طال غيـــــــــــــابك...

إزَّيَكُم يا شنداويه ياعسل....

الليلة عندنا حاجة رهيبة للتلاتة بنات (ما التلاتة بنات ديلك) أنا قاصد الأخوات المُبدعات : "حياة ، هادية وامال" الشهيرات بـ "البلابل"..

البنُّوتات الهسِّي بِقوا حريم كُبار كانوا وما زالوا روعة في الأداء الغِنائي بأصواتُم البُلبلية وذلك عبر أداء ثُلاثي فريد من نوعه " Trio" ..

البلابل لِقو دعم كبير جداً من كل الأنواع في مسيرتُم الفنية وكان الأب الروحي ليهم (شِعراً وتلحيناً واحتواءً) هو الجميل " بشير عباس" عازف العود العظيم...

* طبعاً البلابل عادوا بعد طول ترحال واغتراب وكلهم صدح وتغريد...

أغنيتنا اليوم هي " طال غيابَك " وكُللللللللللللها شكوى من الفراق والهجران اللي بي دورُم أدُّو لي نواح شديد..

ما متأكد من الشاعر ما عايز افتي ساي........

شوفوها وحاولو أسمعوها..

وما تغيبوا.......

[b]طال غيابك
يا بعيد لي متين ايابك
آه انا من نار عذابك
من فراقك أنا تُهتَ
والدروب قِدَّامي راحت
والسهر أضناني وتعبت
لا هُجوع لا عيوني لاقَت
والنجوم شافت معايا
كلّ أحزاني وشقايا
في غيابك يا مُنايا
السُّهاد والهم غِشابك
آه انا من نار عذابك
عِشتَ أحلم بيك وامنِّي
قلبي بالأفراح واغنِّي
قُلتَ امكن ليّ ترجع
الليالي الضاعو مِنِّي
أصلو حِلم البِهوى همسة
أو خيال يدِّيهو لمسة
غايتو لمّا الدنيا تقسى
يبقى أظلم ناس، حبايبك
آه انا من نار عذابك
دمـعة دمـعة وآهـة آهـة
والهموم في منتهاها
وانت لا جيت لا كتبت
لا رحَمتَ الروح شقاها
العيون الإنت سيدا ومُشتهاها
زادت الآلام بُكاها
باقي ليْ قلبك نساها
تاني وين بتقول حبابك
آه انا من نار عذابك

مع تحياتي:الناصــــــــــــــــــرابي [/b]

عشان نقدر نشاركك الاستمتاع بالاغنية حقو تنقلا لينا فى شكل مقطع فيديو كما فعلت الاخت ام احمد فى الاغنية الرائعة التى نقلتها لنا فى الشهر الماضى وهى اغنية - حليل امى - من كلمات الاستاذ اسحق الحلنقى الحان السيد : صلاح ادريس ومن اداء الفنان محمد الفاتح

طال غيـــــــــــــابك...

طال غيـــــــــــــابك...

رد: طال غيـــــــــــــابك...