دوبيت

تميل زينوبة زى البان يمين وشمال تودى الطوق
واخوان ام شلخ ينكبو جوه الداره
زى صقرا نزل من فوق
ضرب الصوت والركزة بيفرق الناس
عشان زينوبة ما بتحوق
وعاد تتحزم الجنيات وتتنظم تقيف في روق
وكل واحد يهز ضرعاتو والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق

اجمل مافى ابيات هذا الدوبيت انه يصور ببراعة صورة رائعة لمشهد كاد ان يندثر من حياتنا المعاصرة .. واشك فى ان الكثيرين من ابناء هذا الجيل الحديث قد شاهد هذا المشهد او يعرف شيئا من مفردات هذا المقطع الشعرى :
[وكل واحد يهز ضرعاتو والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق ]

دمت اخى ابو معتصم وشكرا على هذه المساهمة

أجزل الشكر والتحايا لك أخي حموري
وسعدت جدا ً بمرورك وتعقيبك الثر ..

تعال يا شيخ النريك صفاتنا

ما عاشرنا ذولا ضاق عسلنا وفاتنا

نحن رجال عمل نحن الخشن كفاتنا

نحن وفانا للعاشرنا حده وفاتنا

مشكور أخى أبو معتصم وأنت تتحفنا بهذا التراث الرائع .. وصدق أخى حمورى وهو يسلط الضوء على التصوير الشعرى الجميل لشباب ذلك الزمن الجميل ، لكن مازال ضرب الصوت والركزة الرجولية لشبابنا موجود فى قرانا وبوادينا .. ومازال البعض من بنات أم زين ينسجن خيوط حبهن العفيف طواقى يزينّ بها هامات أحباءهن .

لو لاقيتى يادادا الضميرو فتيلو
بالنار المولعة فى القليب أفتيلو
قولى ليهو العشوق الروحو أتلفتيلو
بى عدل او ظلومة ارجوكى أتلفتيلو

جناس وطباق وتوريه وتشويق لو كان سيبوية معانا كان إحتار في متل الشي دا ..
وكان حلف طلاق وحرام إلا كان يتنازل عن لقب أبو اللغة ليهو ..
تسلمي يا سلا ويديكي العافية ..
يمشي ام تتالي الليلة باروو وزايرو
اتخنتل متل زرع الذرة الفي جزايرو
نهداً دابوا قام عراوي زرايرو
قال للناس تراهو الموت بشيل الدايرو

مادام اتبسطت ياأبومعتصم اسمع عمك عبدالله حمد ودشوراني قال شنو:

المرض ان كتر لابد يوم يودر سيدو
وانا الحاس بيهو مافيش داعي لي ترديدو
الزول التريدو لوسالمك بي ايدو
تبقى شربت من لبن الحليب مو نيدو

الله يديك العافيه ياسلا
هههههههههههه والله روعه

الله يديك العافيه ياسلا
هههههههههههه والله روعه
والله يديك العافيه ابو معتصم على الابداع

تسلم يا الغالي عبد الله حسن بشير ، ومنتظرين منك جدعة جدعتين كدا من تراث أهلنا في الدوبيت ..
الغالية سلا إختيار أكثر من موفق وتصوير بديع لي عمنا ود شوراني أسياد الدوبيت السهل الممتنع .

الليلة القبل عتن سحابن وراب
ونفضنو البروق نيلا طلع عساب
طريفية من الرد والحيامة سحاب
هجينك لف نعاع البترعد وجاب

