في المشروع..وتحت الدومة مع ودحامد
وروحو ترفرف في النخلات....
الطيب حاضر جوة اشعارنا .. وفي حجواتنا والغنوات
ان الله اختارو هناك في جوارو ..وعلا مقامو في الجنات
خلى وصية واضحة جلية..لمو الصف وانسو الفات
لمو الصف وانسو الفات...

حقيقة تسجيلك فى المنتدى يا سلا مكسب لنا ... وفى أنتظارك للغوص فى بحور ابداع عمنا ود فضيل وإستخراج كل الدرر الكامنة فيه.

رحم الله أديبنا الرائع الطيب صالح ونأمل أن تنجب لنا حواء السودانية المزيد من المبدعين أمثاله .. وخاتمة الأبيـات نصيحة غالية سيتردد صداها دوماً فى آذاننا ياود فضيل :

الطيب حاضر جوة اشعارنا .. وفي حجواتنا والغنوات
ان الله اختارو هناك في جوارو ..وعلا مقامو في الجنات
خلى وصية واضحة جلية..لمو الصف وانسو الفات
لمو الصف وانسو الفات...

شكراً لكي العزيزة ام احمد على اشادتك الانيقة.وسوف تتواصل انشاء الله الحلقات مع الشاعر ودفضيل.وهو في هذا الصباح يرسل تحية خاصة للشاعرة الكبيرة خديجة بت بابكر ويرى ان شعرها محتاج لمجهود اكبر للتوثيق.ويحيى ايضا الشاعر الطيب حاج عبدالقادر اخر من بقى من شعراء عصر الحقيبة متعه الله بالصحة والعافية. ويناشد اعضاء المنتدى المستقرين الان بشندي الالتقاء بعمنا الطيب حاج عبدالقادر ومحاولة التوثيق له.

والتحية لشاعرنا ود فضيل متعه الله بالصحة والعافية والرحمة والمغفرة لاستاذنا الراحل الأديب العالمي الطيب صالح ولكل مبدعينا في شتي المجالات

الاخ د.عوض محمد الخضر التحية لك ومساك الله بالخير. نحن وانتم موعودون قريباً باتكاءة جديدة مع عمنا ودفضيل.

من طرف **sala35** السبت 30 يناير 2010 - 0:47

تجدد لقانا اليوم بالشاعر ودفضيل ووجدنا الخيمة مرشوشة وهمبريبا ضارب.شربنا معاهو الشاي والجبنة وقلنالو اللقاء الماضي وجد قبول من ناس كتار وقصيدتك المرثية عجبتن وراجين منك الزيادة.لكن دايرنك الليلة اول حاجة تعرفنا اكتر بنفسك.قال لي يابتي اسمي نصرالدين أبودقن من اهلك الجعليين.
قلتلو الليلة دايرنك تكلمنا عن حكاية الارقام والرموز البتجي في الشعر خاصة الغزلي؟
قال يابتي زمان الشعراء في العصر الجاهلي كانوا بذكروا اسم المحبوبة صراحة عشان كدة جات اسامي ناس عبلة ،هند،لبنى،بثينة وسعاد وغيرهن في الشعر ودا عمل مشاكل كتيرة اقل شئ يمنع الشاعر الزواج من محبوبته.
من هنا ابتكر الشعراء قصة الارقام والرموز في الشعر الغزلي خاصة شعراء العامية والغناء في السودان،لان ثقافتنا لاتسمح بذكر اسم البنت صراحة في القصيدة.وبقوا يجيبو الاسم في شكل ارقام تعادل الحروف الابجدية (ابجدهوز) وبقى كل حرف بعادل رقم.
الشاعر عمر البنا سألوه نفس السؤال دا قال (انا واخواني الشعراء بنرمز لاسم البنت في القصيدة بطريقة تقبل النفي والاثبات) وطبعا كلامو دا واضح عشان الحكاية ماتجيبلها دق ومشاكل.
قلت ليهو كدي ادينا نماذج؟
قال لي مثلا الشاعر ابوصلاح قال في بعض اغانيه (سبعة زينة الدنيا وسعودها) 7تعادل حرف ز وقصد زينب وهي زوجته.ودالرضي قال (مية وثمانية وستة وستة حبيبي حليلو القام يوم ستة) وقصد محبوبته وكانت تلقب (مليم) واحد تاني من ناس الحقيبة قال (الناس جروحم تسعة وانا بي جروح تسعين) 9=ط و90=ص وقصد ان زملائه الشعراء عاجباهم طيبة وهو باكي في صفية ولو كان قال الكلام دا عديل كان اهلن دقوهو لانو ديل كانن بنات جميلات معروفات في امدرمان في فترة الثلاثينات .
شاعر قديم في الشقالوة قال لمحبوبته:
اسمك في النواحي مطلعلنو كشوف
بين ستة وتمانية سبعة بالمكشوف
بالواحد ختم وبالخمسة ضرب وشوف
وبالخمسين لصق ريدك مع الشرشوف
بحساب الحروف الابجدية ببقى الاسم زهراء .يابتي تفتكري في الوكت داك لو قالو عديل كان ريحوا؟
فنان ساردية الشعبي المشهور (ودالنزيهة) الله يرحمو كان بغني (ياواحد واربعين وخمسين تمامة المية.. انا مابجيب اسمك والناس تشينو علي) واسمها كدا مدسوس وواضح...
قلت ليو ياودفضيل كلام الناس خليهو كدي ادينا من شعرك انت بس يكون فيهو ارقام.
قال لي بديكم شوية من شعري بس مابشرحو ليكم......

ستين في البنات راسية وتقيل ميزانك
فوق للنجمتين والقمرة عالي مكانك
خصاك بالجمال والمولى عظم شأنك
كساك هيبة ودلال وليك عفافك صانك
مشتول القرير وفي شندي بان بستانك
ستين في البنات راقية ورقيق احساسك
ست عزاً قديم تاج الملوك فوق راسك
علي اسوار الجمال واقفين غفر حراسك
سينك في القلوب سهام تصيب جلاسك

[b]

الله يديك الف عافيه الرائعه سلا على الاسلوب الراقى

والمتفرد ونحنا فى انتظار المزيد والمزيد

ستين في البنات راسية وتقيل ميزانك
فوق للنجمتين والقمرة عالي مكانك
خصاك بالجمال والمولى عظم شأنك
كساك هيبة ودلال وليك عفافك صانك
مشتول القرير وفي شندي بان بستانك
ستين في البنات راقية ورقيق احساسك
ست عزاً قديم تاج الملوك فوق راسك
علي اسوار الجمال واقفين غفر حراسك
سينك فى القلوب سهـام تصيب جلاسك

لم يرد شاعرنا ود فضيل أن يفصح لنا عن أسم المحبوبة وبالرغم من أن الزمن تغير لكن يبقى لغموض شخص المحبوبة بالنسبة للمستمع سحر خاص يسمح بإسقاط الصفات الرائعه -التى وصف بها شاعرنا ود فضيل فتاته-على كل محبوبة ....

