قصيده لشندى

شندي دِيَارنَا الأصْبَحَنْ

عالـيات جِــبَاهن لوَّحَنْ

شندي منارْ

نِعْــمَ الديارْ

لمَّا القِليبْ بِيدُوبْ حَنِينْ شندي أحَنْ

كلَّ الشَــوارِدْ في هَــواهَا بيسـرحَنْ

أشْوَاقِي صَاحْـيَاتْ الفُـؤادْ الما غَـفَنْ

أيامي تَمْضِي وَرَا الزَمَـنْ

لَكِنْ خواطري المـا مَضَنْ

شندي حِصِنْ شندي حِضِنْ

شندي طريقْ

نيرانو مُشْهَابْ الدَرِبْ

سَاعةَ الظلامْ إصبحْ رفِيْقْ

شندي ضَهَرْ نَجْدَة غَرِيقْ

شندي شَمِسْ

شَمْسْ الحَقيقة الما بتغِيْبْ

دارْ العُلومْ الما بتخِيبْ

شندي نَبَـا

بَرقْ الظَلامْ الما خَبَا

سيفْ الحُصُونْ الما نَبَا

شندي حُضُورْ شَايلاهَا سِيرة المُجْتبَى

تلقاهَا في مَدحْ الحَبِيبْ

تتهَادَى زَيْ نَسْم الصَبَا

نَشْوَانةْ بِتْحَلِّقْ رُؤَاهَا السَابْحَة في جَوْ أطْرَبَا

كـَاملْ الشَمَائلْ أعْجَبَا

السَارْ عَلى هَدْيُو الكَرِيمْ بحْلِفْ يَمِيناً ما كَبَا

التَاهْ فؤادُه بينهزِمْ

وحُرُوفو تَصْبِحْ زَيْ سَرَابْ

منْ غيرْ ظِلالْ منْ غيرْ رَسِمْ

الكَانْ شَتاتْ فقد الزَمنْ فقد المكانْ ما بِنحَزِمْ

النَكِرة ما بتصْبِحْ اسمْ

شندي كيانْ شندي وَسِمْ

شندي وَعـــــدْ

شندي رَعـــــدْ

النوبة ترعِدْ منْ زَمَنْ شايلة العَهدْ

ذكرى الحبيبْ زادْ السَعدْ

دِيْ الزَامْلة يُومْ ما فِيشْ بَعدْ

يومْ الحِسَابْ مِثـقال ذرَّة منْ العَمَلْ

مَحْسُوبَة عَــدْ

شندي بِتَهْتفْ بالذِكِرْ

أنْجُ سَعدْ

ما سَعيدْ هَلكْ

مُسْدارَهَا منْ نوبَاتْ تَرِنْ و قِليبْ بحِنْ

للكُــــــــلْ ملَكْ

شندي لسَانْ بـلهجْ حَبَابْ

وقِليبَهَا فاتحْ زَي بيوتهَا الفاتحَة بَابْ

شندي بَلدْ كُلَّ الصِحابْ

جُوّاهَا مَا بتشوفْ غَريبْ

شندي مِجافيَة الإغـتِرابْ

شندي رحابْ القادِمِينْ

شندي أمَانْ الخَائِفينْ

شندي أهَلْ

شندي ريَاضْ المك سِقايتو عَلى مَهَلْ

فَتّحْ جَدَاوِلها مِنْ زمانْ

مُمْتَدّة ما خلّتْ سَهَـلْ

جَابَتْ شَمَالْ شَقتْ غَرِبْ زَحَفَتْ شَرِقْ

والكُلْ نَهَلْ

شندي وِسَامْ

شندي حِزَامْ

حَزَمْ القـُلوبْ بِرِباطْ يقينْ

بلدْ التَسَامُحْ و التصافُحْ و التراحُمْ و الحَنِينْ

إيقاعها منْ أذكَارَها منْ أسْحارَها

مِنْ زَادْ السِنينْ

شندي رِسَالَة مِنْ الأهـَلْ

بتضّوي مِنْ فُوقَ الجَبينْ

شندي حُروفْ بتسَالمْ أشْواقنا وتَهِشْ

قبّالْ تَسَالِمْ في اليدينْ

شندي نَفيرْ زي ما بتشارِك في السَمِحْ

تلقاهَا يُومْ قَلبَكْ حَزينْ

شندي سِحـَابْ

بِرْحَلْ مَعاكْ سَاعة الهجيرْ

ساعةَ الجَفَا و سَاعْة الجفافْ بِصْبِحْ مَطيرْ

حَبَاتو مِنْ لالـُوبَا مِنْ مَهَيُوبَا مِنْ حَرْفْ القصِيدْ

صَيحاتو بتمَـزقْ ظَلامْ ليلاً شَديدْ

لكِنّو ليلْ شندي سمِحْ شايلّو ضَوْ

أسْـتاذ نَا شمَّــرْ قَامْ حَفَرْ

خَتَّ الأسَاسْ مَا خَتَّ لَوْ

سمَّــاهَا شندي مَمْ دَبيبْ

شَالتْ الاسِمْ في حينَها تَوْ

شندي مَقامْ

غذاهَـا مِنْ طيبْ الذِكِرْ أذْكارُو بالطيبْ ضَوّعَا

أزْرَقْ طَويلْ ضَامْرَ الحَشَا

جافي المراقِدْ مَوْضِعَا

في هِمّةَ الفارْسَ الجَسُورْ شَالَ الليَالِي و سَبّعَا

جافاها عُمْراً كانْ طَويلْ و نِهارُو صائِمْ أتبَعَا

ساقِيها بي عِلـمَاً غَزيرْ شندي دِيَارُو الأشْـبَعَا

شندي عُلُومُو الطَوّعَا

شندي فَضَائلو الطبّعَا

صِنديدْ بِلوّحْ أصْبَعَه

لمّنْ يسَامِر ليلو شيلْ بتـشُوفْ مَشايخْ أرْبَعَةْ

كُتّابُ كُؤوسو المُتـرَعَةْ

أوْلادُو فُرسَانْ المَحَلْ

أهَلْ البَصائِرْ والبَصَـرْ

شالـُـو الوِلايةْ معاها راياتْ الطَريقْ

مِنْ غيرْ وَحَلْ

عَقدُوا العَـزِمْ

أهَلْ الرَبِطْ أهَـلْ الحَسِمْ

رايهمْ وَحيدْ مَا مُنقسـِـمْ

شندي صِلةْ

شندي بَحَرْ شندي غَرَقْ

غَرَقْ الصَلاحْ البِينشَكَرْ

شندي تَشَعْلِلْ بالذِكِـرْ

لو طالْ غِيَابْنا عَنْ الوَطَنْ

رُوحِي في هَواكُمْ بَاذِلا

أشْوَاقِي في بَلَدْ الصَـقيعْ مَا بَعْزِلا

مُرْسَالهْا ليكُمْ في السُطُورْ

أحْرُفْ هَوَايَ بَنَزِّلا

يا أهْلَ شندي طِبتمُو

شندي بِكُمْ طابتْ دِيَارْ طابتْ صِلـَةْ

* الأبيـات أعلاه عثرت عليها فى مشاركه بمنتديات النيلين بأسم مناهل بتاريخ 9/10/2004م لا أدرى هلى هى صاحبة القصيده أم لا ؟