مقتبس من روائع شعر البطانه

عِبْـدِّلَّة

أنا أخو البت اللكعت قرن الخمرة النازة
على وردان الصبوة الراكزة
الجنيات الهازة .. صدورن لازة ورقّ النص زي خيت الشلة
بالحيل آ جني إيه والله
الجنيات الحزمو الجبة
وعرق الشتوي عليهم نايا و صب
قول ما دل .. رجالا حصدوا الحبة
عيشهن هادو انكال واتعبّ
ومنو كتير في الواطا انكبّ
وباقي مصوبر واقف قبة
الحمد آلاف .. الشكر آلاف
الحمد آلاف الشكر آلاف
العيش الرقد أصناف أصناف
الولد الكان.. عزام .. حلاف...ضياف
الرزق الجانا مدله.. الحلق الجاف اتبلا
بالحيل آ جني إيه والله
الوادي الجانا مترقن
مدّ جناحو الطايل شرقا وغربا
القبلي بروقو على القلعات يضّربن
الدكن البعدن قربن
فوق صنقور المحلة الطالت كبن
قول للمحلة بيوتك خربن
قول ما دلة.. الحلق الجاف اتبلّ
بالحيل آ جني إيه والله
مرحاتنا شرابهن يوت ماغبن
شبعانات في الشقل أب شوك ما شبن
الحمل ولدن وربن
حلماتن تقلن.. جرّن.. فوق سيقانن كبن
اللبن العاتم في ضرعاتن جبّن
المغصة إن كان ضرعاتن خربن
القرعة آ وليد .. السعن آ بنية
القربة كمان... كبوها المية
المغصة إن كان ضرعاتن خربن
شوفو النعمة السالت فوق قيزان الرملة
ناس البندر لبن الشاي بالعملة
سمح الخمج الفوق أسيادو
سمح العز المن أجدادو
الجنيات المشو ما عادو
كان بالردة أكان اتنادو
غرب حامد وشرق بلة
كانوا بحلبو الضرع الدلة
كانوا بحضرو الخير القدحو معلا
الجنيات ما كفرت بنعمة الله
بالحيل آ جني إيه والله
ذات في يوم والغيمة تهتّف مطرا نقّع
فوق نوار الطلح الفقع
ريحة البرد إن جاتك عطرا فايت خمر الفوق أردافا مجضع
شفنا الوادي يقشقش في دمعات الليل
والتعل الشايل بدا يتفقع

تلب حامد فوق مخلوفة أب زور واتربع
طلق الرسن أب زمة وسوّا خبيبا بدّع
هوّد في رقّاب الصي
لا قوه ثلاثة زبيدية
خالفين سيقانن فوق السنكيت ورقاب ألبل بيناتن مرخية
محجوبات بالخرز الفصلو السوميت
كل واحد درقة وسيف وطبنجية وباقي جرابن مليان دلميت
الجنيات اتقبلو وضاقو الحارة وضاقو المرة
وكان حجازن صقر الجو
حامد كان عارفين ضاقوه رجال قبالكن
شوفو أرزاقكم أخير من ضو
حامد عوج الطندب آ وليدات
عوج الطندب نار القصب الهبلت ما بتعدلو
شوفو شلوخو تلاتة مطارق رقدن
وكل تلاتة يمين سياف اتقبلو
حبوب القارح ... ما دلة
ولدا ما ختالن زلة
شن قولك فيهو عليك الله
بالحيل آ جني إيه والله
وينا مراتع الدرت الباسط دايما ببكي عليهن
وين بنوت الحلة البكّر عصرا بدري يسون في شاهيهن
بعد الليل ما يهّود ونحن نهّود.. عاد أماتن ينادن ليهن
نمشي على القيزان نتقادم.. أقيس الخطوة مع التاتاي ومشيهن
والله البعد الحاصل ما نساني
وحاتكن في قمراتنا بشوفو وشيهن
الا النضم أب غنة اللهج السكر وين بلقاهو
بنات الريل الدوب ليهن
الخوف يا ناس كان يبقى الشوق الحاصل بينا معشعش فيهن
مقنع سابل وين بلقاهو
طرفا ذابل وين بلقاهو
وعين بتدنقر من واليهن
الوجنات الشعّن بقّن
ود العين النايم زرقن
مو زايغ رسيان وميقّن
زولن كان خدران ومحقّن
من الشوفة عروقو يطقّن
كان الدنيا بصح تتخلا
كن بركن معاهن فوق رملاة الحلة
الا كمان بنشوفا مذلة

تسلم يا عبد الله ..
إضافة حقيقية لإثراء منتدي الشعر والشعراء والله ..
ونحن بالجد أكثر من سعداء بتواجدك معنا وبإمتاعك لنا ببحثك الدؤوب المتواصل في أطابير الشعر والشعراء ..
فلك منا كل الود وعميق التحايا وخليك مواصل وما تنقطع مننا ..
وبالتوفيق إن شاء الله يا رب .
ودمــــــــــــــــــــــــت .