سلام عليكم .. وسلام تعظيم لعمنا الحاج ود فضيل ..
أمتعتنا وبثقافتك العالية أطربتنا ..
وخيمتك دي أظهرت لينا الجوانب الخفية من عبقرية زمانها أختنا سلا الله يديها ألف عافية ..
والمحللة الماهرة جدا ً جدا ً درجة إمتياز أختنا أم أحمد ربنا يوفقها كمان وكمان إن شاء الله يا رب ..

أها يا عمنا شاهيك المظبوط دا كمل الناقصة وأستأذنك بدور أمشي لي راكوبة أختنا أم أحمد أصلها يا دوبها رجعت ليها ..وبجي صاد ليك إن شاء الله .

الاعزاء عبدالله وام احمد وابو معتصم عساكم طيبييين شكرا لتشريفكم لينا فى الخيمة وطلتكم الحلوة وربنا مايحرمنا من جيتكم وماتنقطعو .

sala35 كتب:الاعزاء عبدالله وام احمد وابو معتصم عساكم طيبييين شكرا لتشريفكم لينا فى الخيمة وطلتكم الحلوة وربنا مايحرمنا من جيتكم وماتنقطعو .

إن شاء الله مواصلين في خيمة عمنا الحاج ود فضيل ..
ومن عبقريتكم نسثفيد .

تجدد لقانا اليوم بعمنا الشاعر ود فضيل بداخل خيمته العامرة ووجدت معه عدد من اصدقائه ماسكين سيرة شعر وغناء الحقيبة قمت قلت ليهو انا كلامكم من البداية ماحضرتو بس دايراك ياعمنا تكلمنا عن بداية غناء الحقيبة كان كيف ومتين ؟ قال لى:لم يختلف الناس ان البداية كانت بقدوم محمد ودالفكى لامدرمان من كبوشية فى بداية القرن الماضى .فقد جاء محملاً بشعر ناس ود بعشوم وغيره من شعراء المنطقة وابتكر الحان ورواية جديدة تختلف عن طريقة الطنابرة...قلت ليهو ياعمنا الطنابرة ديل ذااتم طريقتم كانت كيف؟ قال :كان احدهم يقف منشدا مربعات الدوبيت وتصاحبه مجموعة من الشيالين بالترديد والصفقة واصدار اصوات معينة تعرف (بالحمحمة) وسار سرور على نهج ود الفكى فى الالحان لكن الطنابرة فى احد حفلات زواج التاجر المعروف بشير الشيخ في امدرمان رفضو يشيلو مع سرور وعرف اليوم داك(باضراب الطنابرة)ودا كان سنة1919م.الشاعر ابراهيم العبادى كان قاعد فى نفس الحفلة دى،فى ساعتو ديك كتب أول أغنية في الحقيبة(ببكى وبنوح وبصيح ...للشوفتن بتريح) ومن اليوم داك الطنابرة ماقامت ليهم قايمة واصبح الغناء يؤدى بالطريقة الجديدة .
قلت ليهو ياعمنا ورينا اشهر الشعراء والفنانين فى الحقيبة منو؟ قال : الشعراء الكبار كانو العبادى ،ابوصلاح،يوسف حسب الله(سلطان العاشقين)،عمر البنا،خليل فرح،حدباى،محمد على عثمان بدرى،الجاغريو،ودالرضي ،بطران،محمد على عبدالله(الأمى)،المساح،وجو بعدهم ناس على محمودالتنقارى ،سيد عبدالعزيز،عبيدعبدالرحمن،العمرى،العمرابى،عثمان أبجقود،عتيق،عبدالرحمن الريح،مسعد حنفى والطيب حاج عبدالقادر.
ومن فنانين الحقيبة الكبار :سرور،كرومة،الامين برهان،الفاضل احمد،التوم وابراهيم عبدالجليل،عبدالله الماحى،علي أبوالجود ،وزنقار وجاء بعدهم ناس عوض الجاك ،اولادشمبات ،اولادالموردة،ميرغنى المامون واحمد حسن جمعة.
وسبب خلود غناء الحقيبة يرجع الي جودة الشعر والالحان وتميز اصوات الفنانين.
الحقيبة فقدت كتير من شعرائها في عمر مبكر وتوفي خلال سنتين فقط اكبر ثلاثة مغنيين وهم سرور ،كرومة والامين برهان .
العبادي حزن شديد يوم وفاة سرور في 1946 ورثاهو بقصيدة طويلة ،نهدي منها بعض الابيات لاخونا عبدالله حسن بشير لانه معجب بشعر العبادي:
لو لاقيت خليل في الجنة أقري سلامي
ولي بطران تبث شوقي وصنوف اَلامى
قول للعمري بعدك كُسرت أقلامي
ومثل للأمين صاحبك أواخر أفلامي
أبجقود عثمان بحر البيان النابع
كان في شعرو أول وفي منيتو الرابع
وأسفي علي الرفاق الراح جمعهم متتابع
وأطولهم عمر ماتم عقدو الرابع

وفى جلسة تانية نواصل مع ناس الحقيبة،،،،،،،

أصبحنا نتردد عند دخولنا المنتدى الشعرى .. هل نبدأ بالدوبيت أم ندلف الى خيمة عمنا ود فضيل أولاً ؟
ففيهما الأبداع والمتعة مع الشعر الرصين والصور الشعرية الرائعة ...
واصل عمنا ود فضيل وكلنا آذن صاغيه.

شكرا لك الرائعة ام احمد على زياراتك للخيمة وتشجيعك المستمر..

سلام .. أزيكم يا ناس الخيمة
أزيك يا عمنا ود فضيل أزيكن يا سلا وأم أحمد ..
شنو يعني الخيانات دي أنا وعبد الله نمشي نفتش في دكتور عوض بي ناحية والرفاعي من ناحية وإنتن محتكرات الثقافة والزخم الرهيب من الإرشيف المخزن عند عمنا ود فضيل ..
أها يا أخوات بشارتنا شنو لو قلنا ليكن المفاجأة دي ..
خلاص أنا موافق تعيدو لينا الكلام القالو عمنا ود فضيل من أول أصلي شايفكن أرهقتن عمنا ود فضيل بالحيل بي شوقكن لي سردة وتوثيقه .
وافقتن .. الحمد لله خلاص حا أوريكن ..
المفاجأة هي إنو إنحنا بنفتش في دكتور عوض بهناك ..
قام ظهر بي جاي وعامل ليك نيو لوك كمان بي علم السودان .

ألف حمدا ً لله علي السلامة وبركة الشفناك طيب يا دكتور عوض .

مرحبتين حبابك ابومعتصم وتستاهل نعيد ليك كلام عمك ود فضيل واصلو انا وام احمد مافوتنا حاجة ولسه قال الغريق لاقدام...ودايرنو يشبعنا من معلوماتو الغزيرة.
اما عن رجعة د.عوض والله بسطتنا وبشارتك كبيرة وتانى اووعك تخليهو يغطس كده.

يغطس ، يغطس قالت ..
تاني كان عملها وغطس أفك ليك وراهو غوااااصة عدييييل كدا ..
فى خيمة ود فضيل Icon_biggrin

وينك ياعم ود فضيل ؟؟! ... نحن فى إنتظارك ومتلهفين لسماع المزيد.

الأخت الفاضلة سلا
التحية طيبة سلاااام

بدء نحي الشاعر الجميل ودفضيل زاده الله من فضله قضل

أختي سلا انت تروين في أرض رملية فزيدي من ريك من حديث ود فضيل
نحن عطاشا ومن خيمة ودقضيل نورد نروى

متابعين لهذا الحديث

ويا ليت أن تعطينا نبذة اكثر واكثر عن الشاعر
الاسم وقد تفضلتي به
وأين وكيف ومتى وكل شؤال يرد بخاطرك عنه
نحن ناس هاجرنا من الديار بدري ومازلنا مشحطّين في بلاد الله الواسعة وجياتنا بقت تحسب في الأصابع كلما رفع الله لنا قدم
فلك الشكر ونأمل في المزيد

شكرا لك الاخ خالد على زيارتك لينا في الخيمة والاشادة وانشاء الله نواصل جلسات ودقضيل وانت موعود بحلقة تعريفية عن الشاعر وعدد من الحلقات في غناءالحقيبة الحقيبة وغيرها .أرد الله غربتك سالما غانما لمدينتنا الحلوة شندى ولى حلتا الراقية شندى فوق.

تجدد لقانا اليوم مع عمنا ود فضيل فى خيمته العامرة ومازال الكلام مستمر مع ناس الحقيبة .قلت ليهو ياعمنا المرة الفاتت لخصت لينا الفترة ديك ودايرنك تفصل لينا الكلام دا خلال عدة جلسات قال لى ماعندى مانع .المرة الفاتت قلنا أن أحد أسباب خلود الأغنية هى جودة الشعر ودى ماجات من فراغ بل كانت هنالك صالونات ادبية يشترك فيها العبادى،أبوصلاح ،خليل فرح،عمر البنا،حدباى،توفيق صالح جبريل وآخرون يتم فى هذه الجلسات تداول الشعر وايجازة الشعراء الجدد.يعنى لو جا واحد جديد وقال شاعر بعملو ليهو امتحان ،اما نجح فى الامتحان ولا يطفشوهو طوالى ومافى فنان بيشيل منو اغنية.قلت ليهو ياعمنا الامتحان دا كان كيف؟قال :بيدوهو شعر غالباً مايكون فى شكل مربعات صعبة وفيها لزوم مالايلزم ويعنى أن القافية تلتزم أكتر من حرف واحد ويقولو ليهو ياأخوى غطيها لينا (يعنى رد عليها ) مرة أبراها ومرة أفتلا ودا امتحان صعب شاعر مجهجه مابقدر عليهو لو فشل عمك العبادى طواالى بقول ليهو ياولدى انت ماك شاعر شوف ليك شغلة تانية .عشان كده الشعر الغنائى فى تلك الفترة حافظ على قوته. الشعراء تاثرو فى تلك الفترة بالمديح النبوى خاصةً بشعر المداح أمثال أحمد ود سعد ،واحمد أبوشريعة وغيرهم من حيث الاوزان ولزوم مالايلزم في القوافي .
الشعراء كانوا سريعي البديهة ومابتكلفو للقصيدة اي تكلف.مرة سيد وعبيد ماشين في امدرمان،احدى البنات فتحت الباب شافتن ،قامت خجلت،ورجعت ،سيد طوالي قال (حاول يخفي نفسو وهل يخفى القمر في سماهو)عبيد قال ليهو( ابداً وطبعاً لا شفناهو شفناهو)وبقو ماشين ويقولو لما كملو القصيدة .مرة الحلاق قال لي عبيد ألحق الشيب جاك،عبيد طوالي طلع القلم والورقة كتب (حليل زمن الصبا الماضي)وكمل القصيدة كلها قبال يحلق.وغيرها الكتير من القصايد.وكتير كانو يكتبو القصيدة للعريس وتتغنى في نفس الحفلة عشان كدا تلقي ذي (قام محمد بشر)عند خليل فرح ، وجا اسم النذير وكشة وغيرهم من العرسان.
في ناس قالو شعر الحقيبة فيهو غزل حسي ودا ماصحيح،لانو المحبوبة ماكانت متاح لقاها اصلاً ومعظم شعرهم في الغزل والخمريات ماكان في جلسات حقيقية، الشاعر العمري يقوليها (خمرة هواك يامي دي الصافية وجلية ولاعبة بالالباب للبابلية)وهو طبعاً ماجلس معاها ،ناس عتيق الواحد فيهم يسرح بيك في القصيدة وفجأة ينبهك بانها جلسة برئية،خليل يقول ليك(النفوس ماأتعدت حدودها)في أحد القصائد،وعند سيد(بعفتك صنتي السفور) ،،عتيق (كنا طاهرين عفاف)في أحد قصائده .وفي ختام جلستنا نديكم قصيدة للشاعر محمد بشير عتيق كتبها سنة 1942 وغناها كروان السودان كرومة وشوفوهو كيف جوه الاغنية بعد ماخيالك يوديك بعيد يقول ليك(اما أرواحنا الخفاف رافلة في اثواب عفاف)

أذكري أيام صفانا وأذكري عهداللقاء والليالي الفي حبور
أذكري أيام صفانا والليالي الفيها متبادلين وفانا
أصطفينا ظروفنا والحظ اصطفانا
جينا بكل اقتراح من حديث يروي الجراح في مغازلة وانشراح
والقمر بي ضياهو الق والنسيم يهدينا أرواح الزهور
الرياض مبتهجة ضاحك اقحوانا
والزهور فرحانة تستقبل أوانا
رائعة يانعة وزاهية في ثوب أرجوانا
النهر اقترب والطيور تسجع طرب عاملة موسيقى قرب
ونحن صار مجلسنا عامر في مرح في نشوة في غبطة وسرور
كنا داخل روضة مافيش حد سوانا
غير ان القمري يهتف بي هوانا
من أغاريد فنه يسمعنا اسطوانة
(أما أرواحنا الخفاف رافلة في أثواب عفاف)
زي عرائس يوم زفاف
والنجوم بعيون تسارق في اشتياق
تنظرنا من خلف الستور
ياأمير الحسن ياسامي المكانة
في عواطفك حبي لو فاقد مكانة
أهدي لي تفاحة بس او برتكانة
فهي غير شك مرضية
منها أقتبس الضياء
بل أذوق طعم الحياة
أنت ملهمني الاغاني
انت مصدر فني احساسي وشعور