نـحـن ولاد جـعل اهــل الـكـرم لا حـدو
نحن اللي الضعيف باب العوج بنسدو
نحن الفي الحروب فرسانا ما بـنــعدو
سرج الخيل علي ضهر المحن بنشدو

ياياقوتة الحضرى الحضارمى زبونـــــــك
عازة وغالية وطلعن فى الثريا فنونـــــك
عالية أرداف،ضامرة هاف،وقارن نونــــك
انكال بالجمال لامن دفق ماعونـــــــــك
*********
ياتمرة كريمة القاد سبيط عرجونك
لوكان أمنوك زاهد الدنيا يخونــــــــك
معلومية الذكاء فيها ماهرة فنونــــك
ربى كساك هيبة وصدر قانونــــــــــك
*********
قمرالسبعتين نورك مضوى دجونـــــك
يقلق ويفقد الحياة والصبر مسجونـــك
واعى الناس يضيع مابين قساك وهونك
كل المالى مركزو صار قتيل مسنونــــك

الغالية سلا حياك الله وأبقاك ..
المسهرك حد الساعة دي شنو ؟؟ ههههه
لكن أمتعتينا بي جنس نمك الجميل والراقي دا ..

نحن اولاد جعل تركة بني العباس
وجدنا عم نينا وغرة للفراس
البشتم عروضنا خصيمو خير الناس
الجاتو السور من فاتحتن لي الناس
غير نسل الحسين في كافة الاجناس
دربنا مستحيل لا يغشكم خناس
متوهد سنينا اللعضام هراس
باقي الناس جسد نحن القلب والراس

من شعر الفريجوني ..

الاخ ابومعتصم

انت خارج السودان وتعلم تماما ان الحياة غير واليوم مقلوب بعدين زول بعيد من شندى النايم ليها شنو؟؟ ولاماكده؟

عمر كسار قرار كلب اليهود الكافــــــــــــــر
قاهرة المعز زارا ورجعلنا ظافـــــــــــــــــــــر
ليل أوكامبو ظلم ونحنا صبحنا سافـــــــــــر
عوافى اب رسوة محل ماتدور تسافرسافر
**********
أوكامبو البليد مالك بقيت حيـــــــران
منواللزاك قال ليك ولع النيــــــــــــران
ماشفنا المكوك يحاكمن سكـــــــران
ولاسمعنا الاسد بتخوفو الفيـــــــــران
**********
قرار أوكامبو اصبح فى النجم متعلـــــق
مابنقص عمرشيمة ودروبو تزلــــــــــــق
مرواد الكحل اللى العمايا بشلـــــــــــــق
عوافى اب رسوة محل ماتدور تحلق حلق
***********
اب رسوة ابزرد ريسنا عالى الهمــــــة
سافر بى مهل جلباب عباية وعمـــــــة
فى اكل الفطيس والله مابتسمــــــــــى
منو غير البشير بخوض النار ويحضر القمة

sala35 كتب:الاخ ابومعتصم

انت خارج السودان وتعلم تماما ان الحياة غير واليوم مقلوب بعدين زول بعيد من شندى النايم ليها شنو؟؟ ولاماكده؟

صدقت يا سلا والله اليوم خارج السودان مقلوب تماما ً كان عندكم في القاهرة ولا عندنا في الرياض ..
ونقول شنو ؟؟ غير كده .. هههههه

أها دا دوبيتا ً لي خليل فرح في جلسة ً ما ياها ..