وفي جلسة قادمة نواصل انشاء الله،،،،

سلام يا جماعة وسلام مربع لي عمنا ود فضيل
دا شنو الخيانات دي يا ناس الخيمه كل يوم تلاقوني في الراكوبه وما تكلموني بالخيمة دي
المهم تاني انا بس معاكم معاكم تمشو الراكوبة تلقوني معاكم
تجو الخيمة انا معاكم
والله يا سلا ابدااااااع رسمى
انا من الثانوى مولعة بي شعر وشعراء الحقيبة
وكنت دايما بسمع برنامج حقيبة الفن في الاذاعة
وكنت بفتش فى ديوان عتيق ايام صفانا وللاسف ما لقيتو
عليك الله يا سلا مزيد من شعر الحقيبة ومزيد من الابداع
يديك العافية

شكرا لك ام تسابيح على طلتك الحلوة لينا فى الخيمة وعمك ود فضيل قال ليك ماعندك مشكلة اى حاجة دايراها فى الحقيبة تلقيها فى الخيمة بس انتى ماتنقطعى مننا وقال حايفرد ليك حلقة كاملة عن عتيق وبهديك ليها.

سلام يا اهل الخيمة
وين يا جماعة الخيمة ماااالا اليومين ديل فاضية
هسه انا جيت من الصباح قاعدة في عنقريبي دا ومافي زول جا
وييين يا سلا ؟؟؟؟ ووين عمنا ود فضيل ؟؟؟؟ نتمني انو يكون دا الهدوء الذي يسبق العاصفة
ودمتم

كلمات رائعه يا سلا يسلم بنانك

زي ماقلت ليك بحب الأغنيه دي شدييييد
فى خيمة ود فضيل 24

وواصلي في ابداعاتك00نحنا في الانتظار00

العزيزة زيزو والله بزيارتك خيمتنا نورت وشرفتى كتير .وباذن الله حانواصل مع عمنا ودفضيل ونعرف الكتير من شعر وغناء الحقيبة.

تتواصل اليوم جلساتنا فى داخل الخيمة ، ومازال الحديث مستمر عن جودة الشعر الغنائى خلال فترة الحقيبة.
المرة الفاتت عمنا ودفضيل كلمنا عن الجلسات والصالونات الادبية وصعوبة ناس العبادى وابوصلاح فى اجازة الشعر والشعراء وعرفنا انهم مابعترفو بغير شاعر متمكن .قلت ليهو شنو تانى العوامل الميزت شعرهم عن الفترات اللاحقة؟
قال :يابتى الجماعه ديل ثقافتهم واطلاعهم كان عالى رغم انه وسائل الاتصال ماكانت متاحة،معظمهم درس فى الخلاوى وحفظ القرآن.فمثلاً نجد أبوصلاح فى اغنيته ( ياسمير بنظرتك أوفى الميعاد) يقول (الشجر أقلام جميع والنيل مداد لو كتب أشواقى ليك ماعددا) وقد اقتبس المعنى من الاية القرآنية .
ود الرضى تلقى اشارات دينية كتيرة فى اغانيهو (أحرمونى ولا تحرمونى سنة الاسلام السلام) ،(من تعاطى المكروه عمداً غير شك يتعاطى الحرام).عشان كده حتى لما داير يتغزل فى احدى الحسان فى اغنيته (ليالى الخير جادن )خجل وقال شافا فى الحلم ((شفت فى الاحلام ظبى يتهادن بى رخيم نغمات خلى تنادن)) دا كلو عشان خاف الناس يقولو ليهو دا شنو ياعمك انت راجل حافظ القراءن وتصرفو دا يعرف (بشعر الطناس).
وعرفو حتى منازل النجوم (انت فوق للقوس والسماك الاعزل علوت نجوم)،(لو نزل السماك الاعزل أنا عن حبى مابتنازل).
وعرفو كل ألوان البلاغة من الكناية والجناس والطباق والتشبيهات البليغة وغيرها.فمثلاً ناس عنترة وجميل بثينة زمان شبهو المحبوبة بالقمر وعيونا بعيون المها وذكرهم لمعان السيوف بأسنانها لكن أبوصلاح فاجأ الجميع وذهب لأبعد من ذلك فى التشبية (فريع البانه المن نسمة يتمايل حاكا المنقسمة) وشوف كيف شبه البانة بالمحبوبة وجعلها تحاكيها،واحد تانى قال (ماخدات فى الجمال جائزة نوبل) الكلام دا بعد فترة بسيطة من ظهور الجائزة رغم انو لاكان فى اذاعة ولا تلفزيون.
سيد عبدالعزيز فى اغنيته( صباح النور عليك يازهور ) قال(تفوق نيشان ممتاز فى صدور العظماء المثلو اعظم دور)ونيشان ممتاز دا كان ارفع وسام تركى ،وفى نفس القصيدة قال (فريد حسنك ودلك موفور وأنا دمعى بجر مجرى البسفور) والبسفور دا أسرع أنهار العالم واكثرها انحداراً،لكن سيد جاب الكلام دا من وين؟

قلت ليهو ياعمنا ود فضيل وصلنا طلب من الاخت أم تسابيح بانو نتكلم شوية عن الشاعر عتيق قال لى:كرومة كان فى البداية بغنى شعر عمر البنا وابوصلاح ولما جاء عتيق شكل ثنائى خطير مع كرومة والحقيبة وصلت الى اعلى قمة فى الابداع لانو شعر عتيق كان من النوع الخفيف والسهل الممتنع ،متعدد القوافى ويحوى موسيقى داخلية عالية .وفى كل قصيدة كان يتغزل فى الطبيعة والانسان لذلك عرف بشاعر الجمال.عمل بالسكة حديد وتجول فى كثير من مدن السودان.

وفى ختام جلستنا نهديكم أغنيته (هل تدرى يانعسان):

هل تدرى يانعسان أنا طرفى ساهر
جسمى اضمحل بغرامك وانت زاهر
أنا حالى ظاهر ..عاشق نبيل ياجميل..ليك حبى طاهر
وشاعر مجيد لغناك فنان وماهر
بسحر دلالك ... وكرم خصالك
وعشان جمالك.. اهوى القمر والنيل.. أهوى الازاهر
ليل ونهار أنا لحيك بهاجر
آخذنى نورك ياساحر المحاجر
لا اخشى لوم فى هواك.. لا أخشى زاجر
مهما ألاقى .. كم طول فراقى.. وفرط اشتياقى
حافظ عهودك.. وحياة خدودك ياللى هاجر
حسنك بديع ياوديع فى عصرو نادر
حكم صفاك مولاى ذو حكمة قادر
مكتوب هواك لى ضناى ياحبيبى صادر
ناكر شفاى وأراك على طبى قادر
وانا برضو آمل.. تعطف تجامل.. بمس الانامل
تشفى الجروح والروح.. ولى لقاى تبادر

وفى جلسة قادمة نواصل إنشاء الله،،،،،،،،

سلام علي كل الموجودين داخل الخيمة وسلام خاص لي عمنا ود فضيل
عاد بعد دا الكلام دخل الحوش عديييييل
يا سلام عليك يا سلا وعلي اسلوبك الاكثر من رائع
والله انا بقرا في الموضوع واحساسي اني عايشة بين ناس الحقيبة ديل عديل كدة
لانى بحب شعر الحقيبة ومعانيهو وتقافتو العالية
وبالجد مفروض شعر الحقيبة يدخل في مناهج الدراسة كمادة دراسية
حتي يتم التوثيق الكامل لشعر الحقيبة
وانا بحمد الله اني من جيل السبعينات في القرن الماضي لاني بعتقد انو هذا الجيل
هو آخر جيل يتذوق شعر الحقيبة
دمتي اختي سلا وسلمت يداك

شكراً لك الاخت أم تسابيح على زيارتك لينا ،وعلى اشادتك ،وكلامك صحيح مفروض هذا الشعر يدرس ،لانو مكون اساسي لوجدان الناس ويحوي كتير من القيم النبيلة،،،،،

تتواصل جلساتنا اليوم داخل خيمة عمنا ودفضيل ..
وفى الحلقات الماضية كلمنا عن تميز الشعر خلال فترة الحقيبة ودايرنو المره دى يكلمنا عن ميزة اللحن والأداء..
قال:مثلت أغنية الحقيبة طفرة لحنيه بالنسبة للفترة التى سبقتها (الطنابرة) ومعظم الآلحان كانت بواسطة موسيقار السودان الآول عبدالكريم عبدالله الشهير ب(كرومة) والجزء الاخر كان بواسطة الحاج محمد احمد سرور واخرين ، وصاحبهما على العزف ، عازف الكمان القدير (السر عبدالله) وإنضم لاحقاً (وهبه)والد لاعب المريخ الشهير(بشرى وهبه) (وهبه بى موسيقتو إتحكرا) وطبعاً فى مجموعة من الكورس (الشيالين) واميزهم ناس(على أبوالجود،تور كبير،حمامتى).
فى بعض الأحيان كانت هنالك مجاراه فى الألحان ،يعنى عدد من الاغنيات تؤدى على لحن واحد ، وماكان فى فنان بزعل يقول للتانى شلت منى اللحن دا،ومرات كان الفنان بهدى الأغنية لزميلو فمثلاًسرور لحن أغنية الشاعر مصطفى بطران الحزينة(دمعة الشوق كبى)التى كتبها على فراش المرض واداها لكرومة وقال ليهو شيل الاغنية دى منح بيها ،كأن سرور شعر بأنو بطران نعى نفسه بهذه الاغنية وقد كان.

الناس ديل أصواتم كانت قوية خالص تسمع الحفلة من أماكن بعيدة ولهم ملكة تطريب عالية وحضور مسرحى في الحفلة، ومن حضر تلك الفترة قالوا من لم يشاهد سرور عديل يغنى مابعرف غناهو.
وفى ختام حلقتنا نهدى بعض اغنيات الحقيبة للحضور فى داخل الخيمة.

ونواصل إنشاء الله،،،،،

روووووووعة وابداع ما عادي
تسلمى سلا علي اختيارك للاغاني
وان شاء الله الشباب في الساحة الفنية يحاولوا يصلوا بفنهم لمستوي اغاني الحقيبة
شكرا

تعودنا فى حضرة عمنا ود فضيل وفى خيمته العامرة على كل صنوف الإبداع والمعلومات الجديده .. مشكورة ياسلا على هذا البوست الرائع وكالعادة نتلهف للمـزيد .

شكراً الاخوات أم أحمد ،،أم تسابيح

على زيارتكم لينا في الخيمة وماتنقطعوا مننا،،

من طرف ألق الإثنين 15 مارس 2010 - 15:46

ســــــــــــــــــــــــــــــــــــلا
فعلا انت اضافه حقيقيه للمنتدي
لقد تغيبت عن المنتدي
وعدت لاجده مخضرا بك
الف مرحب مع انها متاخره
ومرحب بعمنا ود فضيل
وبيراعك الثر
كل الــــــــــــــــــــــــود

من طرف ألق الإثنين 15 مارس 2010 - 15:48

في الانتظار

شكراً الرائعة ألق

وحمد الله سلامة العودة

المنتدى زاد نورو بيك

تتواصل جلستنا بعد غيبة مع عمنا ود فضيل ومازال الحديث متواصل عن خلود اغنية الحقيبة.
والمرة الفاتت وقفنا عند تميز الفنانين والالحان .وقلت ليهو ياعمنا ود فضيل المرة دى دايرين نعرف أغانى الحقيبة كانت بتتسجل وين؟ خاصة انو الوكت داك الاذاعة مابدت وماكان فى شركات تسجيل فى السودان .
قال:الاغانى دى كانت بتتسجل فى شكل اسطوانات فى مصر ومعظما انتاج شركة اوديون ،وشركة ميشيان،وبيدافون .وكل الفنانين كانو بمشو يسجلو فى القاهرة .والاسطوانات بعد داك بتجى السودان بواسطة التاجر المشهور محمد داؤود حسين وبشتروها الناس المقتدرين ،والمابقدر يشترى بسمع فى القهاوى المشهورة فى ام درمان،ذى قهوة الزئبق وقهوة ودالفكى .يعنى الزول المرضان بالحقيبة يقعد فى القهوة ويطلب شاى وجبنة عشان يخلوهو يسمع الاسطوانة.
قال لى يابتى دا كلو يرجع الفضل فيهو لى زول الناس ماعارفينو اسمو (ديمترى البازار ) ،دا السودان كلو ماقدر على جزاهو.
كان بقوم بدور وزارة الثقافة فى الوكت داك،وهو الكان بسوق الفنانين للقاهرة ،وبمشي للفنانين عند اهلم وبقنع الاسر خاصة انو بعضهم صغير فى السن ذى الفنان ابراهيم عبدالجليل وبعضهم نساء ذى عائشة الفلاتية والجنة حمد وغيرهن .وظل هذا الرجل الاغريقى الذى استوطن ام درمان يقوم بهذا الدور حتى بداية الاذاعة فى عام1941 ولولاهو لضاع الكثير من تراث فترة الحقيبة الثر.
ونواصل فى جلسة قادمة بإذن الله،،،