دنك دمو سايل اظنو مـــات مفلوق
عبقيبو فاح عسف مــــلانا خلوق
ملوك في دارنا نحن وبرانا مانا حلوق
نفوسنا نفوس ملايكه ما بستجير مخلوق

نحنا اسود غواب كضب البدانى وكرنا
نحنا الفوق كراسى المملكة اتحكرنـــا
شوفتنا للسلاح تبينا جانا سكرنـــــــــا
نحنا ان هجنا سبحان من يصفى عكرنا

(دا حمدان شاعر ناظر الجعليين)

والله يا ابومعتصم وسلا انتو فعلا اسود
وفطاحله ووكركم مافى زول بقرب ليهو
ومساهماتكم جد رائعه وخطيره وكبيره
وحسستونا باننا جنبكم لا نسوى شئ
الله يديكم العافيه والى المزيد من الروعه والابداع

أخونا عبدالله نهارك سعيد والله دا تواضع منك ساكت ومساهماتك جد رائعة.وبهديك مقاطع من شاعر الجعليين ود خلف الله بس لازم تاخد لك فيهن عرضه.

نحن اولاد جعل اهل الملك بالاولـــــى
نحنا حكمنا معلوم خايلة فوقو الصولــة
نحنا فارسنا البتختشيهو الدولــــــــــة
نحنا الصاقعة كل الناس تقول لا حــولا
************
نحنا اهل السواقى اللترفع واسوقــــا
نهدى الصافنات للضيف ركوب ويسوقـا
ان ضرب النحاس نحنا نشلع عوقــــــــا
القيمان نلاقيها والوفا نسوقــــــــــــــا
************
نحنا المابسمونا العريب وكلاتـــــــــــه
ونحنا على ضهور الصافنات صلاتــــــه
طيعناها من دار برقو لى فلاتـــــــــــه
نحنا بندخل الألف ان بقينا تلاتـــــــــه
[color:830c=darkblue]

يديك ألف عافية أخونا عبد الله حسن بشير ، فنحن كما قالت أختنا سلا نعرف وزنك وإختيارك الجميل الموفق فية دائما ً ، وهذا إن دل ّ فإنما يدل علي عظيم شأنك وكريم تواضعك .. فهل ترجلت ّ عن صهوة جوادك وأمتعتنا بما تحتضنة بين ثنايا الصدور من تراث أسلافنا الأفذاذ لنعتلي به الفخر الأكيد الذي أورثونا له لنردد منه ما نريد ..

أختنا الغاليه سلا غايتو الليلة ما خليتي فينا نقطة موية في جسمنا كلها طلعت بالمسامات من العرضي الكتير ..
بس كان ناقصنا البطان ..ههههههه
ولا ما كدا يا أبو عابده ..

يلا النواصل ليكم في دوبيت خليل فرح في ذات الجلسة السابقة :

دُورْ يا ساقي دون ندماك علي مطبوق
وصهلل يا نديم واسمـعني مما يروق
زيم يا شادي زيم وشنف مسـامع السوق
وانشد في مـــــعاني البابليه وسوق

مشكور أخى ابومعتصم
ومشكوره أختى سلا وأبشرى
بالخير ماقصرت فى العرضه
وهاكم كلام بنونه بنت المك نمر
وهى ترثى أخوها عماره

ما هو الفافنوس

ما هو القليد البوص
ود المك عريس خيلاً بجن عركوس
أحي علي سيفو البجز الروس
ما دايرة لك الميتة أم رماداً شح
دايراك يوم لقا بي دميك تتوشح
الميت مسولب والعجاج يكتح
أحي علي سيفو البسوي التح

***
كوفيتك الخودة أم عصا بولاد
درعك في أم لهيب زي الشمس وقاد
سيفك من سقايتو استعجب الحداد
قارحك غير شكال ما بقربو الشداد
***
إن وردن بجيك في أول الواردات
مرناً مو نشيط إن قبلن شاردات
أسد بيشة المكربت قمزاتو متطابقات
وبرضع في ضرايع العنز الفارزات
***
يا بقة عقود السم

يا مقنع بنات جعل العزاز من جم
الخيل عركسن ما قال عدادن كم
فرتاك حافلن ملاي سروجن دم

والله قمة الإبداع يا أبو عابدة ..
أصلو أهلنا في تراث الرثاء ما بتلحقوا ..
وهذه الأبيات الرصينة من بت مكنا النمر بينونة تجسد كل الصفات التي يتصف بها أهلنا الجعلية بالذات وإن كانت في رثاء البطل الجسور المغوار عماره ود المك نمر ..
لهم الرحمة والمغفرة ..