ياسلاااااام عليك ياسلا بوست جميل جدا ورحلة توثيقية لفترة هامة من حياتنا وكلمات جميلة من شعراء الحقيبة اول ما دخلت البوست وبديت اقرا اتخيلت نفسي قاعد فى راس ود فضيل وهو بحكى عن الشعر والشعراء بالجد كده الواحد حاسي بى شعور جميل واحساس راقي وزعلان من نفسي انى اول مرة اشوف البوست ده Sad

سلا ربنا يديك العافية ..ومتابع معاك من الليلة فى خيمة ود فضيل

شكرا الاخ نزار على زيارتك لينا ونتشرف بمتابعتك لجلسات الخيمة
وانت وكل اصدقاء الخيمة موعودين بجديد الحلقات مع عمنا ود فضيل....

تتواصل جلستنا اليوم مع عمنا ودفضيل ،المرة الفاتت وقفنا عند ذكر ديمترى البازار ،وقلت ليهو دايرنك تواصل اليوم رغم اننا عارفنك مشغول فى زراعتك.
قال:لازم نعيد ياجماعة الكلام تانى لولا هذا الخواجة الإغريقى ديمترى كان تراث الحقيبة معظمو ضاع .
وتحدثنا فى الحلقات السابقة عن أسرار خلود أغنية الحقيبة ،وفى عامل مهم لازم نقولو ،وهو انو الحقيبة دى اجتمعو فيها كل اهل السودان ،بدوها ناس كبوشية ،العبادى جا من الدويم،خليل فرح جا من اقصى الشمال لايجيداللغة العربية وسكن مع أسرة إبن عمه الشاعر محمدعلى عثمان بدرى صاحب اغنية (مرضان باكى فاقد)،بعد شوية أجاد الشعر وهو ذاتو انشبك معاهم فى الغناء، اولاد البنا جو من رفاعة ،سرور جا من ودالمجدوب فى الجزيرة ، عطا كوكو جا من جبال النوبة وغنو فيها ناس الشرق والغرب ،وبقت اغنية ام درمان وبتعبر عن وجدان كل السودانيين وماعداها ،يعبر عن عن القبلية والجهوية .

تسلمي لينا سلا00على المعلومات00والروائع00عن الزمن الجمييييل00

والتحف السودانيه البتقدميها لينا00
وأسمحي لي أضيف كلمات00فلق الصباح







كلمات اغنية فلق الصباح فَلَق الصَباحْ قُول لىِ أهو نورَك لاحْ خِلَّي يا خفيفْ الروح هُوَ هذا نَداكْ أم ندى الأزهَارْ من جِنَان رضْوانْ أصلَكْ لذّا كلِ ربيعْ فَصْلكْ إتْنَفَس فُوحْ تِتْنِنَفَس نَاسْ ورياضْ وبحارْ مَا ألذَّ نَسيمْ وَصْلَكْ ما رأيتْ يا جميلْ مِثَلكْ يا بَليِلْ السُ وحْ هُوَ هذّا هَوَاكْ أم هوى الأسْحَارْ إنتَ روضَهْ وليَك زَهَرهْ وَلّهْ كوكبْ وليكْ بُهْرهْ ضَمخَوكْ للجبير * زعفَرانْ وعبيرْ إنْتَ نَار في بُهارْ صَبَغْ الخدَين حُمْرَه بعد ساعة بَشُوفْ صُفْرَهْ الإصْفِرارْ دَهْ كتير أخجلوَك يا أميْر وَلَّه نُمتَ نِهارْ صِبِحْ البُستاَن شايِلْشَجَرْ الرُمَّان مايلْ السُلاَفْ في الدَنَانْ والكنارْ في حَنَانْ والهَزَار ي هِزَارْ إنتَ كالطاووسْ خائِل كبرياءَك وفيك خايلْ (2) انزل إنْتَ كمانْ غَنَّ قول يا زمانْ ويَنْ حبيبي آذار ما عِرفْنَا عِدوكْ ذَاهِل وَلَّهْ لِسَّهْ غُلاْم جَاهِلْ مُتهَلِكْ صَيف شِتَا عِندكْ كيَفْ في اللَّعِب بالنارْ في لِهيَبكْ أشوفْ ساحِلْ كالفَراشَهْ أجيكْ راحِلْ أنا خايِفْ كيفْ يالَطِيفْ الطيَفْ أهَوى وأبْقى في نارْ

من طرف **sala35** الأحد 18 أبريل 2010 - 6:37

بزيارتك الخيمة نورت

اهلك الرطانة اهدونا فى عصر الحقيبة الشاعر خليل افندى فرح
وابن عمه الشاعر محمدعلى عثمان بدرى
والفنان الكبير (ولولي)
وفنان مدنى الرائع محمد سيداحمد صاحب اغنية(ربى ماتحرم بيت من الاطفال )
وأدونا الامبراطور محمدعثمان وردى فنان افريقيا الاول ،،،،،،،،

ولو ادونا زيزو فى منتدى شندى لكفى،،،،،،

تتواصل جلساتنا اليوم مع عمنا ود فضيل.......

قلت ليهو ياعمنا شايفاك كتير ماتذكر الشاعر محمد على عثمان بدرى وانت ذى المنحاز ليهو .
قال لى: سبب اعجابى بيهو ،انو يعتبرمن الشعراء المجيدين فى عصر الحقيبة الاول .له شعر كتير فى شكل مربعات وكان متميزا فى المجاراة فى داخل الصالونات الادبية مع ناس توفيق صالح جبريل والعبادى وود البنا وغيرهم ويعتبر استاذ للشاعر خليل افندى فرح وله معه صلة قرابة .جائز يكون الناس ماسمعو بيهو ذى الشعراء الاخرين.احتمال دا يرجع لانه كان مقل فى الشعر الغنائى واشهر اغنياته (مرضان باكى فاقد فيك علاج طبيبى) التى ذكرناها فى الحلقة السابقة،وهذه الاغنية تعتبر ابلغ دليل على خلود اغنية الحقيبة لانها عاشت مايقارب المائة سنة وتغنى كل يوم كأنها اغنية جديدة .
فقلت ليهو ياعمنا ود فضيل مناسبتا كانت شنو؟
قال:طبعا الشعراء ديل كانو بمتازو بسرعة البديهة ومابتكلفو للقصيدة ،ويحكى ان للشاعر بيت فى ام درمان تسكن به اسرة من الجزيرة عن طريق الايجار وقد اعجب الشاعر باحدى بناتهم وداوم على زيارتهم من وكت لاخر بحجة مراقبة زراعته بالمنزل،وتفاجأ فى احد الايام انهم قد سافرو فجأةوتركو له المفتاح عند صاحب دكان مجاور للمنزل ،فما كان منه الا ان طلب ورقة وقلم من التاجر وكتب فى حينه هذه الاغنية.

مرضان باكي فاقد......فيكى علاج طبيبي
قالوا ترك سكونك .....يادار وين حبيبى
******
يادار من بقاياك...فوحي وجيبي طيبي
أو عاتق شميم ......النرجس من رطيبي
ماردت سؤالي.......وأجابت دار حبيبي
سدت حلقي عبره.....نفسي متين تطيبي
******
أنا لي مدة طالت .......ما شاهدت قمري
ما شاهدت غصنى .....اليانع فيهو ثمري
أنا ماشفت محبوبى.......البفداهو عمري
اسكر من عيونه ....هي كأسات فيها خمري
******

حبي الغير خافي.....ياالانت بتخبرى
اسألي منو قلبك......ومن نيرانو تبرى
مروا على ناسك....وليك شالوه خبري
هل عرفوني حائر.....وهل ادوك خبرى
******
كيف طغى لي حبك....دائي متين تزولي
لولاك ما نزلت .....عن مقدار نزولي
ليك بنثر جواهري...... وبلغيها زولي
قالت كترت عليه......صديقي الما عزولى
******
فاكهه جميلة يانعه.....شتاها طاف بدري
دره يتيمة انسه.....ظبيه حواها خدري
حوره فى نعيمه......طواها جبينها بدرى
انا فى ناره ساهر....باكى أريتها تدرى
******
لو كلمتي طيفك .......قلت يزور ضريحي
أو قلتيلو داوى.......علل عاشقي وجريحي
لا باس من عذابي.....وبكاء جفني القريحى
ما دام انت نائمه....... وهادئه وتستريحي
******
أنا غافل غرامك.......دون اعلم شحني
دمعي إذا طريتك....بين الناس فضحنى
أنا شاعر فؤادك....في الحب امتحنى
برضك جافيه نافره ....لي متين تحنى

التحية لك اختنا سلا على هذا البوست الثر الذى يحوى الغناء الاصيل والشعر الرصين من الحقيبة.

تتواصل اليوم جلستنا مع عمنا ودفضيل...
قلت ليهو ياعمنا عددت لينا كتير من أسباب خلود اغنية الحقيبة
ودايرنك الليلة تقرب لينا صورة حياتم الاجتماعية اليومية كانت كيف فى الزمن داك ؟
قال: يابتى الناس ديل كانو اسرة واحدة شعراء وفنانين طواالى مع بعض فى الافراح والاتراح ومجاملين ورغم إنهم انقسمو مجموعتين واحدة فى رأسها العبادى ومعاهو ناس سيد وعبيد وبطران وآخرين واقفين مع سرور ،ومجموعة تانية فيها ناس ابو صلاح وعمر البنا وعتيق وآخرين وديل بكتبو لكرومة ،الا انها كانت منافسة شريفة ماأثرت فى علاقتم ببعض .كانو بتلاقو فى قهاوى مشهورة فى امدرمان فى الوكت داك ،وكتير كانو بجتمعو فى دكان عمك التنقارى وبتزاورو فى البيوت .وبجتمعو فى مناسبات الافراح ،وكانت الحفلات تستمر أيام طويلة ،ولما العريس يكون عزيز عليهم كان كل واحد فيهم بجهز قصيدة مخصوصه للمناسبة والعريس.يعنى اهم مايميز تلك الفترة هو شعر الاخوانيات ، وهو الشعر الذى يكتب فى المجاملات الاجتماعية .
سافر الشاعر سيد عبدالعزيز للجزيرة فى اول الاسبوع ،وكان فى نيته العودة لامدرمان قبل يوم الخميس ،لحضور زواج صديقه الشاعر عبيد عبدالرحمن ،وفى رحلة العودة العربية اتعطلت قصاد قرية (قنب) ،وماتمكن يلحق العرس ،فكتب وهو فى ذلك المكان اغنيته المشهورة (مسو نوركم شوفو المن جبينا صباح ) واشتكى فى ختامها للقمرى أن يعيره جناح لحضور المناسبة ، وافتتح اغنيته بإسم هذه الفتاه الاغريقية (مسو) التى اشتهرت بالجمال ،وكانت تجيد الرقص ، فى إشارة لحسرته لعدم مشاهدتها فى الحفلة .
وعليكم الله ياجماعة تأملو ملكة الشاعر سيد عبدالعزيز الغير عادية فى النظم ،وشوفوهو كيف اتغزل فى تلك الحسناء.واسمعو الاغنية بصوت احد سدنة الحقيبة المبدع الراحل بادى محمد الطيب وشوفوهو كيف بغرق في هذه الاغنية،،،،،،،،،

مسو نوركم وشوفوا المن جبينا صباح
والصباح إن لاح لا فايدة فى المصباح
هل اتاك حديث الكوكب النضاح
قمرة تمطر خمرة حارسا الفضاح
لو تحيجنا محاسن شمس للايضاح
مابتحيجنا محاسن محيها الوضاح
نور جمالا دهشنا معشر الفصاح
بين ناطق صامت بين صامت صاح
عالية غانية محاسن فيها شوق يا صاح
الجمال الفيها..كل معنا صاح
ننظر الايات من نور على الالواح
المعانى الفرد ومنية الارواح
فى العيون المرد والسحر لاواح
تخلب الالباب ويفرح النواح
القوام اللادن والاريج الفاح
من جسيما الناعم الاسمر التفاح
خلى عقلى وخلى فى هواى كفاح
جيش هواها احتل قلعة الاصفاح
روضة غنى جمالا يجلب الافراح
حورة من الجنة فيها تسقيك راح
كل هذا تراهو ما بزيل اتراح
من بحبو تهانت واستراح وراح
ياليالى احبابى ما شفيتى جراح
بل شفيتى فؤادى ومدية الجراح
صرت اتلو حديثك فى الوجود بصراح
لو تليت بو كتابى سميت بالشراح
كم نظرنا مناظر يعلم الفتاح
لو قفلنا قلوبنا كانت تهون مفتاح
ادرى ام لم ادرى صرت كالمرتاح
لو رضاكى هلكنا للهلاك نرتاح
ما جنيت بهواى ما على جناح
اشتكيت للقمرى لو يعيرنى جناح
يكفيك لسانى الغنا فيك ليك لوناح
لو رثيت بو حياتى ما احتجت لى مناح

سلمتى يا سلا ..
بالجد ابداااااااااع .. سردك لهذه الزكريات
يخلي الواحد مشتاق يعرف اكتر واكتر ..
واتمنى يكون منتدانا مكتبة لتوثيق
هذه الحقبة المهمة في تاريخ
الفن السوداني..
واحييك علي اختيارك للاغاني
الاكتر من رائعة..
تسلمى..