أها النعود بيكم لي باقي دوبيت خليل فرح وشن قال

دع ما قال مالك فــيها وابن دسوق
كروم بابل قبيل ساقينا ليــها تسوق
حاشاك والله لولا حسنك الــمعشوق
والطرف الغرير ما كان لذيذ ومشوق

الأعزاء أبومعتصم - sala35 - عبد الله حسن بشير ...
ربنا يديكم العافية ماقصرتوا والله أمتعتونا .. واصلوا فى إمتاعنا فنحن نتلهف دوماً لأختياراتكم الرائعه من شعر الدوبيت.

مختار هو النشاك ورعاك وصف ذهونك
ماك مسيومة فى الأسواق منيعة حصونك
كتير من عاش مدهور وعلقنو ظنونك
نحنا برانا مابختانا سوط عربونك

**************
ظبية عنس الريل المجازى هنونك
جنيبة خيل قيافة ولابسة والكون كونك
ياأميهية الصيف فى خلاك وبقونك
باب ليمك عرج واقف حرس كركونك

أم احمد كتب:الأعزاء أبومعتصم - sala35 - عبد الله حسن بشير ...
ربنا يديكم العافية ماقصرتوا والله أمتعتونا .. واصلوا فى إمتاعنا فنحن نتلهف دوماً لأختياراتكم الرائعه من شعر الدوبيت.

الغالية أم أحمد تسلمي والله ودا من زوقك ..

أختنا سلا أبدعت والله
أها أنا قعدت خليل فرح دي بالحيل دروختني بدور أمشي عشان الداهي المنكر البشربو فيهو دا ما يخليني أكون إرتكبت أثام ( جليس السوء ) والعياذ بالله لكنو الظاهر حسا بي حالتي وطمامي منها قام تماها لي كلها فد مرة ..
إذا ً يلا نشوف خليل فرح كمل لينا دوبيتو دا كيف ..؟؟

كاسك من سلافة خـــدك المعشوق
ونغمك من لدانة قدك المـــمشوق
طفحت الكاس تطاير زي تبر مسحوق
رقت وراقو ندمـاي ورقى الراووق
********
صافيه ورايقه طاب مزجك صبوح وغبوق
ولا غبيت أنا ونــــظرة نديم وعشوق
صفار تبر البراتي المن صـفاك مسروق
مزجت اخلاقي بيهو يذوب ويحلى واروق
********
الليل انتلت وفزع النجـــــم مفروق
وانحدرت كواكبو تقول قطــن مطروق
وكت الليل برد منو الصـــبح ملحوق
حياةً غير نديم واقـــعة سيوف وبروق

أمتعتنا ياأبومعتصم بمربعات الشاعر خليل أفندي فرح.فقدكان مجيدا للشعر الوطني وليس هناك ابلغ من عازة في هواك ،وفي الضواحي ،أما خمرياته الرائعة فقد طوف فيها بالخيال رغم انها لم تكن جلسات خمر حقيقية.

أحييك الرائعة والمتألقة دوما ً سلا ..
كنت أظن أن العامة تدري من هو خليل فرح ؟
فعلا ً لمن لا يعلم عن خليل فرح غير المألوف لدي العامة مثل :
عازة في هواك .. ومنها سمي خليل العازة ، وفي الضواحي التي غناها له الراحل المقيم عثمان الشفيع ..
وغيرها الكثير الكثير ..
فجلساته ومعاقرتة للخمر هذه ليست إلا إضفاء لمزيد من التشويق الشعري وخصب الخيال الإلهامي فحسب دون أن يقربها ..
له الرحمة والمغفرة شاعرنا المعتق خليل فرح وإن شاء الله هذه الأبيات التي قالها في الخمر يكون بيقول فيها الآن لي خمرة الجنة وطيب كؤوسها .

نحن الفي الدواس اسود بتاكل النار
ونحن عدونا يشوفنا يسوي ياستار
بنخوض الدواس ونجيبو نحن التار
تاريخــا مـــلان زايــدنــــا نحن فخار

شنو يا ناس الحكاية شنو .. !! ؟؟
تغيب زيزو شهر تجي صاده تلقي البوست بتاعها رامي لي قداااام
نغيب لينا يومين تلاتة ولا حس ولا خبر والبوست واقف محلك سر ..!

ويييييييييينك يا أبو عابده ..؟؟
وييييييييييينك يا سلا ..؟؟
وينكم يا متزوقين شعر الدوبيت ..؟؟..!!
جرابكم فضا ولا شنو ..ههههه

أها خلاص النرجع ليكم بالجديد من شعر الدوبيت
وبمناسبة الإنتخابات دي أنقل ليكم الرباعية دي للشاعر أحمد الشيخ ( جريدة الخرطوم )

الولد البدور ينسر في يوم موتو
يحكم ضميرو وقطر الصلاح ما يفوتو
يتوكل عليه ما ينشغل بي قوتو
وفي الإنتخابات ما يدلل صوتو

الاخ/ ابومعتصم
لك التحية وانت تتحفنا بالروائع من شعر الدوبيت ولظروف قاهرة فى الايام الفاتت بعدت شوية عن منتدانا الحبييب بس لحظة مانسيتو وجرابنا مافضى لسه ومليااااااان وكدا عدنا وانشاء الله نكون اكثر قوة .واخترت ليكم مسادير من حكم شاعرنا الفذ وابن ولاية نهر النيل عكير الدامر :

ود بيت المحل ماتجر معاه موده
ماتتغش بى رزقه الحجر ماانكده
كل يوم الفرح لأصلو ياخد رده
مو زول سترة ود الأيده قاطعة المده

************

كافح فى حياتك ولى البزاحمك راكب
واتدور مع الايام نجوم وكواكب
امش قرابى مرة ومرة خليك راكب
اصلو الدنيا طوفان والمعيشة مراكب

**************

أب عمراً طويل مابنقتل بظروفه
وأب عمراً قصير موية شراب مغروفه
سو عيشتك توكل والرزق مصروفه
بيض ديمة والعند الله مى معروفة

****************
تجارة اخر زمن فايتة وعميرا قصير
المال مابعز ود القبيل مو خير
الشبع بعد الجوع سيدو ديمة صغير
الريش البقوم بعد الكسر مابطير

آخر ماقاله شاعرنا عكير الدامر وهو على فراش الموت وبعد هذه الكلمات نطق بالشهادة وصعدت روحه.. لك الرحمة والمغفرة بقدر ماامتعتنا بشعرك الثر:

سرورك مابتم تابعاهو ديمة الفجعة
ظاهرك لينا سكر الاطعمك وجعـــة
كم طفشتى مرتاح قلبو مابى النجعة
روحى تتشابى وانتى قطعتى خط الرجعة

تسلمي يا سلا وأنتي تمدين جسور التواصل الثر لبوست الدوبيت
وأحييك علي هذي الأبيات الجميلة للراحل عكير الدامر رحمه الله وأكرم مثواه ..

ويلا نواصل بي حماس دون فتور ولا إنقطاع بإذن الله

انحنا اولاد بلد نقعد نقوم على كيفنا
فوق لقا فوق عدم دائما مخدر صيفنا
نحنا الخرج بنملاهو وبكرم ضيفنا
ونحنا الفوق رقاب الناس مجرب سيفنا

خمسة شهور تمام والهل سايق
روحى مشحتفة وانا مانى فايق
لهيج المشرق العند الشوايق
ردودة روحى انا وكت ابقى ضايق

****
ركزنلك بروقك عكلن قيزانك
انهلن بشايرك واستعد عربانك
اتدلقن سحابك نع فوق وديانك
بى فرحة وطرب دقو الباب عربانك

ها الايام علي مقطوع سلك تلفونك
وقلبي المبلي رتبتيله ميدان قونك
مادام انتي حاملين السلط في عيونك
ظلمك لي مقبول يالحريص كردونك