من طرف **sala35** الجمعة 14 مايو 2010 - 7:12

شكرا الغالية ام تسابيح على طلتك الحلوة كما عودتينا دوما...

واغنيات الحقيبة وشعرائها وملحنيها دنياجميلة مليئة بالطهر والعفاف والرصانة لذا كانت تستحق التوثيق واتمنى ان نوفق فى الابحار واستخراج الدرر.

شكراً اخى كبسور على المرور والاشادة،،،،،،،

[b]

ماتنومي يااخت سلا

نحن منتظرين المزيد من هذا السرد الجميل

ودايرنك يوم تعملي حلقة خاصة عن الفنان بادي محمد الطيب

سلا مساك الله بالخير..طبعا انت عارفة انا بعزك قدر ايه وكمان بعز خيمة ودفضيل وما تنسى انك من اوائل الناس القشوا لى الدرب وورونى درب المنتدى عن طريق الخيمة دى..اها اسع انا بالجد متلوم معاك عشان بعد ما انضميت رسمى للمنتدى يادوب دى اول دخلة للخيمة..وماشاء الله لقيت الخيمة كلها ابداع..اها عندى طلب صغيرونى كدا (بعد ماتوصلى سلامى لودفضيل) قولى ليهو عايزينو يكلمنا شوية عن الفنان الكبير عبدالحميد يوسف لانى بفتكر انو مظلوم اعلاميا وياريت كان عندو تسجيل ليهو يخلينا نسمعو.. وبرضو غضبك جميل زى بسمتك...

نواصل الليلة جلساتنا في الخيمة ،،
وقلت لي عمنا ودفضيل وصلتنا عدة رسائل في بريد الخيمة ،فيها اشادة وطلبات معينة من الاخوان كبسور وحوذي .
قال لي كنا دايرين نمشي في سردنا تدريجيا،لكن استجابة لطلب ولدنا حوذي حانخصص هذه الجلسة عن الفنان عبدالحميد يوسف وحانتكلم في مرة تانية عن الفنان بادي عليهم الرحمة جميعا ،،
يعتبر الفنان عبدالحميد يوسف حالة خاصة في تاريخ الغناء في السودان ،لانو عاش في فترة الحقيبة وتميز فيها وعمل ثنائية رائعة مع الشاعر عتيق ،وكان يمتلك صوت جميل ،وقدم عشرات الاغاني في تلك الفترة ،بل ان اغنيته المشهورة (اذكريني ياحمامة )ومعها كسرتها (انا داير العنب انا )كانت امتحان ثابت وصعب لكل الفنانين الدخلو الاذاعة منذ افتتاحها في عام 1941ولي فترة تزيد عن ربع قرن من الزمان ،اول ما الفنان يقعد عند لجنة الاصوات ،وكان فيها ناس صعبين ذي العبادي،ومتولي عيد وابوالعزائم ،طوالي يقولو ليهو غني لينا اذكريني ياحمامة ذي مابقولا عبدالحميد ،والفنان الوحيد الذي رضيت اللجنة عن ادائه كان الفنان حسن عطية ..
المهم اننا قلنا عبدالحميد كان حالة خاصة ،لانه بعد الحقيبة كان علي راس الفنانين العملو النقلة ،ونعني بذلك انتقال الاغنية للمدرسة الوترية الجات بعد الحقيبة.وطبعا اغنية الحقيبة في غالبها تميزت بالحن الدائري ،وعبدالحميد يعتبر اول من جاء بالسلم الموسيقي في السودان ،ونعني بذلك تعدد المولودية في الاغنية .
ويعتبر عبدالحميد يوسف استاذ للفنان الكاشف وزملائه في تلك الفترة .
ومن اشهر اغاني النقلة للحاج عبدالحميد يوسف كانت اغنية (غضبك جميل ذي بسمتك) للشاعر الكبير حميد ابوعشر ،واغنية (على موج الاسير) ،وغير ذلك عشرات الاغاني ، وتلسطن عبدالحميد في الغناء الحديث كما تسلطن في الحقيبة ،عشان كدا قلنا انو كان حالة خاصة ..

وكلام ولدنا حوذي صحيح ،من حيث ان الفنان عبدالحميد يوسف ظلم من الاعلام ،ولم يوثق لفنه عشان كدا الناس سمعو غناهو لكنهم ماعرفوهو ،،وحانهديك ياحوذي جزء من نص اغنية (غضبك جميل ذي بسمتك) وتسمعا بصوت صاحبها الاصلي ،،
عليك الله ياحوذي تأمل شعر عمك حميد ابوعشر في الاغنية ،هل دا كلام زول عادي ؟الم يكن سابقا لزمانه بعشرات السنين ؟
واستمع لهذا الصوت الخالد ،وشوف التطريب وتمكنه في الاداء وكيف بغني بارتياح شديد في منطقة الغرار والجواب ،ممايدل على سلامة صوته (الغرار والجواب دي ياحوذي لو مافهمتها خليها،دا كلام موسيقى ،برا المقرر) ،وشوف الفرقة دي رغم بساطتها من ناحية العدد واعتمادها على الايقاعات والة الكمان والعود فقط ،لكن ناس عمك عبدالفتاح الله جابو ،وبرعي وعربي جودوا العزف بطريقة مذهلة .
وانشاء الله نكون ارضيناك في هذه الجلسة ،،

غضبك جميل زي بسمتك
على كل حال شكلك بديع ..
حكم الغرام بي تذللي
وحكم الجمال بى تدللك
الاشتياق والاحتراق والوجد لي
الابتسام والإنسجام والحسن لك
عجبا تكون قاسي ووديع شكلك بديع
غضبك جميل زي بسمتك

نظرت عيونك لمحنتي
وسحر الجمال في بهجتك
خايف خدودك تنجرح من نظرتي
خايف فؤادي يذوب حنان من نظرتك
جرت وجفيت وجفاك فريد
يا آية المعنى الرفيع

كيف الخلاص يا دنيتي
ما بين صدودك وجبرتك
أراك قريب لكن بعيد عن رؤيتي
من بعد ما أوقعتني في فتنتك
جرت وجفيت وجفاك مريع
يا آية المعنى البديع