[color=red]يا سجاعة الليل الملولحة غصونك
فاقد سمحة كان مازادعليك مو دونك
وين ياجريعة النحل اللذيذ مشنونك
كبدت نوق مساري ومطرك ليمونك[/color]

يا لولية الغواص صعيب مخزونك
قفل واختفي ومنع الموده حزونك
قمح القجة شركه وضحي بي مليونك
عسي اوجد لماك واسعد واكون ممنونك

نحن الما بقولولنا الخلوق وين جيتو
وتاني بنركب الدرشي البجابد خيتو
نحن عشيرنا ما بنخونوا نخرب بيتو
الا عدونا بنعصروا ونطلع زيتو

من طرف **sala35** الأحد 7 مارس 2010 - 14:13

قصبة منصح الوادي المخضر برو
قعدت قلبي تطوي وكل ساعة تفرو
ياخالق الوجود انا قلبي كاتم سرو
ما لقيت من يدرك المعنى وبيهو يبرو

بالسين ساهله كسرت عندها التايبين
يسهروا لامن الفراح حمارة يبين
الاناناس علي الحلووالعنب والتين
حلات لهج الفريد في عصره ماله وزين

أم تسابيح وسلا
مساكم الله بالتقوى والخير والأيمان ..
والله ما قصرتن تب وإن شاء الله ما عدمناكن .
أأسف لإنقطاعي من بوست الدوبيت نسبة لعدة مشغوليات خاصة وعامة
فأرجو منكن أخواتي العزيزات المواصلة دون إنقطاع وسأعود للمشاركة المتواصلة والفعالة عما قريب .

دمك صافي تحوير المعردب لونك
بدر الكون جبينك والضلمة قرونك
ما دام انتي زى نحف الخواجة عيونك
كيف يداوى من ألمو ويطيب مجنونك

خبر الشوم طلع هز القبب واترجت
والنار في الدارويش البترجمو وجت
امواج المحبين بالشوارع قجت
وربات الخدور نزعت حجابها وعجت------
عكير الدامر يصور مشهد نبأ رحيل الشيخ الجيلي الكباشي
***********************
ما بنقبل حكم ناس في بلاد الغربة
وتحت التاج نقع جمل انكسر في هربة
بدل الزل وعيشة العار وحالة الكربة
أولى الآخرة" ميت ما بخاف التربة"

*****************
فيك طبع الأسد صالحت او حاربت
وفيك طبع البرامكة بعدت او قربت
فيك طبع الملوك شرقت او غربت
وفيك طبع الحكيم لقمان حلل او ربطة

*********************************
وفال يمدح عبد الرحمن المهدى
عهدنا معاك كندال حربة مابتشلخ
وصرة عين جبل معقودة مابتتفلخ
اكان ايدينا فيك من المسك تتملخ
السما يتكى وجلد النمل يتسلخ
*********************************
ياعينة الرخا الضهرية لاقا صباحا
فيك سر عظيم وانا قصدى ليهو اباحة
افعال الظلام اياك نور مصباحا
تمشى على مهل والرجل شباحة
*********************************
وفى وصف الدنيا
تقابلك عروس تعشق معاني رقيصه
تملاك بالمحبة وتمشي نازله نقيصه
ما يغريك دلاله وتوب جمال بلقيسه
عاين للقبور وبعدين سماحته بتقيسه
...
بتقابلك جنينة تمتعك بي ثماره
وترقد في امانا وتنهمك بعمارا
باكر تبقى ليك حنضل تشوفو دمارا
تسحب منك .... وتدق مسماره
...
زولاً شاف رقاد العبروهو مشبر
والزول البرص فى الطوب ووشو مغبر
إتأكد دة بكرة مصير غير إتكبر
إنسى الموت والمال والبنون إتبتر
...
دى الغدارة دى الحقارة دى العقارة
كم قلبت زغاريد عرسه بي نقارة
أعلِنا بالحرب قبال تشب الغارة
وقبل الروح تغرغر وتبقى في الغرغارة
...
إتغشينا بي حبك لبسنا عباية
يا موية الرهاب الما ملت كباية
عجيب يا دنيا أمرك الا نحنا غباية
عاشقين الجمال في لمعة الحرباية

أختى الغاليه سلا كيف حالك
مشكوره على الاختيارات الجميله

وهاك مشاركتى دى مقتطفات من دوبيت
الطيب ود ضحويه
الليـــل امسى والنعسان جرايــده يرحن
كبـــس الهم علي الســــط قلوبن وحن
كضـــم الجرة سحــّار الغروب اتمحن
نعـــود سلمانه ياعمـر الظنون إن صحن
وقال ...
امـــلالنـا الكــدوس تمبكنــا ياعبـــاس
مابـترضى أم خدود جيبـــة الزمل يبـــاس
دا الجابر على الحــارة أم ضــرب رصاص
نحــن نـــدركا وعقــب الكــريم خلّاص
وقال ...
ناس قدّر الله بـي الحلة مكبريــن عمامـن
عدمــو الصيبة والزول ابعـوارض لامن
اندرجو الصناديد والضـرير قدامـــن
نوو العـودة لي المسكيـن عواد ايامــن
وقال ...
واحديــن في البيـوت متل الكلاب الشـــــول
قاعدين لـــــي مشاركــة الحديث والقــول
وحديـن في الغــروب يا شمـة تامين حــول
كسـر فــوق دبابيكـن يكتلــــو الزول
وقال ...
بالك فاضـي في روبة الفـــــــروع بتنقـــــد

ونحــن نهاتــــي لا بنرقــد ولا بنرقـــّد

الخلانــــي دون النـــاس بقيت متسقّـــد

فُرق العنقـــو باهــي ودوفــــــو مو تعقــــّد
وقال وهو فى السجن ...
اللــــــيلة السجــن جاب انكتامــــــة وحــرا

نمّـــن جرارقو حدث لــي الجنين الــــبرا

سحــــار الغــــروب راجينا كاضم الجـــــرة

بلحـــق بيك مــــراح حسب الله وين ما خـــــرا

رقــادي النمـــرة والباب العلــي مقفــــول

واخـــذوا البصمــة ومقاييس العــــرض والطول

دي النادرة العـلوانة لااستنبــول

خرب ايدينـــا يا شمــــة وجرايد الغـــول

زنزانــة الرمــــاد قاطعــة البصيــــص والضوء

وفيهــا مسجنيـــــــن ناســـاً اسوداً حــو

ارجــا البـــــــاري شــــن مايريــد عليك يسو

وإن وقــــع القــــدر تلقانـــا يابسيـــن كـــو

رقــــادي بــــلاط وسيـــخ متعــــارض

وقـــــافلنو علــــي من النسيــــم البــــارد

يا عــايد البلـــد قول لام وريـداً شــــــارد

كـــــل ما يشق حَمـــار شايل جرادلي ووارد

يومـاً في السجن يومــاً رقاد متحـــدر

ويومــــاً بالصفـــائح للبحــــر بنبـــدر

القيـــد والحبـــــس قط للقـــــــلب ما بـــــــــــــــودر

اطــــــرا اللينــة يا طــــه العزيـــز لا تودر

وقال أجمل مايمكن أن يقال فى القيم الرجوليه الاصيله ...

ما بتبـــن الجــارات اخــون الحُـــرة

مانــي دغــور بيوت بعقب احل الصـــــرة

ساوي ضــراعي للفـــــارس العنود ومشــــرا

بازل مـــالي لي القاصــدني قـــاعد بـــــرا

مابتـــبن الجــــارات اخونــــــــا وليتـــي

مانـــــي دغــــور بيــــوت الناس بتكره جيتــــي

ساوي ضراعــــي للفارس البقـــول ضميتــــي

بازل مالـــي للاخوان بعرفـــو حنيتـــي

من طرف Obai abunora السبت 1 مايو 2010 - 9:49

بتريد اللطام أسد الكداد الزام
حقيت الأسم من اليمن للشام
سيفك فى قضاريف الرجال قلام
أظن هذا التشبيه فى البطل ودحبوبه ,,,,